26 Avqust - Laçın Şəhəri Günü: “Tarixi ədalətin təntənəsi” mövzusunda tədbir keçirilib

“Şəhərsalma və Memarlıq İli” çərçivəsində avqustun 26-da Yeni Azərbaycan Partiyası (YAP) Laçın rayon təşkilatında 26 Avqust - Laçın Şəhəri Gününə həsr olunmuş “Tarixi ədalətin təntənəsi” mövzusunda tədbir keçirilib.

Tədbir Azərbaycan Respublikasının Dövlət Himninin səsləndirilməsi ilə başlayıb. Sonra Ümummilli Lider Heydər Əliyevin və Azərbaycanın ərazi bütövlüyü, suverenliyi uğrunda canlarından keçmiş şəhidlərin əziz xatirəsi bir dəqiqəlik sükutla yad edilib.
Ardınca Laçın şəhərinin müasir yanaşmalar əsasında yenidən qurulan yaşayış məntəqəsi kimi Böyük Qayıdışın, dayanıqlı inkişafın və genişmiqyaslı quruculuq prosesinin təcəssümünə həsr olunmuş videoçarx nümayiş etdirilib.
Tədbiri giriş sözü ilə açan YAP Laçın rayon təşkilatı sədrinin müavini Şamo Qasımov iştirakçıları 26 Avqust - Laçın Şəhəri Günü münasibətilə təbrik edib. O qeyd edib ki, bu gün ölkəmizdə böyük qürur hissi ilə qeyd olunur.
Şamo Qasımov bildirib ki, Azərbaycanın döyüş meydanında qazandığı böyük Zəfər siyasi müstəvidə də öz təsdiqini tapıb. Ordusu darmadağın edilən və kapitulyasiya aktını imzalamağa məcbur olan Ermənistan Ağdam, Kəlbəcər və Laçın rayonlarından öz qoşunlarını çıxarmağa məcbur olub. Laçın rayonu 2020-ci il dekabrın 1-də işğaldan azad olunaraq Azərbaycan Silahlı Qüvvələrinin nəzarətinə keçib. 2022-ci il avqustun 26-da Laçın şəhəri, Zabux və Sus kəndləri Azərbaycan Ordusunun nəzarətinə götürülüb. Bununla da Laçının işğalına tamamilə son qoyulub. Azərbaycan Prezidenti İlham Əliyevin 31 iyul 2023-cü il tarixli Sərəncamına əsasən, hər il avqustun 26-sı Laçın Şəhəri Günü kimi qeyd olunur.
“Uzun illər həsrətində olduğumuz Laçın bu gün azaddır, bərpa olunur və sürətlə inkişaf edir. Bu torpaqların azad olunması Azərbaycan xalqının birliyinin, güclü dövlətin və qətiyyətli liderliyin bariz nümunəsidir. Ümummilli Lider Heydər Əliyev Laçının strateji əhəmiyyətini yüksək qiymətləndirərək bildirirdi ki, bu rayon Azərbaycanın müstəqilliyi və ərazi bütövlüyü baxımından xüsusi önəm daşıyır. Bu baxış bu gün də öz təsdiqini tapır. 1992-ci ildə işğal nəticəsində dağıdılan Laçın bu gün yenidən qurulur, öz əsl sahiblərinə qovuşur. Müzəffər Ali Baş Komandan, Prezident İlham Əliyevin rəhbərliyi ilə əldə olunan tarixi qələbə Ulu Öndərin siyasətinin məntiqi davamıdır. Bu gün Prezident İlham Əliyev tərəfindən bu siyasi kurs uğurla davam etdirilir və Azərbaycan daha da güclənir, beynəlxalq arenada mövqelərini möhkəmləndirir”, - deyə sədr müavini vurğulayıb.
Laçın Rayon İcra Hakimiyyəti başçısı Aparatının Ərazi-təşkilat və ictimai-siyasi məsələlər şöbəsinin müdirinin müavini – Ərazi-təşkilat məsələləri sektorunun müdiri Cabir Əvəzzadə çıxışında bildirib ki, 26 Avqust - Laçın Şəhəri Günü xalqımızın tarixi yaddaşında qürur və şərəf səhifəsi kimi əbədi yaşayacaq.
O qeyd edib ki, Laçının işğaldan azad olunması tarixi ədalətin bərpası, xalqımızın iradəsinin və milli birliyinin təntənəsidir. Bu gün doğma şəhərimizdə aparılan genişmiqyaslı quruculuq işləri Böyük Qayıdışın uğurla həyata keçirildiyini əyani şəkildə nümayiş etdirir. Yenidən qurulan yollar, yaşayış məhəllələri, məktəblər və digər sosial obyektlər Laçının müasir simasını formalaşdırır.
Onun sözlərinə görə, Laçın təkcə strateji əhəmiyyətə malik ərazi deyil, həm də Azərbaycanın ən dilbər guşələrindən biridir. Böyük turizm potensialına malik rayonun zəngin təbiəti, unikal iqlimi və relyefi onu xüsusilə cazibədar edir.
Cabir Əvəzzadə qeyd edib ki, bu gün Azərbaycan Respublikasının Birinci vitse-prezidenti Mehriban Əliyevanın doğum günüdür. O, Mehriban Əliyevanı Laçın rayonunun sakinləri adından ürəkdən təbrik edib, ona uzun ömür, möhkəm cansağlığı və fəaliyyətində yeni uğurlar arzulayıb.
Laçın rayonu Habil Həsənov adına Mişni kənd tam orta ümumtəhsil məktəbinin direktoru Qurban Həsənov bildirib ki, Laçın şəhərində əhalinin istirahətinin səmərəli təşkili istiqamətində də mühüm tədbirlər həyata keçirilir. Şəhərdə istehsal, xidmət və tədris müəssisələrinin yaradılması, yeni iş yerlərinin açılması və əhalinin məşğulluğunun təmin olunması diqqət mərkəzində saxlanılır.
Q. Həsənov qeyd edib ki, işğaldan azad edilmiş ərazilərimizin inkişafını daim xüsusi diqqətdə saxlayan Prezident İlham Əliyev Laçın rayonuna dəfələrlə səfər edib, açılış və təməlqoyma mərasimlərində iştirak edib, həyata keçirilən layihələr və aparılan quruculuq işlərinin gedişi ilə tanış olub.
Vətən müharibəsi qazisi Fəxri Əliyev çıxışında bildirib ki, 44 günlük Vətən müharibəsində xalqımızın nümayiş etdirdiyi birlik, Azərbaycan Ordusunun qəhrəmanlığı və Müzəffər Ali Baş Komandan İlham Əliyevin qətiyyətli siyasəti nəticəsində torpaqlarımız işğaldan azad edilib.
O vurğulayıb ki, bu möhtəşəm Qələbə xalqımızın tarixi ədaləti bərpa etmək əzminin təntənəsinə çevrilib. Bu gün azad Qarabağda və Şərqi Zəngəzurda dalğalanan üçrəngli Dövlət Bayrağımız hər bir azərbaycanlı üçün qürur mənbəyidir. Şəhidlərimizin əziz xatirəsi daim ehtiramla yad olunur, qazilərimizin qəhrəmanlığı yüksək qiymətləndirilir. Şanlı Zəfərimiz əbədi yaşayacaq.
Laçın Rayon İcra Hakimiyyəti başçısının Təzəkənd kənd inzibati ərazi dairəsi üzrə nümayəndəsi Həsən Sövzəliyev qeyd edib ki, Zəfər salnaməsinə bir-birindən möhtəşəm səhifələr yazan Azərbaycan 2022-ci il avqustun 26-da daha bir qürurverici və əlamətdar hadisəyə imza atıb. Həmin gün Azərbaycan Ordusu Laçın şəhərinə yerləşib, Zabux və Sus kəndləri nəzarətə götürülüb. Bununla da mühüm strateji əhəmiyyətə malik Laçın diyarının işğalına tamamilə son qoyulub.
Tədbir Yeni Azərbaycan Partiyasının Himninin səsləndirilməsi ilə başa çatıb.