Azərbaycan - Özbəkistan əlaqələrində dostluq və qardaşlıq - ŞƏRH

Azərbaycan Respublikası ilə Özbəkistan Respublikası arasında münasibətlər qədim tarixi, milli-mənəvi dəyərləri və qarşılıqlı hörmətə əsaslanan möhkəm dostluq əlaqələri ilə seçilir. İki qardaş ölkə arasında siyasi dialoqun yüksək səviyyədə olması Azərbaycan və Özbəkistanın xarici siyasətində mühüm istiqamətlərdən birini təşkil edir. Bu münasibətlər son illərdə dövlət başçıları arasında qarşılıqlı səfərlər, aparılan görüşlər və imzalanan mühüm sənədlər nəticəsində daha da inkişaf etmişdir.

Azərbaycan və Özbəkistanı birləşdirən əsas amillərdən biri xalqlarımızın ortaq tarixi və mədəni kökləridir. Hər iki xalq qədim və zəngin dövlətçilik ənənələrinə malikdir. Dil, din, mədəniyyət və adət-ənənələrimizdəki yaxınlıq xalqlarımız arasında qarşılıqlı rəğbətin daha da möhkəmlənməsinə şərait yaradır. Bu möhkəm təməl üzərində qurulan siyasi münasibətlər bu gün strateji xarakter daşıyan əməkdaşlıq səviyyəsinə yüksəlmişdir.

Azərbaycan Respublikasının Prezidenti İlham Əliyev ilə Özbəkistan Respublikasının Prezidenti Şavkat Mirziyoyev arasında qarşılıqlı etimad və səmimi dostluq münasibətləri dövlətlərarası əlaqələrin inkişafına mühüm töhfə verir. Liderlər arasında keçirilən görüşlər zamanı siyasi, iqtisadi, humanitar, nəqliyyat, enerji və digər sahələr üzrə əməkdaşlığın genişləndirilməsi məsələləri müzakirə olunur. Dövlət başçılarının qarşılıqlı səfərləri iki ölkənin münasibətlərinin yüksək səviyyəsinin bariz göstəricisidir.

Azərbaycan və Özbəkistan beynəlxalq və regional məsələlərdə də bir-birinin mövqelərinə hörmətlə yanaşır və qarşılıqlı dəstək nümayiş etdirirlər. Hər iki dövlət beynəlxalq hüququn prinsiplərinin qorunmasını, dövlətlərin ərazi bütövlüyünə və suverenliyinə hörmət edilməsini vacib hesab edir. Bu baxımdan Azərbaycan və Özbəkistan arasında siyasi dialoq yalnız ikitərəfli münasibətlər üçün deyil, bütövlükdə Mərkəzi Asiya və Cənubi Qafqaz regionlarında sabitliyin və əməkdaşlığın gücləndirilməsi baxımından da əhəmiyyətlidir.

İki ölkə arasında parlamentlərarası əlaqələr də siyasi dialoqun mühüm istiqamətlərindən biridir. Deputatların qarşılıqlı səfərləri, müxtəlif beynəlxalq tədbirlərdə birgə iştirakı və aparılan fikir mübadilələri Azərbaycan-Özbəkistan münasibətlərinin daha da dərinləşməsinə xidmət edir. Eyni zamanda, dövlət qurumları arasında əlaqələrin inkişafı əməkdaşlığın praktiki nəticələrinin artırılmasına imkan yaradır.

Azərbaycan və Özbəkistan arasında münasibətlərin mühüm istiqamətlərindən biri də iqtisadi əməkdaşlıqdır. Siyasi münasibətlərin yüksək səviyyədə olması iqtisadi əlaqələrin genişlənməsi üçün əlverişli şərait yaradır. Ticarət dövriyyəsinin artırılması, qarşılıqlı investisiyaların təşviqi, sənaye və kənd təsərrüfatı sahələrində birgə layihələrin həyata keçirilməsi iki ölkənin iqtisadi potensialının daha səmərəli şəkildə birləşdirilməsinə imkan verir.

Nəqliyyat sahəsində əməkdaşlıq da xüsusi əhəmiyyət daşıyır. Azərbaycan öz əlverişli coğrafi mövqeyindən istifadə edərək Şərq-Qərb və Şimal-Cənub nəqliyyat dəhlizlərinin inkişafına mühüm töhfə verir. Özbəkistanın da bu layihələrə marağı Mərkəzi Asiyanın dünya bazarlarına çıxış imkanlarının genişləndirilməsi baxımından mühüm əhəmiyyətə malikdir. Bakı-Tbilisi-Qars dəmir yolu, Ələt Beynəlxalq Dəniz Ticarət Limanı və digər regional nəqliyyat layihələri iki ölkə arasında əlaqələrin inkişafı üçün yeni imkanlar yaradır.

Humanitar və mədəni əlaqələr də Azərbaycan-Özbəkistan dostluğunun əsas dayaqlarındandır. Özbəkistanda Azərbaycan mədəniyyətinə, Azərbaycanda isə Özbəkistanın zəngin tarixinə və mədəniyyətinə böyük maraq vardır. Mədəniyyət günlərinin keçirilməsi, incəsənət kollektivlərinin qarşılıqlı səfərləri, alim və tələbə mübadilələri xalqlarımızın bir-birini daha yaxından tanımasına şərait yaradır.

Azərbaycanın Qarabağ və Şərqi Zəngəzurda həyata keçirdiyi genişmiqyaslı bərpa və quruculuq işlərində Özbəkistanın göstərdiyi dəstək də qardaşlıq münasibətlərinin nümunəsidir. Özbəkistanın Füzulidə məktəb tikintisi layihəsində iştirakı iki ölkə arasında dostluğun yalnız siyasi bəyanatlarla məhdudlaşmadığını, real layihələrdə də özünü göstərdiyini nümayiş etdirir.

Bu gün Azərbaycan və Özbəkistan münasibətləri qarşılıqlı etimad, hörmət və ortaq maraqlar üzərində inkişaf edir. Ölkələrimiz bir sıra beynəlxalq və regional təşkilatlar çərçivəsində də sıx əməkdaşlıq edir. Türk Dövlətləri Təşkilatında qarşılıqlı fəaliyyətin genişləndirilməsi türk dünyasında həmrəyliyin və əməkdaşlığın möhkəmlənməsinə mühüm töhfə verir.

Azərbaycan-Özbəkistan əlaqələrinin gələcək inkişaf perspektivləri də olduqca genişdir. Qarşılıqlı səfərlərin davam etdirilməsi, yeni sənədlərin imzalanması, siyasi məsləhətləşmələrin intensivləşdirilməsi və iqtisadi-humanitar layihələrin artırılması iki ölkə arasında strateji tərəfdaşlığın daha da möhkəmlənməsinə xidmət edəcəkdir.

Nəticə olaraq demək olar ki, Azərbaycan Respublikası ilə Özbəkistan Respublikası arasında siyasi dialoq çox yüksək səviyyədədir. Bu yüksək səviyyəli münasibətlər dövlət başçılarının siyasi iradəsi, xalqlarımızın tarixi və mədəni yaxınlığı, qarşılıqlı etimad və ümumi maraqlar əsasında formalaşmışdır. Azərbaycan və Özbəkistanın dostluğu və qardaşlığı gələcəkdə də möhkəmlənəcək, iki ölkə arasında əməkdaşlıq yeni sahələri əhatə edəcəkdir. Bu münasibətlər həm Azərbaycan və Özbəkistan xalqlarının rifahına, həm də regionda sülh, sabitlik və davamlı inkişafın təmin olunmasına mühüm töhfə verəcəkdir.

Ələmdar Cabbarov

YAP Ordubad rayon təşkilatının müavini