Naxçıvanda yeni sənaye erası: iqtisadi yüksəliş və qlobal şəbəkələrə inteqrasiya

Azərbaycan Respublikasının Prezidenti İlham Əliyevin Naxçıvan Muxtar Respublikasına reallaşdırdığı növbəti səfər regionun sosial-iqtisadi həyatında tamamilə yeni bir səhifə açdı. Səfər çərçivəsində təməli qoyulan layihələr, açılışı edilən obyektlər və dövlət başçısının Azərbaycan Televiziyasına verdiyi müsahibə Naxçıvanın gələcək inkişaf xəritəsini aydın şəkildə nümayiş etdirdi. Bu inkişaf strategiyasının ən mühüm sütunlarından biri isə şübhəsiz ki, təməli qoyulan Naxçıvan Sənaye Parkı oldu.
Dövlət başçısının öz müsahibəsində xüsusi vurğuladığı kimi, Naxçıvan Sənaye Parkı ərazisinin miqyasına görə Sumqayıt Kimya Sənaye Parkından sonra ölkədə ikinci pillədə qərarlaşır. Bu fakt təkcə bir fiziki ölçü göstəricisi deyil, eyni zamanda dövlətin Muxtar Respublikanın sənaye potensialına verdiyi strateji dəyərin bariz nümunəsidir. Ölkəmizdə son illərdə uğurla həyata keçirilən sənayeləşmə siyasəti çərçivəsində yaradılan sənaye zonaları qeyri-neft sektorunun lokomotivi rolunu oynayır. Naxçıvanda belə giqant parkın təməlinin qoyulması regionun illərlə davam edən blokada şəraitindən çıxaraq, böyük istehsal və ixrac mərkəzinə çevrilməsi prosesini sürətləndirəcək.
Sənaye parkının fəaliyyətə başlaması, birincisi və en vacibi, yüzlərlə, gələcəkdə isə minlərlə yeni iş yerinin yaradılması deməkdir. Burada yerləşəcək rezident müəssisələr yerli kadrların, xüsusən də gənclərin işlə təmin olunmasında müstəsna rol oynayacaq. Dövlətin təşviq mexanizmləri, vergi və gömrük güzəştləri sayəsində investorlar üçün cəlbedici məkana çevriləcək bu park, daxili bazarı rəqabətqabiliyyətli yerli məhsullarla təmin etməklə yanaşı, əhalinin sosial rifah halının yüksəlməsinə birbaşa töhfə verəcək.
Naxçıvan Sənaye Parkını sadəcə lokal bir istehsal sahəsi kimi qiymətləndirmək olmaz. Bu layihə regionda qurulan digər strateji infrastrukturlarla sıx bağlıdır. Horadiz–Ağbənd xətti və Naxçıvanın dəmir yolu infrastrukturunun yenidən qurulması fəaliyyətə başladqdan sonra Sənaye Parkında istehsal olunan məhsullar Zəngəzur dəhlizi vasitəsilə birbaşa dünya bazarlarına çıxarıla biləcək. Bu, logistik xərcləri minimuma endirərək Naxçıvan məhsullarını qlobal bazarlarda rəqabətqabiliyyətli edəcək. Eyni zamanda, Naxçıvanın günəş və bərpaolunan enerji potensialı sənaye parkındakı müəssisələrin ekoloji təmiz və ucuz enerji ilə təmin olunmasına zəmin yaradır ki, bu da "yaşıl sənaye" konsepsiyasına tam cavab verir.
Prezident İlham Əliyevin Naxçıvana səfəri və Azərbaycan Televiziyasına verdiyi müsahibədə səsləndirdiyi fikirlər bir daha göstərdi ki, Naxçıvan Muxtar Respublikası sürətli transformasiya dövrünə qədəm qoyub. Təməli qoyulan Naxçıvan Sənaye Parkı yerli istehsalı gücləndirməklə, məşğulluğu artırmaqla və ölkənin eksport potensialını genişləndirməklə Azərbaycanın iqtisadi qüdrətinin növbəti rəmzinə çevriləcəkdir.

Kərimli Elvin
Yap Ordubad Rayon Təşkilatının əməkdaşı.