Ağdam bölgəsində Manasın adını daşıyan məktəb qardaşlığımızın daha bir rəmzidir - ŞƏRH

Azərbaycan ilə Qırğızıstan arasında mövcud olan dostluq və qardaşlıq münasibətləri son illərdə daha da möhkəmlənmiş, müxtəlif sahələrdə uğurlu əməkdaşlıqla zənginləşmişdir. Bu dostluğun ən parlaq nümunələrindən biri Ağdam rayonunun Xıdırlı kəndində inşa edilən və böyük qırğız qəhrəmanı Manasın adını daşıyan orta məktəbdir. Bu təhsil ocağı təkcə məktəb deyil, həm də iki qardaş xalq arasında qarşılıqlı hörmətin, etimadın və həmrəyliyin canlı rəmzidir. Məktəb Qırğızıstan xalqının Azərbaycan xalqına hədiyyəsi kimi tikilmiş və Qarabağın bərpasına verilən mühüm töhfələrdən biri olmuşdur.Türk dünyasının ən böyük qəhrəmanlıq dastanlarından biri olan “Manas” qırğız xalqının milli-mənəvi sərvətidir. Bu adın Ağdamda fəaliyyət göstərən məktəbə verilməsi təsadüfi deyil. Manas adı qəhrəmanlıq, birlik, vətənpərvərlik və milli dəyərlərə sədaqət anlayışlarını özündə birləşdirir. Belə bir adın Qarabağın yenidən qurulan bölgəsindəki məktəbə verilməsi gələcək nəsillərə ortaq türk köklərimizi, mədəni bağlarımızı və qardaşlıq ənənələrimizi xatırladır.
Məktəbin açılışı Azərbaycan Respublikasının Prezidenti İlham Əliyev və Qırğız Respublikasının Prezidenti Sadır Japarovun iştirakı ilə həyata keçirilmişdir. Çıxışlarda vurğulanmışdır ki, Ağdamdakı Manas adına məktəb və Bişkekdə fəaliyyət göstərən Heydər Əliyev adına məktəb iki qardaş xalqın dostluğunun, qarşılıqlı hörmətinin və mənəvi bağlılığının simvoludur. Bu təhsil müəssisələri xalqlarımız arasında qurulan dostluq körpülərinin gələcək nəsillər tərəfindən də yaşadılmasına xidmət edir.
Müasir standartlara uyğun inşa olunan məktəb 528 şagird yerlikdir. Burada geniş sinif otaqları, laboratoriyalar, kompüter kabinetləri, kitabxana, idman və akt zalları yaradılmışdır. Məktəbin ətrafında müxtəlif idman meydançaları və istirahət zonaları salınmışdır. Bu şərait Qarabağa qayıdan ailələrin övladlarının yüksək səviyyədə təhsil almasına imkan yaradır və regionun sosial inkişafına mühüm töhfə verir.Bu gün Qarabağda həyata keçirilən genişmiqyaslı quruculuq işləri çərçivəsində belə bir məktəbin fəaliyyət göstərməsi xüsusi əhəmiyyət daşıyır. Ağdam torpağında yüksələn Manas adına məktəb təkcə elm və təhsil məkanı deyil, həm də Azərbaycan ilə Qırğızıstan arasında sarsılmaz dostluğun abidəsidir. Burada təhsil alan şagirdlər gələcəkdə iki ölkə arasında əməkdaşlığın daha da güclənməsinə töhfə verəcək, ortaq türk dünyasının dəyərlərini yaşadacaqlar.Nəticə etibarilə, Ağdam bölgəsində Manasın adını daşıyan məktəb qardaşlığımızın, ortaq tariximizin və mənəvi birliyimizin daha bir parlaq rəmzidir. Bu məktəb həm Qarabağın dirçəlişinin, həm də türk xalqları arasında həmrəyliyin gələcək nəsillərə ötürülməsinin ən gözəl nümunələrindən biri kimi tarixdə öz yerini tutmuşdur.

Əmir Babayev

YAP Şərur rayon təşkilatının sədri