Anım Günü xalqın qəhrəman övladlarına ümummilli ehtiramının dövlət səviyyəsində təsdiqidir - ŞƏRH

27 Sentyabr – Anım Günü Azərbaycan xalqının milli-mənəvi yaddaşında xüsusi əhəmiyyət daşıyan müqəddəs tarixlərdən biridir. Bu gün Vətən müharibəsində, eləcə də Azərbaycanın ərazi bütövlüyünün bərpası uğrunda aparılmış bütün döyüşlərdə həyatını itirmiş şəhidlərimizin əziz xatirəsi böyük ehtiram və dərin hörmətlə yad olunur. Anım Günü eyni zamanda Azərbaycan dövlətinin qəhrəman övladlarının göstərdiyi fədakarlığa verdiyi yüksək qiymətin, şəhid ailələrinə və sağlamlığını itirmiş qazilərə göstərilən diqqət və qayğının mühüm göstəricisidir. Azərbaycanın tarixi Zəfərinin əldə olunmasında xüsusi xidmətləri olan şəhidlərin, qazilərin və müharibə iştirakçılarının qəhrəmanlığına ehtiram göstərilməsi müasir dövlət siyasətinin mühüm mənəvi istiqamətlərindən birini təşkil edir.

Vətən müharibəsi bir daha sübut etdi ki, xalqın öz azadlığı və torpaqlarının bütövlüyü naminə apardığı mübarizədə güclü dövlətin və dövlət iradəsinin mövcudluğu mühüm əhəmiyyət daşıyır. Azərbaycan bu yanaşmanı əsas götürərək müharibədən sonrakı mərhələdə şəhid ailələrinin sosial təminatının gücləndirilməsi, qazilərin müalicə və reabilitasiyasının təşkili, onların cəmiyyətə və normal həyata inteqrasiyasının təmin olunması istiqamətində genişmiqyaslı tədbirlər həyata keçirdi. Prezident, Müzəffər Ali Baş Komandan İlham Əliyev çıxışlarında dəfələrlə bildirib ki, Azərbaycan dövləti öz hərbçisinin, şəhid ailələrinin və qazilərinin yanında olmaq siyasətini bundan sonra da davam etdirəcək. Şəhidlərin adının və xatirəsinin əbədiləşdirilməsi də həmin siyasətin mühüm istiqamətlərindəndir. 2020-ci il dekabrın 2-də imzalanmış Sərəncamla sentyabrın 27-nin hər il Anım Günü kimi qeyd edilməsi dövlətin Vətən uğrunda canından keçmiş qəhrəmanlara ümumxalq səviyyəsində ehtiramının hüquqi ifadəsinə çevrildi. Bu tarix sadəcə təqvimdə xüsusi gün kimi qeyd olunmur. Anım Günü şəhidlərin Azərbaycan xalqının yaddaşında daim yaşayacağını, onların qəhrəmanlığının gələcək nəsillər üçün mənəvi örnək olaraq qalacağını ifadə edir.

Vətən müharibəsində əldə edilmiş tarixi Qələbənin gələcək nəsillərin yaddaşında qorunması məqsədilə reallaşdırılan layihələr də mühüm əhəmiyyət kəsb edir. Bakıda yaradılan Zəfər parkı və Vətən Müharibəsi Memorial Kompleksi xalqımızın Qələbə salnaməsinin, şəhidlərimizin müqəddəs xatirəsinin və Azərbaycan əsgərinin göstərdiyi qəhrəmanlığın gələcək nəsillərə çatdırılmasına xidmət edən mühüm məkanlardır. Bu obyektlər yalnız memarlıq baxımından əhəmiyyətli tikililər deyil, eyni zamanda müasir Azərbaycan tarixinin mühüm hadisələrini yaşadan yaddaş məkanlarıdır. Zəfər parkının 44 günlük Vətən müharibəsinin əsas rəmzlərini özündə birləşdirən konsepsiya əsasında qurulması da xüsusi məna daşıyır. Parkın girişində yerləşən Zəfər tağı, memorial elementlər, Qarabağla bağlı tarixi yaddaşı yaşadan məkanlar və Azadlıq Bayrağı Meydanı Azərbaycanın Qələbəyə aparan mübarizə yolunu simvolik şəkildə əks etdirir. Bu məkana gələn hər bir insan torpaqlarımızın azadlığı naminə aparılmış mübarizənin hansı böyük fədakarlıq və qəhrəmanlıq hesabına mümkün olduğunu daha aydın şəkildə dərk edir.

Azərbaycan əsgər və zabitlərinin göstərdiyi şücaətin dövlət səviyyəsində qiymətləndirilməsi Vətən müharibəsi iştirakçılarına təqdim edilən yüksək dövlət təltiflərində də öz əksini tapıb. Bu məqsədlə “Zəfər” və “Qarabağ” ordenlərinin, həmçinin Vətən müharibəsinin müxtəlif istiqamətləri və iştirakçıları ilə bağlı medalların təsis edilməsi hərbçilərimizin qəhrəmanlığına verilən yüksək qiymətin göstəricisidir. Həmin təltiflər ayrı-ayrı hərbçilərin şəxsi igidliyinin qiymətləndirilməsi ilə yanaşı, Azərbaycan cəmiyyətinin öz müdafiəçilərinə bəslədiyi dərin hörmətin də rəmzi kimi çıxış edir. Şəhid ailələrinin və qazilərin sosial müdafiəsinin gücləndirilməsi istiqamətində atılan addımlar da dövlət siyasətinin mühüm tərkib hissəsidir. Müharibə zamanı və ondan sonrakı dövrdə sağlamlığını itirmiş hərbçilərin müalicəsi və reabilitasiyası, müasir protezlərlə təmin olunması, onların sosial və məişət problemlərinin həlli istiqamətində ardıcıl tədbirlər görülür. Vətən uğrunda həyatını və sağlamlığını fəda etmiş insanların ehtiyaclarının dövlət tərəfindən diqqətdə saxlanılması bu insanların heç vaxt diqqətdən kənarda qalmayacağının mühüm göstəricisidir.

Şəhid ailələrinə və qazilərə dəstək sahəsində “YAŞAT” Fondunun fəaliyyəti də xüsusi diqqətə layiqdir. Şəhid ailələrinin, həmçinin hərbi əməliyyatlar nəticəsində əlilliyi müəyyən edilmiş şəxslərin müxtəlif ehtiyaclarının qarşılanmasına yardım göstərmək məqsədilə yaradılan fond dövlətlə cəmiyyətin həmrəyliyinin mühüm nümunələrindən birinə çevrilib. Fondun fəaliyyəti Vətən müharibəsi zamanı formalaşmış milli birlik və həmrəyliyin qələbədən sonra da davam etdiyini və sosial dəstək şəklində özünü göstərdiyini nümayiş etdirir. Anım Günü hər birimizi şəhidlərimizin qarşısında daşıdığımız mənəvi məsuliyyət barədə düşünməyə çağırır. Bu məsuliyyət yalnız onların adlarını ehtiramla yad etməklə məhdudlaşmır. Şəhidlərin uğrunda canlarından keçdiyi müstəqil, qüdrətli və inkişaf edən Azərbaycanın daha da güclənməsinə töhfə vermək hər bir vətəndaşın qarşısında duran mühüm vəzifələrdən biridir. Şəhidlərin xatirəsini yaşatmaq onların uğrunda mübarizə apardıqları dəyərlərə sadiq qalmaq, dövlətçiliyi qorumaq və gələcək nəsillərdə Vətən sevgisini daha da möhkəmləndirmək deməkdir.

Bu gün Azərbaycan xalqı öz qəhrəman övladları ilə qürur duyur. Şəhidlərimiz xalqımızın mənəvi gücünü və Vətən sevgisini, qazilərimiz isə yüksək iradə və dözümünü təcəssüm etdirirlər. Onların göstərdiyi misilsiz fədakarlıq nəticəsində əldə edilmiş Qələbə müasir Azərbaycan tarixinin ən mühüm və şərəfli səhifələrindən birinə çevrilib. 27 Sentyabrda bütün Azərbaycan xalqı şəhidlərinin müqəddəs xatirəsi qarşısında bir daha baş əyir. Bu ehtiram yalnız Anım Gününə təsadüf edən bir duyğu deyil, nəsildən-nəslə ötürülən əbədi yaddaşın ifadəsidir. Azərbaycan dövləti və xalqı öz qəhrəman övladlarını heç zaman unutmayacaq, onların xatirəsini daim yaşadacaq, qazilərinə hərtərəfli qayğı göstərəcək və şəhidlərin bizə əmanət etdiyi azad Azərbaycanın daha da güclənməsi naminə bütün imkanlarını səfərbər edəcək.

Anar Abbasov,
YAP Nərimanov rayon təşkilatının sədr müavini