Qardaşlığın yeni mərhələsi - ŞƏRH

Azərbaycan Prezidenti İlham Əliyevin Qırğızıstana həyata keçirdiyi rəsmi səfər iki dost və qardaş ölkə arasında münasibətlərin daha da inkişaf etməsi baxımından mühüm əhəmiyyət daşıyır. Bu səfər siyasi dialoqun genişlənməsinə, iqtisadi əlaqələrin möhkəmlənməsinə və qarşılıqlı etimadın daha da artmasına xidmət edir.

Azərbaycan və Qırğızıstan ortaq tarixə, mədəni dəyərlərə və Türk dünyasının birliyinə böyük önəm verən dövlətlərdir. Son illərdə ölkələrimiz arasında əlaqələr dinamik şəkildə inkişaf edir. Prezident İlham Əliyevin bu səfəri də həmin əməkdaşlığın yeni istiqamətlər üzrə genişləndirilməsi üçün əlverişli imkanlar yaradır.

Səfər çərçivəsində keçirilən görüşlərdə ticarət, investisiya, nəqliyyat, logistika, enerji, kənd təsərrüfatı, təhsil və mədəni-humanitar sahələrdə əməkdaşlığın genişləndirilməsi müzakirə olunub. İmzalanan sənədlər və əldə olunan razılaşmalar gələcəkdə birgə layihələrin həyata keçirilməsinə güclü zəmin yaradır.

Azərbaycanın həyata keçirdiyi uğurlu xarici siyasət nəticəsində ölkəmizin beynəlxalq nüfuzu davamlı olaraq artır. Prezident İlham Əliyevin xarici ölkələrə etdiyi səfərlər Azərbaycanın milli maraqlarının qorunmasına, yeni tərəfdaşlıqların qurulmasına və regional əməkdaşlığın möhkəmləndirilməsinə mühüm töhfə verir.

Qırğızıstana rəsmi səfər bir daha göstərdi ki, Azərbaycan və Qırğızıstan münasibətləri qarşılıqlı hörmət, etimad və dostluq prinsiplərinə əsaslanır. Bu münasibətlər gələcək illərdə də daha da inkişaf edəcək, Türk dünyasının həmrəyliyinin güclənməsinə və regionda sabitlik, rifah və əməkdaşlığın möhkəmlənməsinə öz töhfəsini verəcəkdir.

Cavid Mustafayev,
Yeni Azərbaycan Partiyası Goranboy rayon təşkilatının sədr müavini