Gədəbəy rayonunda 20 Sentyabr – Dövlət Suverenliyi Gününə həsr olunmuş təntənəli tədbir keçirilib - FOTOLAR

Gədəbəy rayon İcra Hakimiyyətinin və Yeni Azərbaycan Partiyası (YAP) Gədəbəy rayon təşkilatının birgə təşkilatçılığı ilə Gədəbəy Rayonunda 20 Sentyabr – Dövlət Suverenliyi Gününə həsr olunmuş təntənəli tədbir keçirilib.

Azərbaycan Respublikasında hər il Sentyabrın 20-nin Dövlət Suverenliyi Günü kimi qeyd olunması xalqımızın çoxəsrlik dövlətçilik tarixində müstəsna əhəmiyyət daşıyan, ərazi bütövlüyümüzün və suverenliyimizin tam bərpasını simvolizə edən şanlı tarixi hadisədir. Bu əlamətdar gün münasibətilə Gədəbəy rayonunda geniş tədbir təşkil olunub.

Tədbir iştirakçıları əvvəlcə Ümummilli Lider Heydər Əliyevin abidəsini ziyarət edərək önünə gül dəstələri düzüb, dahi şəxsiyyətin əziz xatirəsini ehtiramla yad ediblər. Daha sonra məktəblilərin hazırladığı əl işlərindən ibarət sərgiyə baxış keçirilib.

Aşıq Ələsgər adına Gədəbəy Aşıq Məktəbində davam edən tədbir Azərbaycan Respublikasının Dövlət Himninin səsləndirilməsi ilə başlayıb. Xalqımızın Ümummilli Lideri Heydər Əliyevin və Azərbaycanın müstəqilliyi, ərazi bütövlüyü, həmçinin suverenliyi uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.

Tədbiri giriş sözü ilə açan Gədəbəy Rayon İcra Hakimiyyəti başçısının səlahiyyətlərini icra edən Natiq Nağıyev iştirakçıları və bütün rayon ictimaiyyətini bu şanlı bayram münasibətilə təbrik edib.

Daha sonra çıxış edən Yeni Azərbaycan Partiyasının Gədəbəy rayon təşkilatının sədri Rüstəm Nağıyev 20 Sentyabr – Dövlət Suverenliyi Gününün tarixi əhəmiyyəti, Azərbaycanın ərazi bütövlüyünün və dövlət suverenliyinin bərpasına aparan tarixi yol, Azərbaycanın əldə etdiyi tarixi Zəfərdən geniş məruzə ilə bəhs edib.

Vətən müharibəsi şəhidi tibb xidməti baş leytenantı Şöhrət Qasımovun atası Şakir Qasımov çıxış edərək şəhidlərimizin hər zaman qəlblərdə yaşayacağını, dövlətimizin şəhid ailələrinə göstərdiyi diqqət və qayğıya görə minnətdarlığını ifadə edib.

Çıxışlardan sonra Azərbaycanın dövlətçilik tarixini və Zəfər yolunu əks etdirən sənədli film nümayiş olunub.

Tədbir Gədəbəy şəhər 1 nömrəli tam orta ümumtəhsil məktəbinin şagirdlərinin hazırladığı ədəbi-bədii kompozisiya, eləcə də yerli musiqiçilərin ifalarında musiqi nömrələri ilə davam etdirilib.