İslam həmrəyliyi və insan qardaşlığı Azərbaycanın dövlət siyasətinin mühüm istiqamətlərindəndir - ŞƏRH

Azərbaycan Respublikasının Prezidenti Cənab İlham Əliyev Türk Dövlətləri Təşkilatının Müsəlman Dini İdarə Rəhbərləri Şurasının üzvləri və müşahidəçilərindən, Yəhya Bakuvi Beynəlxalq Konfransının həmtəşkilatçılarından və Qafqaz Xalqları Ali Dini Şurasının üzvlərindən ibarət nümayəndə heyətini qəbul edib.

Görüş zamanı Azərbaycan Prezidentinin çıxışında ölkəmizin İslam dünyası ilə əlaqələri, dini-mədəni irsin qorunması, beynəlxalq həmrəyliyin möhkəmləndirilməsi, sülh və qarşılıqlı anlaşmanın təşviqi, eləcə də Qarabağ və Şərqi Zəngəzurda həyata keçirilən genişmiqyaslı bərpa-quruculuq işləri ilə bağlı mühüm fikirlər səsləndirilib.
Prezident İlham Əliyev qeyd edib ki, bu gün Bakının mühüm beynəlxalq dini və mədəni tədbirlərə ev sahibliyi etməsi Azərbaycanın İslam dünyası ilə əlaqələrinin inkişafının göstəricilərindən biridir. Türk Dövlətləri Təşkilatının Müsəlman Dini Liderləri Şurasının toplantısının və Yəhya Bakuvi Beynəlxalq Konfransının Bakıda keçirilməsi də bu baxımdan xüsusi əhəmiyyət daşıyır.
Prezident İlham Əliyevin çıxışında diqqət çəkən mühüm məqamlardan biri də gələn il Bakıda İslam Əməkdaşlıq Təşkilatının Zirvə Görüşünün keçirilməsi ilə bağlı fikirlər olub. Bu mühüm tədbirin Azərbaycanın İslam dünyası ilə əlaqələrinin daha da inkişaf etdirilməsi baxımından xüsusi əhəmiyyət daşıdığı vurğulanıb.
Azərbaycanın ev sahibliyi etdiyi belə tədbirlər müxtəlif ölkələrin nümayəndələrinin bir araya gəlməsinə, fikir mübadiləsi aparmasına, ortaq problemlərin müzakirəsinə və əməkdaşlıq imkanlarının müəyyənləşdirilməsinə şərait yaradır. Bu baxımdan Bakının beynəlxalq dialoq və həmrəylik məkanı kimi mövqeyi getdikcə möhkəmlənir.
Azərbaycanın təşəbbüslərində əsas istiqamətlərdən biri də dinlərarası və mədəniyyətlərarası dialoqun inkişaf etdirilməsidir. Ölkəmizdə müxtəlif dini konfessiyaların nümayəndələrinin sülh və qarşılıqlı hörmət şəraitində birgə yaşaması bu siyasətin mühüm nümunələrindən biridir.
Prezident İlham Əliyev çıxışında Qarabağ və Şərqi Zəngəzurda həyata keçirilən bərpa-quruculuq işlərinə də geniş yer ayırıb.
Dövlət başçısının diqqətə çatdırdığı kimi, Azərbaycan torpaqları uzun illər işğal altında qalıb. Təxminən 30 il ərzində beynəlxalq ictimaiyyət Azərbaycanın torpaqlarının işğal altında olmasına şahidlik edib. İşğal nəticəsində şəhərlər, kəndlər, tarixi və mədəni abidələr, dini məbədlər dağıdılıb, yüz minlərlə insan öz doğma yurdlarından didərgin düşüb.
İşğal dövründə Azərbaycanın tarixi-mədəni və dini irsinə də ciddi ziyan vurulub. Məscidlərin dağıdılması, dini abidələrin təhqir edilməsi və tarixi irsin məhv edilməsi regionun mədəni simasına böyük zərbə vurub.
Bu gün isə Qarabağ və Şərqi Zəngəzurda tamamilə yeni mənzərə yaranıb. Azərbaycan öz imkanları hesabına işğaldan azad edilmiş ərazilərdə genişmiqyaslı bərpa və quruculuq layihələri həyata keçirir. Şəhərlər və kəndlər yenidən qurulur, yollar və digər infrastruktur obyektləri yaradılır, məktəblər, xəstəxanalar və sosial obyektlər istifadəyə verilir.
Prezident İlham Əliyevin çıxışında insan həmrəyliyi və sülh ideyalarının mühüm yer tutması “Zayed İnsan Qardaşlığı Mükafatı”nın əhəmiyyətini də xüsusi olaraq gündəmə gətirib.
“Zayed İnsan Qardaşlığı Mükafatı” insan qardaşlığının, sülhün, qarşılıqlı hörmətin və humanist dəyərlərin təşviqinə xidmət edən mühüm beynəlxalq təşəbbüslərdən biridir.
2026-cı il üzrə bu mükafatın Prezident İlham Əliyevə təqdim olunması və mükafatın pul hissəsinin Qarabağ Dirçəliş Fonduna yönəldilməsi xüsusilə diqqətəlayiqdir. Bu addım mükafatın mahiyyətində dayanan insanlıq, həmrəylik və sülh ideyalarının Qarabağın bərpası prosesi ilə əlaqələndirilməsi baxımından böyük məna daşıyır.
Azərbaycanın İslam dünyası ilə münasibətləri yalnız siyasi və iqtisadi əlaqələrlə məhdudlaşmır. Tarixi, dini və mədəni bağlar bu münasibətlərin mühüm əsasını təşkil edir. Ölkəmizin müxtəlif müsəlman ölkələri ilə əməkdaşlığının genişləndirilməsi, beynəlxalq dini və mədəni tədbirlərə ev sahibliyi etməsi bu əlaqələrin inkişafına xidmət edir.
Gələn il Bakıda keçiriləcək İslam Əməkdaşlıq Təşkilatının Zirvə Görüşü də bu baxımdan mühüm hadisə olacaq. Azərbaycan paytaxtı bir daha İslam dünyasının diqqət mərkəzinə çevriləcək, müsəlman ölkələrinin rəhbərlərinin iştirakı ilə mühüm məsələlər müzakirə olunacaq.
Bu gün Azərbaycan həm öz ərazi bütövlüyünü və suverenliyini bərpa etmiş dövlət kimi, həm də sülh, əməkdaşlıq və humanizm ideyalarını təşviq edən ölkə kimi beynəlxalq tədbirlərdə fəal iştirak edir.
Prezident İlham Əliyevin nümayəndə heyəti ilə görüşü də bu siyasətin əsas istiqamətlərini əks etdirən mühüm tədbirlərdən biri olub. Görüşdə səsləndirilən fikirlər Azərbaycanın İslam dünyası ilə əlaqələrinin daha da möhkəmləndirilməsi, dini və mədəni irsin qorunması, insan həmrəyliyinin təşviqi və Qarabağda yeni həyatın qurulması istiqamətində həyata keçirilən işlərin əhəmiyyətini bir daha ortaya qoyub.
Azərbaycanın qarşısında duran əsas hədəflərdən biri əldə olunmuş sülh və sabitlik imkanlarından istifadə etməklə regionda davamlı əməkdaşlıq mühitinin formalaşdırılmasıdır. Bu istiqamətdə ölkəmizin təşəbbüsləri beynəlxalq tərəfdaşlarla dialoqun və qarşılıqlı etimadın möhkəmləndirilməsinə yönəlib.
Beləliklə, Prezident İlham Əliyevin çıxışında səsləndirilən fikirlər bir daha göstərir ki, Azərbaycan üçün İslam həmrəyliyi, insan qardaşlığı, mədəni irsin qorunması, sülh və əməkdaşlıq bir-birini tamamlayan mühüm dəyərlərdir. Qarabağ və Şərqi Zəngəzurda həyatın yenidən bərpa olunması, insanların doğma yurdlarına qayıtması və gələn il Bakının İslam Əməkdaşlıq Təşkilatının Zirvə Görüşünə ev sahibliyi etməsi Azərbaycanın müasir inkişaf tarixinin mühüm hadisələri sırasında yer alır.

Anar Alışov

Yeni Azərbaycan Partiyası Yardımlı rayon təşkilatının sədri