27 Sentyabr – Anım Günüdür - ŞƏRH

Azərbaycan Respublikasının tarixində ən şanlı və eyni zamanda ən qürurlu səhifələrdən biri məhz 27 Sentyabr – Anım Günüdür. Bu tarix sadəcə hüzn günü deyil, həm də otuz ilə yaxın davam edən işğala son qoyan, ölkəmizin suverenliyini və ərazi bütövlüyünü bərpa edən 44 günlük Vətən müharibəsinin başlanğıc nöqtəsidir. Prezident İlham Əliyevin 2020-ci il dekabrın 2-də imzaladığı Sərəncamla hər il sentyabrın 27-si ölkəmizdə Anım Günü kimi qeyd olunur.
​2020-ci il sentyabrın 27-də səhər saatlarında Ermənistan silahlı qüvvələrinin cəbhə xətti boyu törөtdiyi genişmiqyaslı hərbi təxribatlara cavab olaraq, Azərbaycan Silahlı Qüvvələri Ali Baş Komandanın rəhbərliyi ilə dərhal əks-hücum əməliyyatına – strateji kod adı ilə "Dəmir Yumruq" əməliyyatına başladı. Bu hərbi kampaniya müasir hərb tarixinə yeni səhifə kimi yazıldı. Azərbaycan Ordusu sovet hərbi doktrinasından tamamilə fərqli olaraq, 5-ci nəsil müharibə elementlərindən, o cümlədən yüksək dəqiqlikli silahlardan, pilotsuz uçuş aparatlarından, radioelektron mübarizə sistemləri və kəşfiyyat vasitələrindən maksimum səmərəliliklə istifadə etdi. Düşmənin illər ərzində qurduğu, mühəndis-istehkam baxımından keçilməz hesab edilən "Ohanyan xətti" qısa müddətdə yarıldı.
​Müharibənin gedişində Azərbaycan Ordusunun tətbiq etdiyi asimmetrik döyüş taktikaları, xüsusilə dağlıq və meşəlik ərazilərdə Xüsusi Təyinatlı Qüvvələrin misilsiz şücaəti hərbi ekspertləri təəccübləndirdi. Şuşa əməliyyatı isə hərb tarixinə düşdü. Heç bir ağır texnikadan istifadə etmədən, yalnız yüngül silahlar və sarp qayaları dırmaşaraq şəhəri düşməndən təmizləyən Azərbaycan əsgəri hərbi sənətin unikal nümunəsini yaratdı. Hadrut qəsəbəsinin, Cəbrayıl, Füzuli, Zəngilan, Qubadlı şəhərlərinin azad edilməsi strateji təşəbbüsün tamamilə Azərbaycan Ordusunun əlində olduğunu sübut etdi.
​Bu qələbə heç də asanlıqla əldə olunmadı. Müzəffər Azərbaycan Ordusu Vətən müharibəsində 3000-dən çox şəhid verdi. Onların hər biri modern hərb elminin tələblərini yerinə yetirərkən, Vətən torpağının bütövlüyü uğrunda canlarından keçdilər. Şəhidlərimizin qanı yerdə qalmadı; onların hər biri Azərbaycan xalqının yaddaşında əbədi yaşayacaq qəhrəmanlıq simvoluna çevrildi. Eyni zamanda, minlərlə hərbçimiz döyüşlərdə ağır yaralanaraq qazi adını qazandı. Dövlətimiz hər zaman şəhid ailələrinin və qazilərin sosial müdafiəsini diqqətdə saxlayır, onlara göstərilən qayğı ali dövlət siyasətinin əsasını təşkil edir.
​Vətən müharibəsi yalnız hərbi cəbhədə deyil, həm də informasiya və diplomatik cəbhədə aparılan gərgin mübarizə idi. Azərbaycan Respublikasının Prezidenti, Müzəffər Ali Baş Komandan İlham Əliyevin xarici KİV-ə verdiyi müsahibələr, sərgilədiyi qətiyyətli siyasi iradə və prinsipial mövqe erməni yalanlarını bütün dünyaya ifşa etdi. Arxa cəbhədə isə xalq və iqtidar birliyi "Dəmir Yumruq" ideologiyası ətrafında sıx birləşmə cəbhədəki qələbəni təmin edən əsas mənəvi-psixoloji amil oldu.
​"Biz haqq yolundayıq. Bizim məqsədimiz ədalətin bərpasıdır, beynəlxalq hüququn təmin edilməsidir." – İlham Əliyev.
​Hər il sentyabrın 27-si saat 12:00-da bütün Azərbaycan ölkə üzrə bir dəqiqəlik sükutla şəhidlərin əziz xatirəsini yad edir. Avtomobillər hərəkəti dayandırır, gəmilər səs siqnalları verir, bayraqlar yarıya endirilir. Bu gün işğaldan azad edilmiş torpaqlarımızda – Qarabağda və Şərqi Zəngəzurda genişmiqyaslı bərpa-quruculuq işləri həyata keçirilir. Ağıllı şəhər və kəndlər salınır, infrastruktur yenidən qurulur. Bütün bunlar məhz 27 Sentyabrda başlanan haqq savaşının və şəhidlərimizin tökdüyü qanın nəticəsidir.

Namiq Məmmədov
YAP Füzuli rayon təşkilatınının təşkilati məslələr üzrə məsləhətçisi