Yeni Azərbaycan Partiyasının VIII Qurultayı: Zəfərin yeni siyasi mərhələsi - ŞƏRH

02 oktyabr 2026-cı il tarixində keçirilmiş Yeni Azərbaycan Partiyasının VIII Qurultayı Azərbaycanın ictimai-siyasi həyatında mühüm hadisə olmaqla yanaşı, ölkənin son illərdə əldə etdiyi tarixi nailiyyətlərin, qarşıda duran strateji hədəflərin və dövlət siyasətinin əsas istiqamətlərinin geniş müzakirəsi baxımından xüsusi əhəmiyyət kəsb etmişdir. Qurultay Azərbaycan Respublikasının ərazi bütövlüyünün və suverenliyinin tam bərpa olunmasından sonra keçirilən ilk qurultay kimi ölkənin siyasi tarixində mühüm mərhələ təşkil edir.
Azərbaycan Respublikasının Prezidenti, Yeni Azərbaycan Partiyasının Sədri İlham Əliyev çıxışında son onilliklər ərzində dövlətçilik sahəsində həyata keçirilmiş ardıcıl siyasətin nəticələrini təhlil etmiş, əldə olunmuş Zəfərin təsadüfi deyil, uzunmüddətli və məqsədyönlü strategiyanın məntiqi nəticəsi olduğunu vurğulamışdır. Dövlət başçısının çıxışında xüsusilə qeyd edilmişdir ki, Azərbaycanın qətiyyətli mövqeyi, ardıcıl fəaliyyəti, düzgün siyasi və diplomatik addımları, eləcə də xalqın vahid mövqedən çıxış etməsi ölkəmizə qarşı yönəlmiş bütün bəd niyyətlərin qarşısının alınmasında həlledici rol oynamışdır.
Azərbaycan xalqının milli birlik və həmrəylik nümayiş etdirərək öz haqqını tələb etməsi, dövlət rəhbərliyinin isə bu iradəni ardıcıl və prinsipial şəkildə həyata keçirməsi Qarabağ məsələsinin həlli ilə nəticələnmişdir. Xalq-iqtidar birliyi Vətən müharibəsində və sonrakı dövrdə dövlətin qarşısında duran tarixi vəzifələrin yerinə yetirilməsinin mühüm amillərindən biri olmuşdur. Azərbaycan xalqının “dəmir yumruq” ətrafında birləşməsi milli iradənin və dövlətçilik əzminin ifadəsinə çevrilmişdir.
Prezident İlham Əliyevin çıxışında Azərbaycanın tarixi Zəfərinin formalaşmasına aparan siyasi proseslərə də xüsusi diqqət yetirilmişdir. Bildirilmişdir ki, Yeni Azərbaycan Partiyasının təsis qurultayı ölkənin sonrakı siyasi inkişafının və gələcək qələbələrinin başlanğıc nöqtələrindən biri olmuşdur. Partiyanın yaranması ilə Azərbaycanda dövlətçilik, milli maraqlar və siyasi sabitlik üzərində qurulan yeni inkişaf mərhələsinin əsası qoyulmuşdur.
Çıxışda Ulu Öndər Heydər Əliyevin Azərbaycan tarixindəki müstəsna rolu xüsusi vurğulanmışdır. Qeyd olunmuşdur ki, Heydər Əliyevin yenidən siyasi hakimiyyətə qayıdışı xalqın tələbi və tarixi zərurət idi. Ulu Öndərin dövlətçilik konsepsiyası Azərbaycanın müstəqilliyinin möhkəmləndirilməsi, ölkədə sabitliyin təmin olunması və milli maraqlara əsaslanan siyasi kursun formalaşdırılması baxımından fundamental əhəmiyyət daşımışdır. Onun siyasi irsi və müəyyən etdiyi inkişaf strategiyası bu gün də davam etdirilir.
Prezident İlham Əliyev çıxışında Azərbaycan dövlətinin əldə etdiyi nəticələrin Ulu Öndərin siyasi xəttinin ardıcıl davam etdirilməsinin nəticəsi olduğunu bildirmişdir. Heydər Əliyevin dövlətçilik ideyaları müasir Azərbaycanın siyasi, iqtisadi və sosial inkişafının mühüm təməl prinsiplərindən biri olaraq qalır. Bu siyasi kursun əsas mahiyyəti milli maraqların qorunması, dövlət müstəqilliyinin möhkəmləndirilməsi, xalqın rifahının yüksəldilməsi və Azərbaycanın beynəlxalq mövqelərinin gücləndirilməsidir.
Azərbaycanın ərazi bütövlüyünün və suverenliyinin tam bərpası dövlətimizin beynəlxalq nüfuzunu daha da artırmışdır. Bu gün Azərbaycan beynəlxalq münasibətlər sistemində öz milli maraqlarını qətiyyətlə müdafiə edən, müstəqil siyasət yürüdən və böyük hörmətə malik dövlət kimi qəbul olunur. Ölkənin regional və qlobal proseslərdə artan rolu onun siyasi, iqtisadi, enerji və təhlükəsizlik imkanlarının genişlənməsi ilə bilavasitə əlaqəlidir.
Dövlət başçısının çıxışında Azərbaycanın təhlükəsizliyinin təmin edilməsi məsələsi də mühüm yer tutmuşdur. Əsas vəzifələrdən biri kimi hərbi gücün daha da artırılması müəyyən edilmişdir. Azərbaycan sülhün tərəfdarı olmaqla yanaşı, öz təhlükəsizliyini və milli maraqlarını qorumaq üçün daim hazırlıqlı olmalıdır. Dövlətin müdafiə qabiliyyətinin yüksək səviyyədə saxlanılması ölkənin gələcək təhlükəsizliyinin mühüm təminatlarından biridir.
Prezident İlham Əliyev Azərbaycan-Ermənistan münasibətlərində yeni reallıqların yarandığını diqqətə çatdırmışdır. Hazırda iki ölkə arasında münaqişənin və müharibənin olmaması, sərhədlərdə sakitliyin hökm sürməsi regionda yeni siyasi şəraitin formalaşdığını göstərir. Bununla yanaşı, Azərbaycan istənilən hərbi təxribata cavab verməyə daim hazır olmalıdır. Bu yanaşma sülh və sabitliyin qorunması ilə yanaşı, dövlətin müdafiə imkanlarının yüksək səviyyədə saxlanılmasını zəruri edir.
Azərbaycan xalqının təhlükəsizlik və əmin-amanlıq şəraitində yaşaması dövlət siyasətinin əsas prioritetlərindən biridir. Ölkədə yaradılmış sabitlik və ictimai-siyasi həmrəylik dövlətin gələcək inkişafı üçün mühüm zəmin formalaşdırır. Bu nailiyyətlər Azərbaycan vətəndaşlarında dövlətə, milli ideyalara və ölkənin gələcəyinə inamı daha da gücləndirir. Dövlət başçısının ifadə etdiyi kimi, hər bir vətənpərvər azərbaycanlının öz dövləti ilə fəxr etməsi üçün kifayət qədər əsas vardır.
Xarici siyasət məsələlərinə toxunan Prezident İlham Əliyev Azərbaycanın müstəqil və milli maraqlara əsaslanan xarici siyasət kursunun bundan sonra da davam etdiriləcəyini bildirmişdir. Xarici siyasətin əsas məqsədlərindən biri Azərbaycanın daxili işlərinə hər hansı xarici müdaxiləyə imkan verməmək, dövlətin suverenliyini və siyasi müstəqilliyini etibarlı şəkildə qorumaqdır. Azərbaycanın beynəlxalq tərəfdaşlarla münasibətləri qarşılıqlı hörmət, bərabərlik və milli maraqlar əsasında qurulur.
Azərbaycanın xarici siyasət sahəsində atdığı addımlar beynəlxalq səviyyədə geniş təqdir olunur. Ölkənin müxtəlif dövlətlərlə münasibətlərində prinsipial və ardıcıl mövqe nümayiş etdirməsi onun etibarlı tərəfdaş kimi nüfuzunu möhkəmləndirir. Azərbaycan heç bir dövlətə qarşı ikili standartlar və riyakarlıq nümayiş etdirmədən, öz mövqeyini açıq və aydın şəkildə ortaya qoyur.
İslam həmrəyliyinin gücləndirilməsi də Azərbaycanın xarici siyasətinin mühüm istiqamətlərindən biridir. Azərbaycan müsəlman ölkələri arasında əməkdaşlığın inkişafına, qarşılıqlı anlaşmanın möhkəmləndirilməsinə və həmrəyliyin gücləndirilməsinə öz töhfəsini verir. Ölkəmizin bu sahədə birləşdirici rolunun artması Azərbaycanın beynəlxalq nüfuzunun mühüm göstəricilərindən biridir.
Qurultayda ideoloji işin təşkilinə də xüsusi diqqət yetirilmişdir. Azərbaycan reallıqlarının, ölkədə həyata keçirilən genişmiqyaslı işlərin və müsbət ictimai-siyasi ab-havanın cəmiyyətə düzgün çatdırılması mühüm vəzifə kimi qarşıya qoyulmuşdur. Bu istiqamətdə Yeni Azərbaycan Partiyasının fəallarının üzərinə xüsusi məsuliyyət düşür. İctimaiyyətə doğru və obyektiv məlumatların çatdırılması, milli dəyərlərin və dövlətçilik ideyalarının təbliği ideoloji fəaliyyətin əsas istiqamətlərindən olmalıdır.
Sosial siyasət məsələləri də dövlət başçısının çıxışında mühüm yer tutmuşdur. Əhalinin sosial rifahının yüksəldilməsi istiqamətində tədbirlərin davam etdiriləcəyi, gələn ildən minimum əməkhaqqının, pensiyaların və sosial müavinətlərin artırılacağı bildirilmişdir. Bu, dövlətin sosialyönümlü siyasətinin davamlı xarakter daşıdığını və iqtisadi inkişafın nəticələrinin əhalinin rifahının yüksəldilməsinə yönəldildiyini göstərir.
Azərbaycanın iqtisadi və enerji potensialı ölkənin strateji əhəmiyyətini artıran əsas amillərdən biri kimi qiymətləndirilmişdir. Azərbaycan nadir ölkələrdəndir ki, müxtəlif növ enerji resurslarını istehsal edir, hasil edir və dünya bazarlarına ixrac edir. Enerji siyasəti ölkənin iqtisadi imkanlarının genişlənməsi ilə yanaşı, beynəlxalq enerji təhlükəsizliyinə verdiyi töhfəni də artırır.
İnvestisiya forumları çərçivəsində əldə edilmiş razılaşmalar və imzalanmış kontraktlar Azərbaycanın enerji sektorunun gələcək inkişafı baxımından mühüm perspektivlər yaradır. Bu müqavilələrin bir hissəsinin neft və qaz hasilatının artırılmasına xidmət etməsi ölkənin enerji potensialından daha səmərəli istifadə üçün yeni imkanlar formalaşdırır.
Azərbaycanın iqtisadi və siyasi imkanlarının genişlənməsi onu regionun və daha geniş coğrafiyanın mühüm geosiyasi və təhlükəsizlik faktorlarından birinə çevirmişdir. Ölkənin enerji, nəqliyyat, logistika və təhlükəsizlik sahələrində həyata keçirdiyi layihələr onun regional proseslərdə rolunu daha da artırır. Azərbaycanın artan beynəlxalq çəkisi həyata keçirilən ardıcıl və məqsədyönlü dövlət siyasətinin nəticəsidir.
Çıxışda işğaldan azad edilmiş ərazilərin bərpası və Böyük Qayıdış proqramının həyata keçirilməsi də xüsusi yer tutmuşdur. Azərbaycanın şanlı Zəfərindən sonra əsas fəaliyyət istiqamətlərindən biri ərazi bütövlüyünün tam bərpası ilə yanaşı, azad edilmiş torpaqlarda genişmiqyaslı quruculuq işlərinin aparılması olmuşdur. Hazırda həmin ərazilərdə müasir şəhər və kəndlərin salınması, infrastrukturun yenilənməsi və insanların doğma torpaqlarına qayıdışının təmin edilməsi istiqamətində mühüm layihələr həyata keçirilir.
Böyük Qayıdış prosesinin qarşıdakı illərdə daha da sürətlənməsi nəzərdə tutulur. İşğaldan azad olunmuş ərazilərin bərpası yalnız infrastruktur layihəsi deyil, həm də tarixi ədalətin bərpasının, milli yaddaşın qorunmasının və insanların öz doğma yurdlarına qayıdışının mühüm ifadəsidir.
Ümumilikdə, Yeni Azərbaycan Partiyasının VIII Qurultayında Prezident İlham Əliyevin çıxışı Azərbaycanın keçdiyi inkişaf yolunun, əldə edilmiş tarixi Zəfərin və qarşıda duran strateji məqsədlərin sistemli şəkildə təqdimatı kimi qiymətləndirilə bilər. Çıxışda Ulu Öndər Heydər Əliyevin siyasi irsinə sədaqət, milli birlik, dövlətçilik, suverenlik, təhlükəsizlik, iqtisadi inkişaf, sosial rifah, müstəqil xarici siyasət və Böyük Qayıdış kimi əsas istiqamətlər vahid dövlət siyasətinin tərkib hissələri kimi təqdim edilmişdir.
Yeni Azərbaycan Partiyasının VIII Qurultayı Azərbaycanın yeni tarixi mərhələyə qədəm qoyduğunu nümayiş etdirən mühüm siyasi hadisə olmuşdur. Ərazi bütövlüyü və suverenliyi tam təmin edilmiş Azərbaycan qarşıdakı dövrdə əldə etdiyi nailiyyətləri möhkəmləndirməklə yanaşı, iqtisadi və sosial inkişafını sürətləndirmək, müdafiə qüdrətini artırmaq, beynəlxalq mövqelərini daha da gücləndirmək və azad edilmiş ərazilərdə Böyük Qayıdışı uğurla başa çatdırmaq kimi mühüm vəzifələri qarşıya qoyur.
Bu baxımdan, Prezident İlham Əliyevin VIII Qurultaydakı çıxışı Azərbaycanın müasir inkişaf strategiyasının əsas istiqamətlərini müəyyən edən, milli birlik və dövlətçilik prinsiplərini önə çəkən, ölkənin gələcək inkişaf prioritetlərini aydın şəkildə ortaya qoyan mühüm siyasi nitq kimi xarakterizə oluna bilər.

Kənan Quliyev
YAP Laçın rayon təşkilatının məsləhətçisi