Dağ-mədən və metallurgiya sənayesinin inkişafında yeni mərhələ

Azərbaycanın iqtisadi inkişaf strategiyasında sənayenin şaxələndirilməsi, qeyri-neft sektorunun inkişafı və təbii resurslardan səmərəli istifadə mühüm istiqamətlərdəndir. Bu baxımdan dağ-mədən və metallurgiya sənayesinin inkişafı xüsusi əhəmiyyət daşıyır. Cənab Prezident İlham Əliyevin “Azərbaycan Respublikasında 2027-2030-cu illərdə dağ-mədən və metallurgiya sənayesinin inkişafına dair Dövlət Proqramı”na həsr olunmuş müşavirədə çıxışı bu sahənin qarşıdakı illər üzrə inkişaf perspektivlərinin müəyyənləşdirilməsi baxımından mühüm əhəmiyyət kəsb edir.

Azərbaycan zəngin mineral-xammal ehtiyatlarına malik ölkədir. Bu potensialın iqtisadi dövriyyəyə daha geniş cəlb edilməsi, xammalın ölkə daxilində emalının artırılması və yüksək əlavə dəyər yaradan məhsulların istehsalı sənaye inkişafının əsas istiqamətlərindəndir. Dövlət Proqramı çərçivəsində xammalın hasilatından emalına və hazır məhsul istehsalına qədər vahid sənaye zəncirinin formalaşdırılması nəzərdə tutulur.

2027-2030-cu illəri əhatə edən proqramda dəmir filizi, alüminium, mis və qızıl əsas istiqamətlər kimi müəyyənləşdirilib. Yeni layihələrin həyata keçirilməsi, mövcud istehsal güclərinin artırılması və perspektivli yataqların iqtisadi dövriyyəyə cəlb olunması ölkənin mineral-xammal bazasının genişləndirilməsinə imkan verəcək. Müasir texnologiyaların tətbiqi və istehsal proseslərinin təkmilləşdirilməsi isə sənayenin rəqabət qabiliyyətinin yüksəldilməsinə xidmət edəcək.

Dağ-mədən və metallurgiya sənayesinin inkişafı regionların iqtisadi fəallığının artırılması baxımından da əhəmiyyətlidir. Yeni istehsal və emal müəssisələrinin yaradılması əlavə iş yerlərinin açılmasına, məşğulluq imkanlarının genişlənməsinə və regionların sosial-iqtisadi inkişafına müsbət təsir göstərə bilər. Bununla yanaşı, metallurgiya sahəsində istehsalın genişləndirilməsi daxili tələbatın ödənilməsinə və ixrac imkanlarının artırılmasına şərait yaradacaq.

Dövlət Proqramında qarşıya qoyulan iqtisadi hədəflər də kifayət qədər genişdir. 2030-cu ilədək dağ-mədən və metallurgiya sektorunun ümumi daxili məhsula töhfəsinin 700 milyon manatdan 1,8 milyard manata, illik ixrac potensialının isə 1,3 milyard manatdan 3,4 milyard manata çatdırılması nəzərdə tutulur. Proqramın icrası çərçivəsində 2027-2030-cu illərdə 5,3 milyard manat investisiyanın yatırılması planlaşdırılır.

Bu istiqamətdə investisiyaların cəlb edilməsi, yeni texnologiyaların tətbiqi və müasir istehsal müəssisələrinin yaradılması xüsusi önəm daşıyır. Dövlət dəstəyi ilə yanaşı, yerli və xarici investorların layihələrə cəlb olunması sənayenin inkişafına əlavə imkanlar yarada bilər. Beləliklə, ölkənin zəngin təbii ehtiyatlarının daha səmərəli istifadəsi və emal proseslərinin genişləndirilməsi iqtisadi dəyərin artırılmasına xidmət edəcək.

Ümumilikdə, 2027-2030-cu illərdə dağ-mədən və metallurgiya sənayesinin inkişafına dair Dövlət Proqramı Azərbaycanın sənaye siyasətində mühüm istiqamətlərdən birini müəyyən edir. Proqramın həyata keçirilməsi xammal ehtiyatlarından səmərəli istifadə, emal sənayesinin genişləndirilməsi, investisiyaların artırılması, yeni iş yerlərinin yaradılması və ixrac potensialının yüksəldilməsi baxımından əhəmiyyətlidir. Bu siyasətin ardıcıl icrası Azərbaycanın sənaye potensialının güclənməsinə və iqtisadi inkişafın daha da sürətlənməsinə imkan verəcək.

Rövşən Əhmədov

YAP Ağcabədi rayon təşkilatının sədri