İnvestisiya, etimad və Azərbaycanın gələcəyə baxışı - ŞƏRH

Azərbaycan Respublikasının Prezidenti İlham Əliyevin 26 sentyabr 2026-cı ildə Bakıda keçirilən II Azərbaycan Beynəlxalq İnvestisiya Forumu çərçivəsindəki çıxışı Azərbaycanın dəyişən qlobal iqtisadi və geosiyasi mühitdə qarşıya qoyduğu strateji hədəflərin təqdimatı baxımından diqqət çəkir. “Parçalanmış dünyada etimadın bərpası: Cənubi Qafqaz qlobal bağlantı və investisiya sabitliyinin dayağı kimi” mövzusunda keçirilən tədbirdə dövlət başçısı investisiya, iqtisadi sabitlik, enerji, nəqliyyat, texnologiya və regional əməkdaşlıq məsələləri ilə bağlı fikirlərini bölüşüb.

Çıxışın əsas məqamlarından biri investisiyanın yalnız maliyyə kapitalı kimi deyil, uzunmüddətli tərəfdaşlıq, texnologiya, bilik və yeni imkanların əldə edilməsi vasitəsi kimi təqdim olunmasıdır. Bu yanaşma müasir dünyada investisiya uğrunda rəqabətin yalnız maliyyə resursları deyil, həm də etimad, sabitlik və inkişaf perspektivləri üzərində qurulduğunu göstərir. Belə bir yanaşmada ölkənin siyasi sabitliyi və iqtisadi dayanıqlığı investor üçün kapitalın qorunması ilə yanaşı, gələcək əməkdaşlığın etibarlı təminatı kimi də çıxış edir.

Azərbaycanın son illərdə formalaşdırdığı nəqliyyat və enerji infrastrukturu ölkənin regional iqtisadi əlaqələrdə rolunu genişləndirən əsas amillərdəndir. Şərq-Qərb və Şimal-Cənub istiqamətlərində yerləşən Azərbaycan öz coğrafi mövqeyini nəqliyyat-logistika imkanları ilə tamamlayaraq regional bağlantıların mühüm həlqələrindən birinə çevrilmək istiqamətində fəaliyyət göstərir. Bu proses ölkənin yalnız tranzit imkanlarını deyil, həm də beynəlxalq investisiya üçün cəlbediciliyini artıran amil kimi çıxış edir.

Enerji sahəsində isə ənənəvi neft-qaz sektorunun imkanları ilə yanaşı, bərpaolunan enerji və elektrik enerjisi istehsalının inkişaf etdirilməsi yeni mərhələnin əsas istiqamətlərindən biri kimi görünür. Enerji potensialının rəqəmsal texnologiyalar, data mərkəzləri və süni intellekt kimi yeni sahələrlə əlaqələndirilməsi Azərbaycanın gələcək iqtisadi modelində texnologiyanın rolunun artacağını göstərir. Bununla yanaşı, insan kapitalının inkişafı, müasir bilik və peşəkar kadr hazırlığı bu transformasiyanın əsas şərtlərindən biri olaraq qalır. Çünki gələcəyin iqtisadi rəqabətində təbii resurslarla yanaşı, bilik, innovasiya və peşəkar insan kapitalı da mühüm strateji üstünlüyə çevrilir.

Çıxışda su qıtlığı və ərzaq təhlükəsizliyi kimi qlobal problemlərə toxunulması da xüsusi əhəmiyyət daşıyır. İqlim dəyişmələri şəraitində su ehtiyatlarının qorunması və səmərəli idarə edilməsi iqtisadi inkişaf, kənd təsərrüfatı və ərzaq təhlükəsizliyi ilə birbaşa əlaqəlidir. Bu baxımdan su itkilərinin azaldılması, müasir suvarma texnologiyalarının tətbiqi, meliorasiya infrastrukturunun yenilənməsi və su ehtiyatlarının rəqəmsal idarə olunması gələcək inkişaf baxımından mühüm istiqamətlərdəndir. Su ehtiyatlarının səmərəli idarə olunması qarşıdakı dövrdə yalnız təsərrüfat məsələsi deyil, həm də iqtisadi və milli təhlükəsizliyin mühüm amillərindən biri kimi daha böyük əhəmiyyət qazana bilər.

Forum çərçivəsində konkret investisiya sənədlərinin mübadiləsinin aparılması da səsləndirilən strateji fikirlərin praktik müstəvidə davamını göstərdi. “Abşeron” qaz-kondensat yatağının tammiqyaslı işlənməsi üzrə Yekun İnvestisiya Qərarı, SOCAR ilə “Comstock Resources” arasında strateji tərəfdaşlığa dair Çərçivə Sazişi və digər sənədlər forumun real investisiya əməkdaşlığı baxımından əhəmiyyətini nümayiş etdirib.

Prezident İlham Əliyevin çıxışının düşündürücü tərəfi ondan ibarətdir ki, müasir dövrdə əsas məsələ yalnız investisiyanın həcmi deyil, onun ölkənin gələcək inkişafına hansı töhfəni verməsidir. İnvestisiya yeni texnologiya, ixtisaslı kadr, yüksək əlavə dəyər, ixrac imkanları və dayanıqlı iqtisadi inkişaf yaratdığı halda daha geniş strateji məna qazanır.

Bu baxımdan Azərbaycanın qarşısında duran əsas vəzifələrdən biri mövcud enerji, maliyyə, coğrafi və insan resurslarını bir-biri ilə əlaqələndirərək yeni iqtisadi imkanlara çevirməkdir. Təbii sərvətlərdən əldə olunan gəlirlərin texnologiyaya, infrastruktura və insan kapitalına yönəldilməsi, qeyri-neft sektorunun və yüksək əlavə dəyər yaradan sahələrin inkişaf etdirilməsi ölkənin gələcək iqtisadi dayanıqlığının mühüm şərtlərindən biri kimi çıxış edir.

Belə ki, II Azərbaycan Beynəlxalq İnvestisiya Forumu çərçivəsində Prezident İlham Əliyevin çıxışı investisiyanın iqtisadi göstəricidən daha geniş məna daşıdığını göstərir. İnvestisiya etimad, tərəfdaşlıq, texnologiya və gələcəyə yönəlmiş baxışın ifadəsidir. Əsas məsələ isə bu imkanları dayanıqlı iqtisadi inkişafa, milli rifaha və gələcək nəsillər üçün daha güclü iqtisadi potensiala çevirməkdir.

Kamran Quliyev

YAP Yasamal rayon “Moskva pr. 67” ünvanı (ADSEA)

üzrə ərazi partiya təşkilatının sədr müavini