Laçın mühüm beynəlxalq qovşağa çevrilir - ŞƏRH

Laçın Azərbaycanın coğrafi xəritəsində sadəcə bir rayon deyil. Bu bölgə tarixən ölkənin qərb sərhədlərinin təhlükəsizliyində, Qarabağla Şərqi Zəngəzur arasında əlaqələrin təmin edilməsində və regionun iqtisadi potensialının formalaşmasında mühüm rol oynayıb. Məhz buna görə Prezident İlham Əliyevin 31 iyul 2023-cü il tarixli Sərəncamı ilə 26 avqustun Laçın şəhəri günü elan edilməsi yalnız əlamətdar tarixin rəsmiləşdirilməsi deyil, həm də dövlətimizin bu şəhərin gələcəyinə verdiyi yüksək dəyərin ifadəsidir. Bu gün Laçın yeni inkişaf mərhələsinə qədəm qoyaraq təkcə Azərbaycanın deyil, bütövlükdə regionun strateji əhəmiyyət daşıyan məkanlarından birinə çevrilməkdədir.

Lakin bugünkü uğurlar heç də asan əldə olunmayıb. 1992-ci il mayın 18-də Ermənistan silahlı qüvvələrinin Laçını işğal etməsi rayonun tarixində ən faciəli səhifələrdən birini açdı. Minlərlə sakin öz doğma torpağından didərgin salındı, yüzlərlə insan həlak oldu və ya itkin düşdü. İşğal illərində yaşayış məntəqələri sistemli şəkildə dağıdıldı, məktəblər, səhiyyə müəssisələri, mədəniyyət ocaqları və inzibati binalar viran qoyuldu. Tarixi və dini abidələr vandalizmə məruz qaldı, zəngin meşələr və təbii ehtiyatlar qanunsuz istismar edildi. Ermənistan bununla kifayətlənməyərək beynəlxalq hüququn norma və prinsiplərini kobud şəkildə pozdu, yaşayış məntəqələrinin adlarını dəyişdirdi və qanunsuz məskunlaşdırma siyasəti həyata keçirdi. Bütün bunlar bir daha göstərirdi ki, məqsəd yalnız ərazini işğal altında saxlamaq deyil, həm də həmin torpaqların tarixi kimliyini dəyişdirmək idi.

Azərbaycan Ordusunun qazandığı möhtəşəm Zəfər bu planları birdəfəlik puça çıxardı. 2020-ci ilin sonunda Laçın rayonu Azərbaycana qaytarıldı, 2022-ci il avqustun 26-da isə Laçın şəhəri, Zabux və Sus kəndləri tam nəzarətə götürüldü. Bununla bölgədə tamamilə yeni mərhələ başlandı. Dövlət qarşısında duran əsas vəzifə azad olunmuş torpaqları əvvəlki vəziyyətinə qaytarmaq yox, onları müasir inkişaf standartlarına uyğun şəkildə yenidən qurmaq idi. Bu məqsədlə həyata keçirilən layihələr Laçının uzunmüddətli inkişaf strategiyasının əsas sütunlarını təşkil edir.

Həmin layihələrin sırasında yol-nəqliyyat infrastrukturu xüsusi yer tutur. İnşası davam edən Kəlbəcər–Laçın avtomobil yolu mühəndislik baxımından ölkənin ən mürəkkəb layihələrindən hesab olunur. Yeni yol mövcud marşrutdan daha qısa olmaqla yanaşı, iki, üç və dörd hərəkət zolağından ibarət olacaq, üzərində çoxsaylı tunel və körpülər inşa edilir. Bu magistral yalnız nəqliyyat rahatlığını artırmayacaq. O, Qarabağ və Şərqi Zəngəzur arasında iqtisadi əlaqələri gücləndirəcək, yük və sərnişin daşımalarının sürətini yüksəldəcək, regionun sosial-iqtisadi inkişafına əlavə təkan verəcək.

Laçının beynəlxalq əhəmiyyətini artıran ən mühüm layihələrdən biri də Laçın Beynəlxalq Hava Limanıdır. Qorçu kəndi yaxınlığında, dəniz səviyyəsindən təxminən 1700 metr yüksəklikdə inşa edilən bu aeroport Azərbaycanın ən yüksəkdə yerləşən hava limanıdır. Müasir standartlara uyğun tikilmiş uçuş-enmə zolağı və terminal kompleksi istənilən tip hava gəmisini qəbul etmək imkanına malikdir. Laçın, Şuşa və Kəlbəcərə yaxın məsafədə yerləşməsi isə hava limanını təkcə nəqliyyat obyekti deyil, bütövlükdə regionun iqtisadi, turizm və logistika imkanlarını genişləndirən strateji mərkəzə çevirir. Bu layihə Azərbaycanın azad edilmiş əraziləri qısa müddətdə beynəlxalq nəqliyyat şəbəkəsinə inteqrasiya etmək əzmindən xəbər verir.

Bu gün Laçında həyata keçirilən hər bir layihə gələcəyə hesablanmış dövlət siyasətinin nəticəsidir. Burada yaradılan yeni infrastruktur göstərir ki, Azərbaycan işğalın qoyduğu dağıntıları sadəcə aradan qaldırmır, eyni zamanda bölgəni regionun ən müasir inkişaf məkanlarından birinə çevirir. Laçının yenidən qurulan yolları, hava limanı və genişlənən iqtisadi imkanları ölkəmizin güclü dövlət idarəçiliyinin, məqsədyönlü siyasətinin və qalib xalq iradəsinin bariz təzahürüdür. Məhz buna görə 26 avqust – Laçın şəhəri günü keçmişə ehtiramın, bu günün qürurunun və gələcəyə inamın birləşdiyi əlamətdar tarix kimi xüsusi məna daşıyır.

Rüstəm Nağıyev,

YAP Gədəbəy rayon təşkilatının sədri