26 Avqust – Laçın Şəhəri Günü: Zəfərdən dirçəlişə uzanan yol - ŞƏRH

26 Avqust Azərbaycan xalqının yaddaşında dövlətçilik tariximizin mühüm səhifələrindən biri kimi xüsusi yer tutur. Laçın şəhərinin 2022-ci il avqustun 26-da Azərbaycanın nəzarətinə qaytarılması 44 günlük Vətən müharibəsində qazanılan möhtəşəm Zəfərin davamı olaraq ölkəmizin ərazi bütövlüyünün təmin edilməsi istiqamətində atılmış mühüm addımlardan biri oldu. Həmin gün Laçınla yanaşı, Zabux və Sus kəndlərinin də Azərbaycanın nəzarətinə keçməsi xalqımızın uzun illər ərzində gözlədiyi tarixi ədalətin bərpasını bir daha nümayiş etdirdi.

Laçının azadlığı Azərbaycan dövlətinin ardıcıl və məqsədyönlü siyasətinin, Prezident, Müzəffər Ali Baş Komandan İlham Əliyevin qətiyyətli rəhbərliyinin və Azərbaycan Ordusunun yüksək peşəkarlığının nəticəsi idi. İşğal illərində ağır dağıntılara məruz qalan Laçın şəhərinin yenidən Azərbaycanın tərkibində olması yalnız hərbi-siyasi baxımdan deyil, mənəvi cəhətdən də böyük əhəmiyyət daşıyır. Prezident İlham Əliyevin Laçın şəhərində Azərbaycan Bayrağını ucaltması və burada səsləndirdiyi mesajlar dövlətimizin bu ərazilərlə bağlı mövqeyinin dəyişməz və qəti olduğunu bütün dünyaya göstərdi.
Laçının azad edilməsindən sonra qarşıya qoyulan əsas məqsədlərdən biri şəhərin və rayonun qısa müddətdə yenidən qurulması, burada dayanıqlı həyat şəraitinin yaradılması oldu. Dövlət tərəfindən həyata keçirilən genişmiqyaslı layihələr nəticəsində Laçında müasir şəhər infrastrukturu formalaşdırılır. Yeni yaşayış komplekslərinin, məktəblərin, tibb müəssisələrinin, sosial obyektlərin və digər infrastruktur layihələrinin yaradılması doğma yurdlarına qayıdan sakinlərin rahat və təhlükəsiz yaşayışını təmin edir.
Laçında aparılan quruculuq işləri öz miqyası və yanaşması ilə xüsusi diqqət çəkir. Şəhərin təbii gözəllikləri və özünəməxsus siması qorunmaqla müasir şəhərsalma prinsipləri tətbiq olunur. Bərpa prosesində ekoloji tarazlığın qorunması, alternativ və yaşıl enerji mənbələrindən istifadə, müasir texnologiyaların tətbiqi əsas istiqamətlərdəndir. Laçın Beynəlxalq Hava Limanının fəaliyyətə başlaması, yeni avtomobil yollarının və tunellərin inşası isə rayonun ölkənin digər bölgələri ilə nəqliyyat əlaqələrini daha da gücləndirib.
Bu gün Laçında yalnız tikinti və abadlıq işləri aparılmır, eyni zamanda iqtisadi və sosial həyatın yenidən canlandırılması istiqamətində mühüm addımlar atılır. Sənaye, kənd təsərrüfatı, turizm və xidmət sahələrinin inkişafı üçün yaradılan imkanlar rayonun gələcək iqtisadi potensialının formalaşmasına xidmət edir. Ən böyük uğurlardan biri isə uzun illər doğma torpaqlarından ayrı düşmüş insanların mərhələli şəkildə Laçına qayıtmasıdır. Doğma evlərində yenidən həyatın başlaması Böyük Qayıdış prosesinin ən təsirli nümunələrindən biridir.
Laçının bugünkü mənzərəsi Azərbaycanın işğaldan azad edilmiş ərazilərində həyata keçirdiyi bərpa siyasətinin real nəticələrini nümayiş etdirir. Bir zamanlar dağıntılar içində olan ərazilərdə bu gün yeni yaşayış məkanları, yollar, sosial obyektlər və müasir infrastrukturlar yaradılır. Küçələrdə həyatın canlanması, uşaqların səsinin eşidilməsi və insanların doğma yurdlarında yenidən məskunlaşması Laçının yeni tarixinin ən böyük göstəricilərindəndir.
26 Avqust – Laçın Şəhəri Günü yalnız bir şəhərin azad edilməsini xatırladan tarix deyil. Bu gün milli iradənin, dövlət qüdrətinin, ərazi bütövlüyümüzün və Böyük Qayıdışın simvoludur. Laçının bu günkü inkişafı göstərir ki, Azərbaycan xalqı öz torpaqlarını yalnız azad etməklə kifayətlənmir, həmin əraziləri yenidən qurur, canlandırır və gələcək nəsillər üçün daha firavan həyata hazırlayır.
Laçının dağlarında dalğalanan Azərbaycan Bayrağı bu gün həm Zəfərimizin, həm də quruculuq əzminin rəmzidir. 26 Avqust bundan sonra da xalqımızın yaddaşında qürur, sevinc və doğma torpaqlara qayıdışın rəmzi kimi yaşayacaqdır.

Fərid Nağıyev
YAP Babək rayon təşkilatının fəal üzvü