Qəhrəmanlıq tariximizin unudulmaz səhifəsi - ŞƏRH

Azərbaycan xalqının yaddaşında elə tarixlər var ki, onların üzərindən illər keçsə də, daşıdığı məna və yaratdığı qürur hissi heç zaman silinmir. 27 Sentyabr da məhz belə müqəddəs günlərdəndir. Bu tarix Vətən uğrunda canından keçən qəhrəman övladlarımızın əziz xatirəsini ehtiramla yad etdiyimiz, onların fədakarlığı qarşısında baş əydiyimiz Anım Günüdür. 27 Sentyabr 2020-ci ildə başlayan Vətən müharibəsi 44 gün davam edərək Azərbaycanın ərazi bütövlüyünün bərpası ilə nəticələnən tarixi Zəfərə yol açdı.
Azərbaycan xalqı hər zaman sülhə, sabitliyə və mehriban qonşuluğa üstünlük verib. Lakin uzun illər ərzində davam edən işğal, saysız-hesabsız təxribatlar və beynəlxalq hüququn prinsiplərinə zidd addımlar xalqımızın səbrini tükəndirən əsas amillərdən oldu. 2020-ci il sentyabrın 27-də Ermənistan silahlı qüvvələrinin Azərbaycan Ordusunun mövqelərinə və yaşayış məntəqələrinə genişmiqyaslı hücumu qarşısında Azərbaycan özünümüdafiə hüququndan istifadə edərək əks-hücum əməliyyatına başladı.
Həmin gün Azərbaycan xalqının iradəsi, dövlətçilik əzmi və milli həmrəyliyi bir daha bütün gücü ilə ortaya qoyuldu. Xalq və dövlət bir amal ətrafında sıx birləşərək Vətən torpaqlarının azadlığı uğrunda mübarizəyə qalxdı. Bu birlik sonrakı 44 gün ərzində Azərbaycanın hərbi-siyasi gücünün, milli iradəsinin və xalqımızın Vətən sevgisinin parlaq təcəssümünə çevrildi.
Vətən müharibəsi Azərbaycan xalqının yaddaşına yalnız hərbi Qələbə kimi deyil, misilsiz qəhrəmanlıq və fədakarlıq salnaməsi kimi həkk olundu. Müharibə günlərində hər bir Azərbaycan ailəsinin qəlbində eyni hiss, eyni inam, eyni müqəddəs amal vardı. Cəbhəyə yollanan oğullarımızın dilində və xalqın düşüncəsində “öldü var, döndü yoxdur” ifadəsi Vətən qarşısında məsuliyyətin və dönməz iradənin simvoluna çevrilmişdi.
Azərbaycan əsgəri bilirdi ki, qarşısında dayanan vəzifə sadəcə hərbi tapşırıq deyil, doğma torpağın şərəfini, xalqın ləyaqətini və dövlətin ərazi bütövlüyünü qorumaq missiyasıdır. Məhz bu əqidə ilə döyüşən qəhrəmanlarımız canlarını Vətənə fəda edərək Azərbaycan tarixinin ən şərəfli səhifələrini yazdılar. Anım Günü də həmin qəhrəmanların xatirəsini yaşatmaq, onların müqəddəs irsini gələcək nəsillərə çatdırmaq baxımından xüsusi əhəmiyyət daşıyır.
Azərbaycanın Zəfər salnaməsinin əsasını təşkil edən amillərdən biri də güclü dövlət–ordu–xalq birliyidir. Müzəffər Ordumuzun şəxsi heyətinin döyüş meydanında göstərdiyi qəhrəmanlıq dövlətin hərbi siyasəti, ordunun müasir standartlara uyğun inkişafı və xalqın mənəvi dəstəyi ilə tamamlandı.
Bu gün də Azərbaycan dövləti Vətən qarşısında xidmətləri olan hər bir hərbi qulluqçunun, qazinin və şəhid ailəsinin yanındadır. Şəhid ailələrinin və müharibə iştirakçılarının sosial müdafiəsinin gücləndirilməsi istiqamətində ardıcıl tədbirlər həyata keçirilir. Rəsmi məlumatlara əsasən, postmüharibə dövründə 132 min şəhid ailəsi üzvü və müharibə iştirakçısını əhatə edən sosial dəstək tədbirləri çərçivəsində 403 min xidmət göstərilib; mənzil, sosial ödəniş, reabilitasiya, məşğulluq və digər istiqamətlər üzrə geniş dəstək tədbirləri həyata keçirilib.
Şəhid ailələrinə göstərilən diqqət və qayğı Azərbaycan dövlətinin sosial siyasətinin mühüm istiqamətlərindən biridir. Çünki şəhidlərin əziz xatirəsinə ehtiram yalnız sözlə deyil, onların ailələrinin rifahına göstərilən davamlı qayğı ilə də ifadə olunur. Qazilərimizin sağlamlığının bərpası, sosial təminatının gücləndirilməsi, mənzil və məşğulluq imkanlarının genişləndirilməsi istiqamətində görülən işlər dövlətin öz qəhrəman övladlarına münasibətinin göstəricisidir.
27 Sentyabr – Anım Günü bizə bir daha xatırladır ki, Azərbaycan xalqının əldə etdiyi Zəfərin arxasında böyük qurbanlar, sonsuz Vətən sevgisi və qəhrəmanlıq dayanır. Bu gün şəhidlərimizin ruhu qarşısında baş əyir, onların müqəddəs xatirəsini qəlbimizdə yaşadırıq. Onların canı bahasına ucalan üçrəngli bayrağımız bu gün azad edilmiş torpaqlarımızda qürurla dalğalanır. Şəhidlərimizin ölməz xatirəsi isə Azərbaycan xalqının yaddaşında əbədi yaşayacaqdır.

Lalə Mədətova
YAP Kəngərli rayon təşkilatının əməkdaşı