Naxçıvan yeni inkişaf mərhələsinə qədəm qoyur - ŞƏRH

Prezident İlham Əliyevin avqustun 11-də Naxçıvana səfəri və Azərbaycan Televiziyasına verdiyi müsahibə muxtar respublikanın gələcək inkişaf prioritetlərini bir daha ortaya qoydu. Səfər zamanı Naxçıvanın sosial-iqtisadi inkişafı, sənaye, enerji, nəqliyyat və təhlükəsizlik məsələləri ilə bağlı mühüm fikirlər səsləndirildi.

Prezidentin Naxçıvana 17-ci səfəri bir sıra mühüm layihələrin təməlqoyma və təqdimat mərasimləri ilə yadda qaldı. Son illərdə muxtar respublikada həyata keçirilən infrastruktur, sosial və iqtisadi layihələr Naxçıvanın inkişafına mühüm töhfə verib. Yol-nəqliyyat şəbəkəsinin yenilənməsi, yeni istehsal sahələrinin yaradılması və enerji təminatının gücləndirilməsi bu siyasətin əsas istiqamətlərindəndir.
Səfərin mühüm hadisələrindən biri Naxçıvan Sənaye Parkının təməlinin qoyulması oldu. Parkın yaradılması yeni istehsal müəssisələrinin fəaliyyətə başlamasına, investisiyaların cəlb edilməsinə və yeni iş yerlərinin açılmasına imkan verəcək. Bu layihə Naxçıvan iqtisadiyyatının şaxələndirilməsi baxımından da mühüm əhəmiyyət daşıyır.
Naxçıvanın gələcək inkişafında enerji təhlükəsizliyi də xüsusi yer tutur. Günəş və digər alternativ enerji layihələrinin həyata keçirilməsi enerji mənbələrinin şaxələndirilməsinə və dayanıqlı enerji sisteminin formalaşmasına xidmət edir. Bərpaolunan enerji sahəsində görülən işlər həm enerji təhlükəsizliyini gücləndirir, həm də sənaye və sahibkarlığın inkişafı üçün yeni imkanlar yaradır.
Muxtar respublikanın geostrateji mövqeyi təhlükəsizlik məsələlərinə də xüsusi diqqət yetirilməsini zəruri edir. Müdafiə potensialının gücləndirilməsi, hərbi infrastrukturun müasirləşdirilməsi və müasir texnika ilə təchizat Naxçıvanda təhlükəsizliyin təmin olunmasının əsas istiqamətlərindəndir.
Səfər zamanı diqqət çəkən mühüm məsələlərdən biri də Azərbaycanın əsas hissəsi ilə Naxçıvan arasında nəqliyyat bağlantısının yaradılmasıdır. Zəngəzur istiqamətində yol və dəmir yolu layihələrinin reallaşdırılması Naxçıvanın regional nəqliyyat və logistika imkanlarını genişləndirə bilər. Bu bağlantılar yükdaşımaların sürətlənməsinə, logistika xərclərinin azalmasına və Naxçıvanın Türkiyə və digər bazarlarla əlaqələrinin genişlənməsinə şərait yaradacaq.
Naxçıvanın inkişafında tarixi-mədəni irsin qorunması və turizm potensialının artırılması da mühüm yer tutur. Əcəmi Naxçıvaninin irsinin təbliği, tarixi abidələrin qorunması və şəhərin müasir görkəminin formalaşdırılması həm milli-mənəvi dəyərlərin yaşadılmasına, həm də turizmin inkişafına xidmət edir.
Beləliklə, Naxçıvanda həyata keçirilən sənaye, enerji, nəqliyyat, sosial və şəhərsalma layihələri vahid inkişaf strategiyasının tərkib hissəsidir. Qarşıdakı illərdə bu layihələrin davam etdirilməsi muxtar respublikanın iqtisadi potensialını artırmaqla yanaşı, onun Azərbaycanın və regionun mühüm iqtisadi-nəqliyyat məkanlarından birinə çevrilməsinə imkan verəcək.
Prezident İlham Əliyevin 11 avqust səfəri Naxçıvanın gələcək inkişaf istiqamətlərini müəyyənləşdirən mühüm hadisə kimi yadda qaldı.

Mahiyəddin Mazanov
Yeni Azərbaycan Partiyası Goranboy rayon təşkilatının əməkdaşı