27 Sentyabr – Anım Günü: Şəhidlərimizin əziz xatirəsi və tarixi Zəfərimiz - ŞƏRH

Azərbaycan xalqının tarixində elə günlər var ki, həmin tarixlər xalqın yaddaşında yalnız bir təqvim günü kimi deyil, milli iradənin, Vətən sevgisinin və dövlətçilik əzminin rəmzi kimi yaşayır. 27 Sentyabr – Anım Günü də Azərbaycan tarixində belə xüsusi məna daşıyan günlərdəndir. Bu tarix 2020-ci ildə başlayan Vətən müharibəsində Azərbaycanın ərazi bütövlüyü uğrunda canından keçən şəhidlərimizin əziz xatirəsinə ehtiramın ifadəsidir. Hər il 27 sentyabrda xalqımız şəhidlərimizi böyük ehtiram və minnətdarlıq hissi ilə yad edir, onların müqəddəs xatirəsi qarşısında baş əyir.
Vətən müharibəsinin ən mühüm xüsusiyyətlərindən biri Azərbaycan dövlətinin siyasi iradəsi ilə xalqın və ordunun vahid məqsəd ətrafında birləşməsi idi. Bu tarixi prosesin başında Azərbaycan Respublikasının Prezidenti, Müzəffər Ali Baş Komandan İlham Əliyev dayanırdı. 2020-ci il sentyabrın 27-də Ermənistan silahlı qüvvələrinin genişmiqyaslı hərbi təxribatından sonra Prezident İlham Əliyevin sədrliyi ilə Təhlükəsizlik Şurasının iclası keçirildi və dövlət başçısının göstərişləri əsasında Azərbaycan Ordusu əks-hücum əməliyyatına başladı.
Müharibənin ilk saatlarından etibarən Prezident İlham Əliyev həm Ali Baş Komandan kimi hərbi prosesə rəhbərlik edir, həm də dövlət başçısı olaraq xalqı məlumatlandırırdı. Onun xalqa müraciətləri, müsahibələri və beynəlxalq media qurumlarına verdiyi açıqlamalar Azərbaycanın haqq işinin dünya ictimaiyyətinə çatdırılması baxımından mühüm əhəmiyyət daşıyırdı. Prezident müxtəlif beynəlxalq platformalarda Azərbaycanın mövqeyini qətiyyətlə müdafiə edir, ölkəmizin ərazi bütövlüyünün bərpasının beynəlxalq hüquqa əsaslandığını diqqətə çatdırırdı.
Prezident İlham Əliyev müharibənin gedişində Azərbaycan Ordusunun qazandığı hər bir uğuru xalqla bölüşür, azad edilən şəhər və kəndlərin adlarını ictimaiyyətə çatdırırdı. Bu məlumatlar Azərbaycan xalqında böyük ruh yüksəkliyi yaradır, ordunun döyüş meydanındakı uğurlarının bütün ölkədə böyük coşqu ilə qarşılanmasına səbəb olurdu.
2020-ci il sentyabrın 27-də başlayan Vətən müharibəsi 44 gün davam etdi və Azərbaycanın tarixi Qələbəsi ilə başa çatdı. Azərbaycan Ordusunun qəhrəmanlığı və peşəkarlığı nəticəsində bir sıra şəhər, rayon və kəndlərimiz işğaldan azad edildi. Noyabrın 8-də Şuşanın azad olunması isə Vətən müharibəsinin gedişində xüsusi tarixi əhəmiyyət daşıyan hadisəyə çevrildi.
Noyabrın 10-da Azərbaycan, Ermənistan və Rusiya liderləri tərəfindən imzalanmış üçtərəfli bəyanatla hərbi əməliyyatlar dayandırıldı. Bununla da Ermənistanın uzun illər davam edən işğal siyasətinə son qoyuldu və Azərbaycanın ərazi bütövlüyünün bərpası istiqamətində tarixi mərhələ başa çatdı.
Bu Qələbənin arxasında Azərbaycan əsgər və zabitlərinin misilsiz qəhrəmanlığı, şəhidlərimizin müqəddəs fədakarlığı, qazilərimizin şücaəti və bütün xalqımızın həmrəyliyi dayanırdı. Eyni zamanda, bu tarixi nəticə Azərbaycan dövlətinin illər ərzində apardığı məqsədyönlü siyasətin və Müzəffər Ali Baş Komandan İlham Əliyevin rəhbərliyi ilə həyata keçirilən hərbi-siyasi strategiyanın nəticəsi kimi tarixə düşdü..
Bu Qələbənin ən böyük və əvəzolunmaz qiyməti isə şəhidlərimizin canı oldu. Onlar Vətən torpağının azadlığı uğrunda həyatlarını fəda edərək Azərbaycan tarixinin ən şərəfli səhifələrindən birini yazdılar. Məhz buna görə 27 Sentyabr həm hüzn, həm də qürur günüdür.
Azərbaycan Prezidenti İlham Əliyevin 2 dekabr 2020-ci il tarixli Sərəncamı ilə hər il sentyabrın 27-si Azərbaycan Respublikasında Anım Günü kimi təsis edildi. Sərəncamda Vətən müharibəsində qəhrəmanlıq göstərmiş əsgər və zabitlərimizin, şəhidlərimizin xatirəsinin əbədiləşdirilməsi xüsusi vurğulanır.
27 Sentyabr – Anım Gününün ilk ildönümündə Bakıda Vətən müharibəsi şəhidlərinin xatirəsinə ehtiram əlaməti olaraq geniş yürüş keçirildi. Prezident İlham Əliyev və birinci xanım Mehriban Əliyevanın iştirak etdiyi yürüşdə şəhidlərin, müharibə zamanı həlak olan mülki şəxslərin və itkin düşmüş soydaşlarımızın xatirəsi yad edildi. Həmin gün saat 12:00-da bütün ölkə ərazisində şəhidlərin xatirəsi bir dəqiqəlik sükutla yad olundu.
Bu yürüş Azərbaycan cəmiyyətinin şəhidlərimizin xatirəsinə olan böyük ehtiramının daha bir ifadəsi idi. Minlərlə insanın iştirakı ilə keçirilən tədbir xalqımızın Vətən müharibəsində canından keçən qəhrəman övladlarını unutmadığını və onların xatirəsini daim yaşatdığını göstərdi.
Həmin gün Prezident İlham Əliyev Vətən Müharibəsi Memorial Kompleksinin və Zəfər Muzeyinin təməlini qoydu. Bu addım tarixi Qələbənin və şəhidlərimizin qəhrəmanlığının gələcək nəsillərə çatdırılması baxımından mühüm əhəmiyyət daşıyırdı.
Vətən müharibəsində qazanılan tarixi Qələbənin və şəhidlərimizin xatirəsinin əbədiləşdirilməsi məqsədilə Bakıda Zəfər parkı və Zəfər Muzeyi yaradıldı. Zəfər parkı xalqımızın 44 günlük Vətən müharibəsində əldə etdiyi tarixi Zəfərin rəmzlərindən birinə çevrildi.
27 Sentyabr – Anım Günü Azərbaycan xalqının şəhidlərinə olan sonsuz ehtiramının ifadəsidir. Bu gün biz Vətən müharibəsində canından keçən qəhrəman oğul və qızlarımızı dərin minnətdarlıq hissi ilə yad edir, onların göstərdiyi misilsiz fədakarlığı daim uca tuturuq. Şəhidlərimizin qəhrəmanlığı Azərbaycan xalqının yaddaşında əbədi yaşayacaq.

Sahib Şükürov
YAP Göyçay rayon təşkilatının sədri