Yeni sənaye mərhələsinə doğru - ŞƏRH

Sentyabrın 22-də Prezident İlham Əliyevin sədrliyi ilə dağ-mədən və metallurgiya sənayesinin inkişafına dair 2027–2030-cu illər üçün Dövlət Proqramına həsr olunmuş müşavirə keçirilib. Dövlət başçısı çıxışında bu sahənin Azərbaycanın iqtisadiyyatı, xüsusilə qeyri-neft sektorunun inkişafı üçün mühüm əhəmiyyət daşıdığını vurğulayıb.
Prezident İlham Əliyev bildirib ki, əsas məqsəd yalnız xammal hasilatını artırmaq deyil, Azərbaycanın təbii ehtiyatlarını ölkə daxilində daha çox emal etməklə yüksək əlavə dəyər yaratmaqdır. Dövlət Proqramında dəmir filizi, alüminium, mis və qızıl kimi istiqamətlər üzrə istehsal imkanlarının genişləndirilməsi nəzərdə tutulur.
Proqram çərçivəsində 2027–2030-cu illərdə ümumilikdə 5,3 milyard manat investisiya qoyuluşu planlaşdırılır. Qarşıdakı dövrdə sektorun əlavə dəyərinin və ixrac imkanlarının əhəmiyyətli şəkildə artırılması, yeni istehsal müəssisələrinin yaradılması və mövcud güclərin genişləndirilməsi qarşıya məqsəd qoyulur.
Dövlət başçısı alüminium istehsalının 2030-cu ilin sonuna qədər 100 min tona çatdırılmasının nəzərdə tutulduğunu qeyd edib. Həmçinin dağ-mədən və metallurgiya layihələrinin ölkə iqtisadiyyatına milyardlarla manat səviyyəsində müsbət maliyyə təsiri göstərə biləcəyi bildirilib.
Yeni Dövlət Proqramının mühüm istiqamətlərindən biri də regionların iqtisadi fəallığının artırılmasıdır. Yeni müəssisələrin yaradılması, logistika və xidmət sahələrinin genişlənməsi, yerli şirkətlər üçün yeni imkanların formalaşması və ixtisaslı kadrlara tələbatın artması gözlənilir. Xüsusilə Qarabağ və Şərqi Zəngəzurda geoloji kəşfiyyat işlərinin genişləndirilməsi də proqramda nəzərdə tutulan məsələlərdəndir.
Prezident İlham Əliyevin çıxışından aydın olur ki, dağ-mədən və metallurgiya sənayesinin inkişafı Azərbaycanın iqtisadiyyatının şaxələndirilməsi və qeyri-neft sektorunun gücləndirilməsi istiqamətində mühüm addımlardan biridir. Dövlət Proqramının icrası ölkənin mineral ehtiyatlarından daha səmərəli istifadə edilməsinə, yeni sənaye zəncirlərinin yaradılmasına və ixrac potensialının artırılmasına şərait yarada bilər.

Cavid Mustafayev,
Yeni Azərbaycan Partiyası Goranboy rayon təşkilatının sədr müavini.