Azərbaycanın tərəqqi yolu yeni uğurlarla davam edir

Sentyabrın 14-də Yeni Azərbaycan Partiyası (YAP) Qəbələ rayon təşkilatının XI konfransı keçirilib.Əvvəlcə xalqımızın Ümummilli Lideri Heydər Əliyevin abidəsi ziyarət edilib, önünə gül dəstələri düzülüb.

Tədbirdə Ulu Öndər Heydər Əliyevin, ölkəmizin ərazi bütövlüyü və suverenliyi uğrunda canlarından keçmiş şəhidlərin xatirəsi bir dəqiqəlik sükutla anılıb. Azərbaycan Respublikasının Dövlət Himni səsləndirilib.
Konfransda YAP Qəbələ rayon təşkilatının sədri Abil Ağasəfov hesabat məruzəsi ilə çıxış edib. O bildirib ki, 2021-ci ildə keçirilən VII qurultay partiyanın müasir çağırışlara uyğun fəaliyyətinin daha da gücləndirilməsi baxımından mühüm mərhələ olub. YAP Qəbələ rayon təşkilatı da bu siyasi kursun həyata keçirilməsinə töhfə vermək məqsədilə fəaliyyətini ardıcıl şəkildə gücləndirib. Partiya üzvləri ilə işin təşkili, maarifləndirici tədbirlərin keçirilməsi və sosial layihələrin həyata keçirilməsi əsas fəaliyyət istiqamətlərini təşkil edir.
Qəbələ Rayon İcra Hakimiyyətinin başçısı Səbuhi Abdullayev Yeni Azərbaycan Partiyasının ölkənin ictimai-siyasi həyatında mühüm rol oynadığını və cəmiyyətin müxtəlif təbəqələrini öz ətrafında birləşdirdiyini qeyd edib. O bildirib ki, rayonda həyata keçirilən sosial-iqtisadi layihələr, abadlıq və quruculuq tədbirləri, eləcə də əhalinin sosial rifahının yüksəldilməsi istiqamətində görülən işlər rayonun inkişafına və vətəndaşların gündəlik həyat şəraitinin yaxşılaşdırılmasına mühüm töhfə verir.
Milli Məclisin deputatı Eyvaz Qurbanov qeyd edib ki, Yeni Azərbaycan Partiyasının yaradılması müasir müstəqil Azərbaycanın şanlı siyasi tarixinin mühüm səhifələrindən birini təşkil edir. O vurğulayıb ki, yarandığı gündən etibarən YAP ölkənin ictimai-siyasi həyatında mühüm rol oynamaqla yanaşı, bu gün təkcə Azərbaycanın deyil, regionun nüfuzlu siyasi təşkilatlarından biri kimi fəaliyyət göstərir.
YAP Mərkəzi Aparatının Təşkilat şöbəsinin baş məsləhətçisi Xaqani Tağıyev Yeni Azərbaycan Partiyasının VII qurultayından sonra görülən işlərdən danışıb. Qeyd edib ki, YAP Qəbələ rayon təşkilatı ərazi partiya təşkilatları ilə əlaqələrin daha da genişləndirilməsi, qarşılıqlı fəaliyyətin gücləndirilməsi və işin səmərəli təşkili istiqamətində məqsədyönlü tədbirlər həyata keçirir.
Daha sonra Təhsil işçiləri ərazi partiya təşkilatının sədri Arifə Bayramova, Səhiyyə işçiləri ərazi partiya təşkilatının sədri Ceyhun Əhmədov, Qəbələ Dövlət Peşə Təhsil Mərkəzi ərazi partiya təşkilatının sədri Reyhan Məmmədova, Vətən müharibəsi qazisi, Bunud ərazi partiya təşkilatının sədri Müşfiq Paşayev, partiya veteranı Azad Məmmədov, şəhid atası Cəlil Səfərçinov çıxış ediblər.
Konfransda YAP Qəbələ rayon təşkilatının hesabat dövründəki fəaliyyəti qənaətbəxş qiymətləndirilib və Yeni Azərbaycan Partiyasının VIII qurultayına nümayəndələr seçilib.
Sonda Yeni Azərbaycan Partiyasının Himni səsləndirilib.