Naxçıvanın strateji inkişafında yeni mərhələ - ŞƏRH

11 avqust 2026-cı ildə Azərbaycan Respublikasının Prezidenti İlham Əliyevin Naxçıvan Muxtar Respublikasına səfəri mühüm siyasi, sosial-iqtisadi və strateji əhəmiyyət daşıyan hadisə kimi yadda qaldı. Səfər zamanı Naxçıvanın gələcək inkişafı, sənaye və nəqliyyat infrastrukturu, sosial xidmətlər, turizm, şəhərsalma, tarixi-mədəni irsin qorunması və təhlükəsizlik məsələləri diqqət mərkəzində oldu. Səfərin sonunda Prezident İlham Əliyevin Azərbaycan Televiziyasına verdiyi müsahibə isə görülən işlərin və qarşıda duran vəzifələrin daha geniş şəkildə ictimaiyyətə çatdırılması baxımından xüsusi əhəmiyyət daşıdı.

Naxçıvan Azərbaycanın dövlətçilik və mədəniyyət tarixində xüsusi yeri olan qədim diyardır. Son illərdə burada həyata keçirilən layihələr göstərir ki, regionun inkişafı ayrı-ayrı tədbirlərlə deyil, vahid və uzunmüddətli strategiya əsasında həyata keçirilir. 11 avqust səfəri zamanı Naxçıvan Sənaye Parkının təməli qoyuldu, yeni elektrik mühərrikli avtobuslar nümayiş etdirildi, dəmir yolu infrastrukturunda görülən işlərə baxış keçirildi, DOST Regional Mərkəzi istifadəyə verildi. Eyni zamanda Naxçıvan şəhərinin 2044-cü ilədək inkişafına dair Baş Plan təqdim edildi və bir sıra mühüm sosial, turizm və mədəniyyət layihələrinin təməli qoyuldu.

Naxçıvanın gələcək inkişafında nəqliyyat bağlantılarının genişləndirilməsi xüsusi əhəmiyyət daşıyır. Regionun Azərbaycanla, Türkiyə ilə və digər qonşu ölkələrlə nəqliyyat əlaqələrinin inkişaf etdirilməsi onun iqtisadi və logistika imkanlarını əhəmiyyətli dərəcədə artıra bilər. Xüsusilə dəmir yolu infrastrukturunun yenilənməsi və yeni nəqliyyat kommunikasiyalarının yaradılması Naxçıvanın gələcəkdə regional nəqliyyat və logistika mərkəzlərindən birinə çevrilməsi üçün mühüm imkanlar yaradır.

Sənaye Parkının yaradılması da Naxçıvan iqtisadiyyatının şaxələndirilməsi baxımından mühüm addımdır. Yeni istehsal müəssisələrinin yaradılması, investisiyaların cəlb olunması, yerli məhsulların istehsalının artırılması və yeni iş yerlərinin açılması regionun iqtisadi fəallığına müsbət təsir göstərə bilər. Bu, Naxçıvanın yalnız dövlət investisiyalarından deyil, özəl sektor və sahibkarlıq fəaliyyətindən də daha çox faydalanmasına şərait yaradacaq.

Səfərin mühüm istiqamətlərindən biri sosial siyasət oldu. DOST Naxçıvan Regional Mərkəzinin açılması sosial xidmətlərin vətəndaşlara daha əlçatan və müasir formada təqdim olunmasına imkan verir. Dövlət siyasətinin əsas məqsədlərindən biri olan insan rifahının yüksəldilməsi Naxçıvanda həyata keçirilən sosial və infrastruktur layihələrində də öz əksini tapır.

Naxçıvan şəhərinin 2044-cü ilədək inkişafına dair Baş Planın təqdim olunması isə regionun gələcəyinə uzunmüddətli baxışın göstəricisidir. Müasir şəhərsalma yalnız yeni binaların tikintisini deyil, rahat nəqliyyat sisteminin, yaşıllıq sahələrinin, sosial obyektlərin və müasir yaşayış mühitinin yaradılmasını nəzərdə tutur. Bu baxımdan Baş Plan Naxçıvanın gələcək simasının formalaşdırılması üçün mühüm sənəd kimi qiymətləndirilə bilər.

Turizm və mədəni irsin qorunması da Naxçıvanın inkişafında xüsusi yer tutur. Möminə xatun türbəsində aparılan bərpa işləri, Əcəmi Naxçıvaniyə həsr olunmuş layihələr və yeni mehmanxana kompleksinin yaradılması həm tarixi irsin qorunmasına, həm də Naxçıvanın turizm imkanlarının genişləndirilməsinə xidmət edir. Naxçıvanın qədim tarixi, memarlıq abidələri və təbii sərvətləri onun turizm potensialının daha da artırılması üçün böyük imkanlar yaradır.

Səfər zamanı təhlükəsizlik və müdafiə məsələlərinə də xüsusi diqqət yetirildi. Əlahiddə Ümumqoşun Ordunun yeni yaradılmış komando hərbi hissələrinə Döyüş bayraqlarının verilməsi Naxçıvanın müdafiə qabiliyyətinin daha da gücləndirilməsi istiqamətində atılan mühüm addımlardan biridir.

11 avqust səfəri çərçivəsində Prezident İlham Əliyevin Azərbaycan Televiziyasına verdiyi müsahibə Naxçıvanın gələcək inkişafı ilə bağlı əsas istiqamətləri bir daha gündəmə gətirdi. Müsahibə və səfər zamanı təqdim olunan layihələr göstərir ki, Naxçıvanın inkişafı kompleks şəkildə davam etdirilir. İqtisadiyyat, nəqliyyat, sosial siyasət, turizm, şəhərsalma və təhlükəsizlik sahələrinin paralel inkişaf etdirilməsi regionun gələcək potensialını daha da artırır.

Ümumilikdə, Prezident İlham Əliyevin 11 avqust 2026-cı il tarixli Naxçıvan səfəri regionun yeni inkişaf mərhələsinə qədəm qoyduğunu göstərən mühüm hadisədir. Qarşıdakı dövrdə həyata keçiriləcək layihələr Naxçıvanın iqtisadi imkanlarının genişlənməsinə, əhalinin rifahının yüksəlməsinə və regionun Azərbaycanın nəqliyyat, iqtisadi və turizm xəritəsində daha mühüm mövqe tutmasına şərait yarada bilər. Bu proses Azərbaycanın regionların inkişafına və Naxçıvanın gələcəyinə göstərdiyi davamlı diqqətin mühüm göstəricisidir.

Nərmin Azadova

“H.B.Zərdabi küç.96” (Azərbaycan Respublikası Səhiyyə Nazirliyinin İctimai Səhiyyə və İslahatlar Mərkəzi) ünvanı üzrə ərazi partiya təşkilatının sədr müavini