YAP Yardımlı rayon təşkilatının XI konfransı keçirilib

Sentyabrın 15-də Yeni Azərbaycan Partiyası (YAP) Yardımlı rayon təşkilatının XI konfransı keçirilib.

Əvvəlcə xalqımızın Ümummilli Lideri Heydər Əliyevin abidəsi ziyarət edilib, önünə gül dəstələri düzülüb.

Tədbirdə Ulu Öndər Heydər Əliyevin, ölkəmizin ərazi bütövlüyü və suverenliyi uğrunda canlarından keçmiş şəhidlərin xatirəsi bir dəqiqəlik sükutla anılıb. Azərbaycan Respublikasının Dövlət Himni səsləndirilib.

Konfransda YAP Yardımlı rayon təşkilatının sədri Anar Alışov hesabat məruzəsi ilə çıxış edib. Qeyd olunub ki, hesabat dövründə təşkilat qarşıya qoyulmuş vəzifələrin icrası istiqamətində məqsədyönlü fəaliyyət göstərib, rayonun ictimai-siyasi həyatında fəal iştirak edib. Bildirilib ki, partiya üzvlərinin ictimai-siyasi fəallığının artırılması, ideoloji işin gücləndirilməsi və partiyanın əsas prinsiplərinin təbliği istiqamətində ardıcıl və səmərəli tədbirlər həyata keçirilib.

Milli Məclisinin deputatı Məşhur Məmmədov Prezident, Yeni Azərbaycan Partiyasının Sədri İlham Əliyevin rəhbərliyi ilə ölkəmizdə əldə olunan uğurlardan, Azərbaycan xalqının rifahının daha da yaxşılaşdırılması istiqamətində yürüdülən siyasətin nəticələrindən danışıb. O qeyd edib ki, Yeni Azərbaycan Partiyası ötən illər ərzində ölkənin ictimai-siyasi həyatında fəal iştirak edib, Azərbaycanın inkişafına və mühüm nailiyyətlər əldə etməsinə öz töhfəsini verib.

Daha sonra Yardımlı Rayon Heydər Əliyev Mərkəzinin baş fond mühafizi - direktor vəzifəsini müvəqqəti icra edən Zeynəb Məmişzadə, Şiləvəngə ərazi partiya təşkilatının sədri, Gavran kənd tam orta ümumtəhsil məktəbinin müəllimi Fərman Mustafayev ərazi partiya təşkilatlarının fəaliyyətindən, partiya üzvlərinin rayonun ictimai-siyasi həyatında fəal iştirakından söz açıblar.

YAP Mərkəzi Aparatının Təşkilat şöbəsinin baş məsləhətçisi Əli Axundov Yeni Azərbaycan Partiyasının VII qurultayından sonra fəaliyyətin daha səmərəli qurulması istiqamətində görülən işlərdən danışıb, rayon təşkilatının işini müsbət dəyərləndirib.

Konfransda YAP Yardımlı rayon təşkilatının hesabat dövrü ərzindəki fəaliyyəti qənaətbəxş qiymətləndirilib və Yeni Azərbaycan Partiyasının VIII qurultayına nümayəndələr seçilib.

Sonda Yeni Azərbaycan Partiyasının Himni səsləndirilib.