Birlik, həmrəylik, sülh və mənəvi dəyərlərə çağırış

Azərbaycan Respublikasının Prezidenti cənab İlham Əliyev sentyabrın 15-də Türk Dövlətləri Təşkilatının Müsəlman Dini Rəhbərləri Şurasının üzvləri və müşahidəçiləri, Yəhya Bakuvi Beynəlxalq Konfransının həmtəşkilatçıları və Qafqaz Xalqları Ali Dini Şurasının üzvlərindən ibarət nümayəndə heyətini qəbul edib. Görüşdə Türk dünyası və Qafqazın müxtəlif ölkələrindən olan dini rəhbərlər iştirak ediblər.

Cənab Prezident çıxışında Bakıda keçirilən tədbirlərin əhəmiyyətini vurğulayaraq, Türk Dövlətləri Təşkilatının Müsəlman Dini Rəhbərləri Şurasının 7-ci toplantısının və böyük Azərbaycan mütəfəkkiri Seyid Yəhya Bakuviyə həsr olunmuş beynəlxalq konfransın müxtəlif ölkələrin dini liderlərini bir araya gətirdiyini bildirib. Dövlət başçısı qeyd edib ki, tədbirdə Türk dövlətlərinin dini rəhbərləri ilə yanaşı, Gürcüstan və Suriyadan, həmçinin Şimali Qafqazın müxtəlif respublikalarından nümayəndələrin iştirakı birlik və həmrəyliyin mühüm nümunəsidir.

Möhtərəm Prezident dini liderlərin cəmiyyətdəki roluna da xüsusi diqqət yetirib. O vurğulayıb ki, müsəlman dini rəhbərlərinin sülh, əməkdaşlıq, əmin-amanlıq və barışıq istiqamətində verdiyi mesajlar böyük əhəmiyyət daşıyır. Dini liderlərin mövqeyi müsəlman icmalarına ciddi təsir göstərdiyindən onların birlik və həmrəylik çağırışları regionlarda sabitliyin möhkəmlənməsinə töhfə verə bilər.

Cənab İlham Əliyev Azərbaycanın İslam həmrəyliyinin gücləndirilməsi istiqamətində həyata keçirdiyi tədbirlərdən də danışıb. O, Azərbaycanın İslam Əməkdaşlıq Təşkilatı və digər beynəlxalq qurumlarla əməkdaşlığını qeyd edərək, ölkənin müxtəlif dini və mədəni tədbirlərə ev sahibliyi etdiyini bildirib. Gələn il İslam Əməkdaşlıq Təşkilatının sammitinin Bakıda keçiriləcəyini və bu tədbirin müsəlman dünyasında əməkdaşlığın və həmrəyliyin möhkəmləndirilməsi baxımından mühüm platforma olacağını diqqətə çatdırıb.

Digər mühüm istiqaməti Seyid Yəhya Bakuvinin irsi ilə bağlı olub. Ölkə başcısı onun Azərbaycan tarixində mühüm yer tutan alim və mütəfəkkir olduğunu vurğulayıb. Görüş iştirakçıları tərəfindən də Yəhya Bakuvinin elmi və mənəvi irsinin müasir dövrdə sülh, dözümlülük, qarşılıqlı hörmət və insanlar arasında həmrəyliyin təşviqi baxımından əhəmiyyətli olduğu bildirilib.

Dövlət rəhbəri nümayəndə heyətinin Qarabağa səfər edəcəyini də qeyd edib. Bildirib ki, qonaqlar Ağdam, Xankəndi, Xocalı və Şuşaya səfər etməklə bölgənin keçmişi və hazırkı vəziyyəti ilə yaxından tanış olacaqlar. Bu səfərin Azərbaycanın tarixi, mədəni və dini irsinin nümayəndə heyətinə daha yaxından təqdim olunması baxımından əhəmiyyət daşıdığı vurğulanıb.

Ümumilikdə, görüşdə səsləndirilən fikirlər Türk dünyası və İslam aləmində birlik, həmrəylik, sülh və qarşılıqlı əməkdaşlığın əhəmiyyətini ön plana çıxarıb. Tədbir Azərbaycanın dini və mədəni dialoqun inkişafına verdiyi töhfələrin, eləcə də Türk dünyası ilə əlaqələrin möhkəmləndirilməsi istiqamətində həyata keçirilən təşəbbüslərin müzakirəsi baxımından əhəmiyyətli olub.

Nazim Bünyatov

YAP Ağcabədi rayon təşkilatının sədr müavini