20 sentyabr Xankəndi, Xocalı, Xocavənd və Ağdərə şəhərləri günü kimi qeyd edilir - ŞƏRH

Məlum olduğu kimi, heç vaxt unudulmayacaq tarixi prosesin mühüm səhifələrindən biri 2023-cü il oktyabrın 15-də yazıldı. Prezident, Silahlı Qüvvələrin Ali Baş Komandanı İlham Əliyev Xankəndi, Xocalı, Xocavənd və Ağdərədə Azərbaycan Bayrağını ucaltdı. Xankəndidə üçrəngli bayrağımızın dalğalanması xalqımızın uzun illər gözlədiyi arzunun gerçəkləşməsini nümayiş etdirdi.

Qeyd edək ki, noyabrın 8-də isə Xankəndidə Vətən müharibəsinin Zəfərinə həsr olunan hərbi parad keçirildi. Bu parad Azərbaycanın Qarabağ üzərində tam suverenliyinin nümayiş etdirildiyi tarixi hadisələrdən biri kimi yadda qaldı. Onu da qeyd etmək lazımdır ki, Qarabağ Universitetinin yaradılması isə Zəfərin quruculuq mərhələsinin mühüm addımlarından oldu. Xankəndidə ali təhsil imkanlarının formalaşdırılması Qarabağın gələcəyinə yönələn yeni inkişaf mərhələsinin əsasını qoydu.
Yeri gəlmişkən, qeyd edək ki, Dövlət başçısının müvafiq sərəncamına əsasən hər il sentyabrın 20-də Xankəndi, Xocalı, Xocavənd və Ağdərə Günü təntənəli şəkildə qeyd olunur. Bu şərəfli tarix 30 ildən artıq davam edən həsrətin sona çatdığı, Azərbaycanın həmin ərazilərdə suverenliyinin tam bərpa olunduğu və xalqımızın tarixi torpaqlarına qayıdışının yeni mərhələsinin başlandığı gün kimi heç vaxt yaddaşlardan silinməyəcək. İşğaldan sonra genişmiqyaslı quruculuq işləri ilə yanaşı keçmiş məcburi köçkünlərin Xankəndi, Xocalı, Xocavənd və Ağdərə daxil olmaqla doğma yurdlarına qayıdışı da sürətlə davam etdirilməyə başlanıldı. Ölkəmizin qüdrəti sayəsində soydaşlarımız doğma torpaqlarında təhlükəsiz və rahat həyata qovuşur, illərlə həsrətində olduqları yurdlarında yeni həyatlarını qururlar. Bu qayıdış Azərbaycanın iradəsinin, suverenliyinin və doğma torpaqlarda möhkəm dövlət varlığının ən aydın göstəricilərindən biridir.
Məlumdur ki, Xankəndi, Xocalı, Xocavənd, Ağdərə və digər tarixi yurd yerlərimizin düşmən tapdağından azad olunmasına məhz Prezident İlham Əliyevin qətiyyətli liderliyi ilə nail olundu. Onun siyasi iradəsi, peşəkarlığı, diplomatik bacarığı, hərbi gücə əsaslanan strateji yanaşması və hadisələrə praqmatik baxışı Azərbaycanın tarixində heç vaxt silinməyəcək bir səhifənin yazılmasını təmin etdi.
Ən əsası, bu səhifənin adı qəhrəmanlıqla Qarabağ zəfərinin tamamlanması, ölkəmizin tarixə qalib dövlət kimi öz möhürünü vurmasıdır. Xankəndidə və digər tarixi şəhərlərimizdə üçrəngli bayrağımızın dalğalanması ölkəmizin ərazi bütövlüyünün və suverenliyinin tam bərpasının rəmzidir.

Seymur Çobanov,
YAP Göygöl rayon təşkilatı üzrə Hacıməlik qəsəbə ərazi partiya təşkilatının üzvü