Azərbaycan parlaq nailiyyətlər qazanır, milli gücümüz günbəgün artır

Sentyabrın 10-da Yeni Azərbaycan Partiyası (YAP) Şəmkir rayon təşkilatının X konfransı keçirilib. Əvvəlcə xalqımızın Ümummilli Lideri Heydər Əliyevin abidəsi ziyarət edilib, abidənin önünə gül dəstələri düzülüb.

Tədbirdə Ulu Öndər Heydər Əliyevin, ölkəmizin ərazi bütövlüyü və suverenliyi uğrunda canlarından keçmiş şəhidlərin xatirəsi bir dəqiqəlik sükutla anılıb. Azərbaycan Respublikasının Dövlət Himni səsləndirilib.

Konfransda YAP Şəmkir rayon təşkilatının sədri Zamir Güvəndiyev hesabat məruzəsi ilə çıxış edib. Qeyd olunub ki, YAP Şəmkir rayon təşkilatının fəaliyyəti partiyanın qarşıya qoyduğu vəzifələrə uyğun olaraq təşkilati işin gücləndirilməsi, üzvlərin fəallığının artırılması və ictimai-siyasi proseslərdə iştirakın genişləndirilməsi istiqamətində qurulub. "Təşkilat hesabat dövründə qarşıya qoyulan vəzifələri layiqincə yerinə yetirməyə çalışıb. Fəaliyyətimizdə ideya və əqidə birliyi, partiya üzvlərinin nizam-intizamı xüsusi diqqət mərkəzində saxlanılır", - deyə Z.Güvəndiyev söyləyib.

Çıxış edən Şəmkir Rayon İcra Hakimiyyətinin başçısı Rəşad Tağıyev bildirib ki, Azərbaycanın ən güclü və mütəşəkkil siyasi qüvvəsi olan Yeni Azərbaycan Partiyasının möhtəşəmliyinin bariz təzahürü onun milli maraqların ifadəçisi olmasıdır: "Partiyanın keçdiyi şərəfli yol xalq-iqtidar birliyinin möhkəm təmələ əsaslandığını və sarsılmaz olduğunu təsdiqləyir. Bu gün müstəqil dövlətimizi uğurlu inkişafa aparan bu yolda Azərbaycan vətəndaşları Prezident, Yeni Azərbaycan Partiyasının Sədri İlham Əliyevin siyasi kursunu dəstəkləyir və böyük əzmlə dövlətin, xalqın, vətənin mənafeyi naminə səy göstərirlər. Bu istiqamətdə əldə olunan nailiyyətlərdə, YAP Şəmkir rayon təşkilatının da özünəməxsus rolu var".

Milli Məclisin deputatı Nurlan Həsənov çıxışında qeyd edib ki, Yeni Azərbaycan Partiyası fəaliyyətində ölkəmizin müstəqilliyinin, ərazi bütövlüyünün qorunması, beynəlxalq aləmdə layiqli yer tutması kimi əsas milli prioritetlər istiqamətində qurmaqla cəmiyyətdə yüksək nüfuza malikdir: "Azərbaycan parlaq nailiyyətlər qazanır, milli gücümüz günbəgün artır. Gələcəyə doğru inamla irəliləyən Yeni Azərbaycan Partiyası Prezident İlham Əliyevin rəhbərliyi ilə ölkəmizin daha da qüdrətlənməsi istiqamətində ciddi səylər göstərir. Əldə olunan uğurların siyasi müstəvidə möhkəmləndirilməsində Yeni Azərbaycan Partiyasının mühüm xidmətləri var".

Çıxış edən Gənclər və İdman Sektoru ərazi partiya təşkilatının sədri Pərvin Gözəlov, partiya fəalı Elvira Allahverdiyeva və Yeni-Həyat kənd ərazi partiya təşkilatının sədri Qətibə Məmmədova təşkilatın hesabat dövründəki fəaliyyətini müsbət dəyərləndiriblər.

Konfransda çıxış edən YAP Mərkəzi Aparatının Təşkilat şöbəsinin baş məsləhətçisi Araz Salmanov bildirib ki, Yeni Azərbaycan Partiyası bu günədək xalqın və dövlətimizin taleyində mühüm rol oynayıb və Azərbaycanın güclü dövlət kimi təşəkkül tapmasında böyük xidmətlər göstərib: "Bu gün partiyamızın gücü Ulu Öndər Heydər Əliyev ideyalarından və Prezident İlham Əliyevin uğurlu siyasətindən qaynaqlanır. Prezident İlham Əliyev ölkəmizin nüfuzunu artırmaqla onu dünyada müstəqil xarici siyasət yürüdən dövlət və etibarlı tərəfdaş kimi tanıdıb. Tarixi Zəfərimizdən sonra yaranmış yeni reallıqlar fonunda Azərbaycan dövləti Liderimiz İlham Əliyevin rəhbərliyi ilə parlaq gələcəyə doğru daha inamla irəliləməkdədir".

Konfransda rayon təşkilatının hesabat dövründəki fəaliyyəti qənaətbəxş hesab edilib və YAP-ın VIII qurultayına nümayəndələr seçilib.

Tədbirin sonunda Yeni Azərbaycan Partiyasının Himni səsləndirilib.