Azərbaycan dili – milli kimliyimizin və dövlətçiliyimizin əbədi dayağı - ŞƏRH

Dil hər bir xalqın milli sərvəti, tarixi yaddaşı, mənəvi dəyərlərinin daşıyıcısı və milli kimliyinin əsas göstəricisidir. Azərbaycan dili əsrlər boyu xalqımızın zəngin mədəniyyətini, ədəbiyyatını, dövlətçilik ənənələrini yaşadaraq bu günümüzə qədər gətirib çıxarmışdır. Müstəqil Azərbaycan Respublikasında dövlət dilinin qorunması, inkişaf etdirilməsi və gələcək nəsillərə ötürülməsi dövlət siyasətinin prioritet istiqamətlərindən biridir.

Hər il 1 Avqust tarixinin Azərbaycan əlifbası və Azərbaycan dili günü kimi qeyd olunması ana dilimizin inkişafına göstərilən yüksək dövlət qayğısının və milli-mənəvi dəyərlərimizə verilən önəmin parlaq ifadəsidir.
Azərbaycan dilinin dövlət dili kimi möhkəmləndirilməsi və inkişaf etdirilməsi Ümummilli Lider Heydər Əliyevin adı ilə ayrılmaz şəkildə bağlıdır. Hələ sovet hakimiyyəti dövründə milli dəyərlərin sıxışdırıldığı bir zamanda Ulu Öndər böyük siyasi uzaqgörənlik və cəsarət nümayiş etdirərək Azərbaycan dilinin dövlət dili statusu alması istiqamətində qətiyyətli mövqe sərgiləmişdir.
1978-ci ildə qəbul edilən Azərbaycan SSR Konstitusiyasında Azərbaycan dilinin dövlət dili kimi təsbit olunması məhz Heydər Əliyevin qəti iradəsinin və prinsipial mövqeyinin nəticəsi idi. O dövrdə bu addım milli maraqların qorunması baxımından mühüm tarixi hadisə kimi qiymətləndirilir.
Ulu Öndər deyirdi:
"Hər bir xalqın milliliyini, mənəvi dəyərlərini yaşadan, inkişaf etdirən onun dilidir."
Bu dəyərli fikir Azərbaycan dilinin xalqın milli varlığının əsas sütunu olduğunu bir daha təsdiqləyir.
Müstəqillik illərində də Heydər Əliyev Azərbaycan dilinin hüquqi əsaslarının möhkəmləndirilməsinə xüsusi diqqət yetirmişdir. 1995-ci il Konstitusiyasında Azərbaycan dili dövlət dili kimi təsbit edilmiş, dövlət dilinin qorunması və tətbiqi ilə bağlı mühüm hüquqi baza yaradılmışdır.
Ümummilli Liderin imzaladığı 18 iyun 2001-ci il tarixli "Dövlət dilinin tətbiqi işinin təkmilləşdirilməsi haqqında" Fərman Azərbaycan dilinin dövlət idarəçiliyində, təhsil sistemində, informasiya məkanında və ictimai həyatın bütün sahələrində geniş tətbiqinə mühüm təkan vermişdir.
Həmin ilin 9 avqust tarixli Fərmanı ilə isə hər il 1 Avqust – Azərbaycan əlifbası və Azərbaycan dili günü kimi təsis edilmişdir. Bu qərar ana dilimizin qorunması və inkişafına göstərilən yüksək diqqətin növbəti təzahürü olmuşdur.
Azərbaycan dilinin dövlət dili statusu qazanması ölkəmizin müstəqil dövlətçilik tarixinin ən mühüm nailiyyətlərindən biridir. Dövlət dili yalnız ünsiyyət vasitəsi deyil, həm də dövlət suverenliyinin, milli birliyin və müstəqilliyin əsas rəmzlərindəndir.
Ümummilli Lider Heydər Əliyev bu barədə belə deyirdi:
"Biz fəxr edə bilərik ki, bizim zəngin, böyük söz ehtiyatına malik olan Azərbaycan dilimiz var."
Bu fikir ana dilimizin zənginliyini, ifadə imkanlarının genişliyini və milli-mənəvi irsimizdə tutduğu müstəsna yeri əks etdirir.
Bu gün Ümummilli Lider Heydər Əliyevin müəyyən etdiyi siyasi kurs Azərbaycan Respublikasının Prezidenti İlham Əliyev tərəfindən uğurla davam etdirilir. Dövlət başçısının rəhbərliyi ilə Azərbaycan dilinin qorunması, zənginləşdirilməsi, informasiya texnologiyaları mühitində tətbiqi, latın qrafikalı nəşrlərin genişləndirilməsi və dil normalarının qorunması istiqamətində mühüm dövlət proqramları və sərəncamlar həyata keçirilmişdir.
Prezident İlham Əliyev çıxışlarının birində qeyd etmişdir:
"Azərbaycan dili o qədər zəngindir ki, heç bir xarici kəlməyə ehtiyac yoxdur."
Dövlət başçısı dəfələrlə vurğulamışdır ki, ana dilinin saflığının qorunması hər bir Azərbaycan vətəndaşının mənəvi borcudur. Bu siyasət nəticəsində Azərbaycan dili beynəlxalq platformalarda, diplomatik münasibətlərdə, elm, təhsil və informasiya məkanında öz mövqeyini daha da möhkəmləndirmişdir.
Qloballaşma dövründə dillərin qarşılıqlı təsiri qaçılmaz olsa da, Azərbaycan dilinin saflığının qorunması, zəngin söz ehtiyatının yaşadılması və gənc nəslə düzgün şəkildə öyrədilməsi hər bir vətəndaşın məsuliyyətidir.
Dilimizin düzgün işlədilməsi ailədən başlayaraq təhsil müəssisələrində, kütləvi informasiya vasitələrində, sosial şəbəkələrdə və bütün ictimai mühitdə xüsusi diqqət tələb edir. Ana dilinə sevgi milli kimliyə və dövlətçiliyə sədaqətin ifadəsidir.
1 Avqust – Azərbaycan əlifbası və Azərbaycan dili günü xalqımızın milli-mənəvi sərvətinə ehtiramın ifadəsidir. Ümummilli Lider Heydər Əliyevin dövlət dili uğrunda apardığı ardıcıl və məqsədyönlü siyasət nəticəsində Azərbaycan dili layiq olduğu yüksək statusa qovuşmuş, müstəqil dövlətimizin əsas atributlarından birinə çevrilmişdir. Bu siyasi xətt bu gün Prezident İlham Əliyev tərəfindən uğurla davam etdirilir və ana dilimizin qorunması, inkişafı və beynəlxalq nüfuzunun artırılması istiqamətində mühüm nəticələr əldə olunur.
Azərbaycan dili xalqımızın milli varlığının, dövlətçiliyimizin və gələcək inkişafımızın etibarlı dayağıdır. Ana dilimizi sevmək, qorumaq və gələcək nəsillərə saf şəkildə ötürmək hər bir azərbaycanlının müqəddəs vətəndaşlıq borcudur.

Sevda Quluyeva
YAP Kəngərli rayon təşkilatının sədri