Tarixi Zəfərdən Böyük Qayıdışa

20 sentyabr Azərbaycan tarixində dövlətçilik və milli yaddaş baxımından xüsusi əhəmiyyət daşıyan günlərdən biridir. Bu tarix Xankəndi, Xocalı, Xocavənd və Ağdərə şəhərlərinin həyatında yeni mərhələnin başlanmasını ifadə etməklə yanaşı, Azərbaycanın dövlət suverenliyinin tam bərpası ilə bağlı mühüm tarixi hadisələri özündə əks etdirir.

Bu şəhərlərin hər biri Qarabağın tarixində özünəməxsus yerə malikdir. Uzun illər davam edən işğal nəticəsində bu ərazilərdə həyatın normal axarı pozulmuş, yaşayış məntəqələri dağıdılmış, insanlar doğma yurdlarından didərgin salınmışdır. Xüsusilə Xocalı faciəsi xalqımızın yaddaşında silinməz iz buraxıb. Bu ağrılı hadisə illər ərzində hər bir azərbaycanlının qəlbində yaşayıb. 2020-ci ildə Azərbaycanın Vətən müharibəsində qazandığı tarixi Zəfər Qarabağın taleyində yeni səhifə açdı. Müzəffər Azərbaycan Ordusunun qəhrəmanlığı və dövlətimizin qətiyyətli siyasəti nəticəsində işğal altında olan ərazilərimizin böyük hissəsi azad edildi. 2023-cü ilin sentyabrında həyata keçirilən lokal xarakterli antiterror tədbirləri ilə isə Azərbaycanın bütün ərazisində dövlət suverenliyi tam bərpa olundu. 20 sentyabr məhz bu baxımdan xüsusi məna daşıyır. Bu tarix Xankəndi, Xocalı, Xocavənd və Ağdərə şəhərlərinin Azərbaycanın ayrılmaz tərkib hissəsi kimi yeni inkişaf mərhələsinə qədəm qoymasını simvolizə edir. Bu gün həmin ərazilərdə bərpa və quruculuq işləri geniş vüsət alıb, yeni infrastruktur yaradılır, insanların doğma torpaqlarına qayıdışı təmin olunur.

Qarabağda həyata keçirilən Böyük Qayıdış prosesi yalnız şəhər və kəndlərin yenidən qurulması deyil, uzun illər doğma yurd həsrəti ilə yaşayan insanların həyatlarının yenidən canlandırılmasıdır. İnsanların öz evlərinə, doğulduqları torpaqlara qayıtması bu prosesin ən böyük mənəvi nəticəsidir. Xocalıda, eləcə də Qarabağın digər yaşayış məntəqələrində həyatın yenidən bərpa olunması gələcəyə olan inamı daha da gücləndirir. Xankəndi, Xocalı, Xocavənd və Ağdərənin gələcək inkişafı Qarabağın ümumi dirçəliş prosesinin mühüm istiqamətlərindən biridir. Bu şəhərlərin müasir standartlara uyğun şəkildə yenidən qurulması, sosial və iqtisadi imkanlarının genişləndirilməsi qarşıda duran əsas vəzifələrdəndir. Qarabağda yaradılan yeni infrastruktur və həyata keçirilən layihələr bu ərazilərin ölkənin inkişafında mühüm rol oynayacağına əsas verir.

20 sentyabr həm də Azərbaycanın ərazi bütövlüyü və suverenliyi uğrunda canından keçmiş şəhidlərimizin əziz xatirəsini ehtiramla yad etdiyimiz gündür. Bu gün əldə olunan tarixi nəticələrin arxasında şəhidlərimizin müqəddəs qanı, qazilərimizin fədakarlığı və Azərbaycan Ordusunun qəhrəmanlığı dayanır. Onların göstərdiyi şücaət gələcək nəsillər üçün daim örnək olacaq. Bu baxımdan 20 sentyabr keçmişi xatırlamaqla yanaşı, gələcəyə baxmaq üçün də əlamətdar gündür. Xankəndi, Xocalı, Xocavənd və Ağdərə bu gün Azərbaycanın suverenliyinin, Qarabağda qurulan yeni həyatın və Böyük Qayıdışın rəmzlərindən birinə çevrilir. Bu şəhərlərin günü xalqımızın yaddaşında mühüm bir tarix kimi yaşayacaq. Çünki 20 sentyabr Azərbaycanın öz ərazi bütövlüyünü və dövlət suverenliyini tam təmin etməsi, Qarabağda yeni həyatın başlanması və gələcəyə inamla addımlanması baxımından xüsusi əhəmiyyət daşıyır.

Rövşən Əhmədov

YAP Ağcabədi rayon təşkilatının sədri