Oktyabrın 15-də Xankəndi, Xocalı, Xocavənd və Ağdərə şəhərlərində Azərbaycan bayrağı ucaldıldı - ŞƏRH

2023-cü il oktyabrın 15-i Azərbaycanın müasir dövlətçilik tarixinə qızıl hərflərlə yazılan, 30 illik həsrətə son qoyan və ölkənin suverenliyini tam bərpa edən müqəddəs bir gün kimi daxil olmuşdur. Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin Xankəndi, Xocalı, Xocavənd və Ağdərə şəhərlərində Azərbaycan Respublikasının Dövlət Bayrağını ucaltması təkcə ərazi bütövlüyünün bərpası deyil, həm də tarixi ədalətin tam və qəti şəkildə bərqərar olunmasının bariz təcəssümüdür.

​2020-ci ilin 44 günlük Vətən müharibəsində qazanılan parlaq Qələbə nəticəsində torpaqlarımızın böyük hissəsi işğaldan azad edilsə də, Qarabağ iqtisadi rayonunun bəzi ərazilərində qanunsuz erməni silahlı birləşmələri və separatçı rejim varlığını sürdürürdü. 2023-cü il sentyabrın 19-20-də keçirilən cəmi 24 saatlıq lokal xarakterli anti-terror tədbirləri nəticəsində separatçılar təslim olmağa məcbur edildi, qanunsuz xunta rejimi ləğv olundu və Azərbaycanın dövlət suverenliyi bütün ölkə ərazisində tam təmin edildi. Bu şanlı hərbi və siyasi zəfərin ardınca oktyabrın 15-də Ali Baş Komandanın məhz bu şəhərlərə səfər edərək üçrəngli bayrağımızı ucaltması tarixi prosesin məntiqi yekunu oldu.

​Bu tarixi addımın mənəvi və strateji mənası son dərəcə dərin və əhəmiyyətlidir. Onilliklər boyu separatizmin və qanunsuz rejimin mərkəzi olmuş Xankəndi şəhərində Azərbaycan bayrağının ucalıqlara qaldırılması separatçılıq ideologiyasına vurulan son və qəti zərbə idi. 1992-ci ildə əsrin en dəhşətli soyqırımlarından birinə məruz qalan Xocalıda bayrağımızın dalğalanması isə şəhidlərimizin ruhuna ən böyük ehtiramın və qisasın döyüş meydanında alındığının təntənəsi oldu. Eyni zamanda Xocavənd və Ağdərədə dövlət rəmzimizin ucaldılması regionsda təhlükəsizliyi tam təmin etməklə yanaşı, bu kadim torpaqların birdəfəlik ana vətənə qovuşmasını bütün dünyaya elan etdi.

​Dövlət bayrağının bu şəhərlərdə ucaldılması həm də "Böyük Qayıdış" proqramının miqyasını köklü şəkildə Genişləndirdi. Bu hadisədən sonra regionda sürətli bərpa-quruculuq işlərinə, mülki infrastrukturun yenidən qurulmasına və keçmiş məcburi köçkünlərin öz doğma yurdlarına təhlükəsiz, ləyaqətli qaytarılması prosesinə tam hüquqi və praktiki zəmin yarandı. Ali Baş Komandan İlham Əliyevin bu tarixi missiyası Azərbaycan xalqının sarsılmaz həmrəyliyini, ordumuzun qüdrətini və dövlətimizin siyasi iradəsini bir daha nümayiş etdirdi. Məhz bu səbəbdən Xankəndi, Xocalı, Xocavənd və Ağdərədə ucalan üçrəngli bayrağımız Azərbaycanın bölünməzliyinin, əbədi gücünün və böyük Zəfərinin əbədi rəmzi olaraq dalğalanmaqdadır.

Vüsal Hüseynov

YAP Xocavənd rayon təşkilatının sədri