27 Sentyabr – Anım Günü: Vətən uğrunda canından keçən qəhrəmanlarımızın əziz xatirəsi daim yaşayacaq - ŞƏRH

27 Sentyabr – Anım Günü Azərbaycanın müasir tarixinin ən şərəfli və qürurverici səhifələrindən birini təşkil edir. Bu əlamətdar gün 2020-ci il sentyabrın 27-də başlayan Vətən müharibəsində Azərbaycanın ərazi bütövlüyü və suverenliyi uğrunda canından keçən şəhidlərimizin əziz xatirəsinə dərin ehtiramın ifadəsidir. Hər il bu tarixdə xalqımız şəhidlərimizin müqəddəs xatirəsini böyük hörmət və ehtiramla yad edir, onların həyat yolunu, qəhrəmanlığını və Vətən qarşısında göstərdikləri fədakarlığı xatırlayır.
2020-ci il sentyabrın 27-də Azərbaycan Ordusunun həyata keçirdiyi əks-hücum əməliyyatları nəticəsində Vətən müharibəsi başladı. 44 gün davam edən müharibə Azərbaycan xalqının həmrəyliyini, dövlət-xalq-ordu birliyini və Azərbaycan əsgərinin yüksək döyüş ruhunu bütün dünyaya nümayiş etdirdi. Müzəffər Azərbaycan Ordusunun rəşadəti nəticəsində işğal altında olan torpaqlarımızın böyük hissəsi azad edildi və 2020-ci il noyabrın 10-da imzalanmış üçtərəfli bəyanatla hərbi əməliyyatlara son qoyuldu.
Bu tarixi Zəfərin əldə olunmasında şəhidlərimizin misilsiz xidmətləri vardır. Onlar Azərbaycanın ərazi bütövlüyünün bərpası naminə öz həyatlarını qurban verdilər. Şəhidlik zirvəsinə ucalan hər bir Vətən övladının həyat yolu Azərbaycan gəncliyi üçün örnək, milli yaddaşımız üçün isə əbədi qəhrəmanlıq nümunəsidir. Onların göstərdiyi fədakarlıq xalqımızın Vətən sevgisinin, torpağa bağlılığının və milli iradəsinin ən yüksək ifadələrindən biridir.
Anım Günü yalnız şəhidlərimizi yad etmək üçün deyil, onların bizə əmanət etdiyi Vətənə sahib çıxmaq məsuliyyətini bir daha dərk etmək üçün də mühüm əhəmiyyət daşıyır. Şəhidlərimizin qanı bahasına əldə olunan Zəfər Azərbaycan tarixində yeni mərhələnin başlanğıcını qoydu. Bu gün azad edilmiş ərazilərdə həyata keçirilən genişmiqyaslı bərpa və quruculuq işləri, yeni yolların, məktəblərin, yaşayış məhəllələrinin və digər sosial obyektlərin yaradılması Böyük Qayıdış prosesinin mühüm tərkib hissəsinə çevrilib.
Azərbaycan xalqı şəhid ailələrinə və müharibə iştirakçılarına daim xüsusi diqqət və qayğı göstərir. Şəhidlərin ailələrinin sosial müdafiəsinin gücləndirilməsi, onların problemlərinin həlli və rifahının yaxşılaşdırılması istiqamətində həyata keçirilən tədbirlər dövlət siyasətinin mühüm istiqamətlərindəndir. Bu münasibət şəhidlərimizin əziz xatirəsinə göstərilən ehtiramın real ifadəsidir.
27 Sentyabr həm də Azərbaycan xalqının sarsılmaz birliyinin rəmzidir. Vətən müharibəsi dövründə ölkəmizin bütün bölgələrindən olan insanlar eyni amal ətrafında birləşərək ordumuza mənəvi dəstək göstərdilər. Ön cəbhədə əsgər və zabitlərimiz döyüşdüyü halda, arxa cəbhədə xalqımızın hər bir nümayəndəsi öz imkanları ilə Vətən mübarizəsinə töhfə verdi. Bu birlik Azərbaycan dövlətinin gücünü daha da artırdı.
Şəhidlərimizin qəhrəmanlığı gənc nəslin vətənpərvərlik ruhunda tərbiyəsində də mühüm rol oynayır. Onların həyat yolu, döyüş yolu və Vətən sevgisi məktəblərdə, ali təhsil müəssisələrində, müxtəlif tədbirlərdə gənclərə çatdırılır. Məqsəd yalnız keçmişi xatırlamaq deyil, həm də gələcək nəsillərə Vətənin, dövlətçiliyin və milli dəyərlərin qorunmasının nə qədər müqəddəs məsuliyyət olduğunu aşılamaqdır.
Bu gün Azərbaycan öz ərazi bütövlüyünü və suverenliyini tam təmin etmiş dövlət kimi gələcəyə doğru inamla addımlayır. Qarabağda və Şərqi Zəngəzurda aparılan quruculuq işləri, keçmiş məcburi köçkünlərin doğma yurdlarına qayıdışı və həmin ərazilərin yenidən dirçəldilməsi şəhidlərimizin arzusunda olduğu güclü və bütöv Azərbaycanın təcəssümüdür.
27 Sentyabr – Anım Günü hər bir azərbaycanlı üçün müqəddəs ehtiram günüdür. Bu gün şəhidlərimizin xatirəsi qarşısında baş əyir, onların ailələrinə dərin hörmət və ehtiramımızı bildiririk. Şəhidlərimizin adı xalqımızın yaddaşında əbədi yaşayacaq, onların qəhrəmanlığı gələcək nəsillər üçün Vətən sevgisinin və fədakarlığın ən parlaq nümunələrindən biri olaraq qalacaq.
Şəhidlərimizin əziz xatirəsini ehtiramla yad edir, onların ruhu qarşısında baş əyirik. Allah bütün şəhidlərimizə rəhmət eləsin!

Rauf Nəcəfov
YAP Sədərək rayon təşkilatının məsləhətçisi