Azərbaycan–Özbəkistan: Türk dünyasında möhkəmlənən əməkdaşlıq - ŞƏRH

Azərbaycan və Özbəkistan arasında münasibətlər son illərdə yeni inkişaf mərhələsinə qədəm qoyub. Tarixi və mənəvi yaxınlığa əsaslanan əlaqələr bu gün siyasi, iqtisadi, nəqliyyat, təhsil, elm və mədəniyyət sahələrində genişlənərək iki qardaş ölkənin strateji tərəfdaşlığını daha da möhkəmləndirir.
Azərbaycan ilə Özbəkistan arasında münasibətlərin Türk Dövlətləri Təşkilatı çərçivəsində daha da inkişaf etdirilməsi iki ölkə arasında strateji tərəfdaşlığın möhkəmləndirilməsi baxımından xüsusi əhəmiyyət daşıyır. Eyni zamanda bu əməkdaşlıq Türk dövlətləri arasında əlaqələrin daha geniş və sistemli şəkildə inkişaf etdirilməsi üçün mühüm imkanlar yaradır.Son illərdə iki ölkə arasında siyasi münasibətlərin yüksək səviyyəyə çatması qarşılıqlı etimadın göstəricisidir. 2022-ci ildə strateji tərəfdaşlığın dərinləşdirilməsi haqqında Bəyannamənin, 2024-cü ildə isə müttəfiqlik münasibətləri haqqında Müqavilənin imzalanması Azərbaycan–Özbəkistan əlaqələrinin gələcək inkişafı üçün möhkəm hüquqi və siyasi baza formalaşdırıb.Əməkdaşlığın mühüm istiqamətlərindən biri iqtisadi əlaqələrdir. Sənaye, kənd təsərrüfatı, energetika, investisiya və digər sahələrdə birgə layihələrin genişləndirilməsi iki ölkənin iqtisadi potensialının daha səmərəli şəkildə birləşdirilməsinə imkan verir.
Bu prosesin Türk Dövlətləri Təşkilatı çərçivəsində genişlənməsi isə daha böyük iqtisadi məkanın formalaşmasına xidmət edə bilər.Nəqliyyat və logistika sahəsi də xüsusi əhəmiyyət daşıyır. Azərbaycanın Şərqlə Qərb arasında mühüm nəqliyyat bağlantılarına malik olması, Özbəkistanın isə Mərkəzi Asiyada mühüm mövqeyi Orta Dəhlizin inkişafını hər iki ölkə üçün perspektivli istiqamətə çevirir. Bu marşrutun imkanlarının genişləndirilməsi təkcə yükdaşımaların artması deyil, həm də yeni iqtisadi və regional əməkdaşlıq imkanlarının yaranması deməkdir.
Münasibətlərin başqa bir mühüm istiqaməti humanitar əlaqələrdir. Azərbaycan və Özbəkistan xalqlarını birləşdirən ortaq tarix, mədəniyyət və mənəvi dəyərlər iki ölkə arasında dostluğun ən möhkəm dayaqlarındandır. Təhsil, elm, mədəniyyət və gənclər arasında əlaqələrin genişləndirilməsi bu yaxınlığın gələcək nəsillərə ötürülməsi baxımından mühüm rol oynayır.Bu gün Türk Dövlətləri Təşkilatının qarşısında duran əsas vəzifələrdən biri ortaq potensialı real əməkdaşlığa çevirməkdir. Azərbaycan və Özbəkistanın bu prosesdə fəal iştirakı siyasi dialoqla yanaşı, iqtisadi əlaqələrin, nəqliyyat imkanlarının, elm və təhsil əməkdaşlığının inkişafına da yeni impuls verə bilər.
Nəticə etibarilə, Azərbaycan–Özbəkistan münasibətləri iki qardaş ölkənin əlaqələrindən daha geniş məna daşıyır. Bu münasibətlər Cənubi Qafqaz ilə Mərkəzi Asiya arasında əlaqələrin güclənməsinə, Türk dünyasında qarşılıqlı əməkdaşlığın dərinləşməsinə və ortaq imkanların daha səmərəli istifadəsinə xidmət edir.Bu baxımdan Azərbaycan və Özbəkistan arasında formalaşan strateji tərəfdaşlıq yalnız bu günün nailiyyəti deyil, həm də Türk dünyasının gələcək əməkdaşlıq mənzərəsinin mühüm istiqamətlərindən biridir.

Əlisoy Əli

YAP Şərur rayon təşkilatının fəal üzvü