20 Sentyabr: ruhumuzun doğma yurdla qovuşduğu şanlı tarix

Azərbaycan xalqının çoxəsrlik yaddaşında elə müqəddəs günlər var ki, onlar sadəcə təqvimin bir vərəqi deyil, bütöv bir millətin əyilmiş qəddinin düzəldiyi, itirilmiş mənəviyyatının və qürurunun bərpa olunduğu dönüş nöqtələridir. Dövlət başçısının Sərəncamı ilə təsis edilən 20 Sentyabr – Xankəndi, Xocalı, Xocavənd və Ağdərə şəhərləri günü məhz belə bir şanlı və uca tarixdir. Bu gün, üçrəngli bayrağımızın Qarabağın hər bir qarışında qürurla dalğalandığı, otuz illik separatizm kabusuna birdəfəlik son qoyulduğu şərəf simvolumuzdur.
2020-ci ilin payızında qazanılan Şanlı Vətən Müharibəsi qəlbimizə su çilsə də, Xankəndinin, Xocalının, Ağdərə və Xocavəndin bəzi torpaqlarında hələ də yad nəfəslərin gəzdiyi, qanunsuz silahlıların kölgə saldığı reallığı hər birimizin içində bir nisgil kimi qalırdı. Lakin Azərbaycan dövlətinin dəmir iradəsi və rəşadətli ordumuzun sarsılmaz gücü bu yarımçıq dastanımızı tamamladı. 2023-cü il sentyabrın 19-da başlayan və cəmi 23 saat 43 dəqiqə davam edən lokal antiterror tədbirləri dünya hərb tarixinə bir ustad dərsi kimi yazıldı. Düşmən diz çökdü, ağ bayraq qaldırdı və sentyabrın 20-də Azərbaycan öz suverenliyini bütün ölkə ərazisində tam və qəti olaraq bərqərar etdi.
Bu böyük qələbənin mənəvi yükü və ruhumuzdakı əksi ölçüyəgəlməzdir. 20 Sentyabr, 1992-ci ilin soyuq bir qış gecəsində amansız soyqırıma məruz qalan günahsız Xocalı şəhidlərinin ruhunun şad olduğu, onların qisasının qanla deyil, haqla, ədalətlə alındığı gündür. Bu gün, bir vaxtlar separatizmin mərkəzi sayılan Xankəndinin meydanında Azərbaycan bayrağının qürurla dalğalandığı, Ağdərə və Xocavənd dağlarının öz doğma sahiblərini qucaqladığı gündür. Ali Baş Komandanın Xankəndi mərkəzində ucaltdığı o müqəddəs bayraq, xalqımızın sarsılmaz birliyinin bütün dünyaya hayqırtısı idi.
Bu gün azadlığına qovuşmuş həmin şəhərlərimiz artıq dərddən, qəmdən uzaqdır; onlar indi sürətlə dirçələn, yenidən doğulan böyük bir quruculuq vahididir. "Böyük Qayıdış"ın mübarək köç karvanları ilə illərdir yurd həsrəti çəkən analarımızın, atalarımızın ayaq izləri Xocalı və Ağdərə torpağına toxunur, onların duaları göylərə ucalır. Xankəndidə fəaliyyətə başlayan Qarabağ Universiteti isə bu qədim diyarı gəncliyin, elmin, tərəqqinin və gələcəyin işıqlı mərkəzinə çevirir. İndi həmin torpaqlarda dağıdılmış yolların yerində müasir magistrallar uzanır, yeni evlər ucalır və hər tinindən doğmalıq qoxusu gəlir.
Nəticə etibarilə, 20 Sentyabr – hər bir azərbaycanlı üçün bir milli dirçəliş, qürur və fəxarət bayramıdır. Bizə bu unudulmaz Zəfəri, bu bütöv Azərbaycanı bəxş edən şəhidlərimizi sonsuz rəhmətlə, qazilərimizi dərin minnətdarlıqla anırıq. Qarabağın bu dörd gözəl guşəsində artıq barıt qoxusu deyil, sülhün mehi əsir, uşaq gülüşləri və məktəb zəngləri sədalanır. Bu müqəddəs gün bütün dünyaya bir daha və əbədi olaraq bəyan edir: Qarabağ Azərbaycandır!

Sitarə Babayeva
Yeni Azərbaycan Partiyası Lənkəran rayon təşkilatının məsləhətçisi