YAP Tərtər rayon təşkilatının Borsunlu ərazi partiya təşkilatında tədbir keçirilib - FOTO

Yeni Azərbaycan Partiyası (YAP) Tərtər rayon təşkilatının Borsunlu ərazi partiya təşkilatında Azərbaycan Respublikasının Prezidenti İlham Əliyevin Yeni Azərbaycan Partiyasının VIII Qurultayında səsləndirdiyi fikirlər və qarşıya qoyduğu vəzifələrə həsr olunmuş tədbir təşkil edilib.

Tədbirin əvvəlində Ümummilli Lider Heydər Əliyevin və Azərbaycanın ərazi bütövlüyü, suverenliyi uğrunda canlarından keçmiş şəhidlərin əziz xatirəsi bir dəqiqəlik sükutla yad olunub.

Görüşdə çıxış edən YAP Tərtər rayon təşkilatının sədri Eldar Əsədov Prezident İlham Əliyevin VIII Qurultaydakı nitqinin partiyanın gələcək fəaliyyət istiqamətlərinin müəyyənləşdirilməsi və ölkənin qarşısında duran strateji hədəflərin həyata keçirilməsi baxımından mühüm əhəmiyyət daşıdığını qeyd edib. O bildirib ki, Ümummilli Lider Heydər Əliyevin müəyyənləşdirdiyi dövlətçilik xətti bu gün Prezident İlham Əliyevin rəhbərliyi ilə yeni nailiyyətlərlə zənginləşdirilir.

E.Əsədov vurğulayıb ki, Azərbaycanın ərazi bütövlüyünün və dövlət suverenliyinin tam bərpa olunması, beynəlxalq nüfuzunun yüksəlməsi, iqtisadi potensialının gücləndirilməsi və müdafiə qabiliyyətinin artırılması həyata keçirilən ardıcıl siyasətin mühüm nəticələrindəndir. O, qarşıdakı dövrdə ölkənin inkişafı naminə müəyyən edilmiş hədəflərin reallaşdırılmasında partiya üzvlərinin fəallığının və məsuliyyətinin vacibliyini diqqətə çatdırıb.

Daha sonra çıxış edən Borsunlu ərazi partiya təşkilatının sədri Ramin Məhərrəmov Prezident İlham Əliyevin VIII Qurultaydakı nitqinin Azərbaycanın gələcək inkişaf strategiyasının müəyyənləşdirilməsi baxımından əhəmiyyətini qeyd edib. O bildirib ki, qurultayda ölkəmizin qazandığı uğurlarla yanaşı, yeni dövrün tələbləri, mövcud çağırışlar və onların aradan qaldırılması istiqamətində qarşıya qoyulan əsas vəzifələr də diqqət mərkəzində olub.

Tədbirdə çıxış edən digər iştirakçılar da Prezident İlham Əliyevin qurultaydakı nitqində müəyyənləşdirilən prioritetlərin ölkənin davamlı inkişafına, milli maraqların qorunmasına və əldə olunmuş nailiyyətlərin daha da möhkəmləndirilməsinə xidmət etdiyini bildiriblər. Çıxışlarda partiyanın qarşısında duran vəzifələrin uğurla yerinə yetirilməsi, dövlətçilik prinsiplərinin təbliği və ictimai-siyasi fəallığın artırılmasının vacibliyi vurğulanıb.

Sonda Prezident İlham Əliyevin rəhbərliyi ilə Azərbaycanın qarşıdakı illərdə də mühüm uğurlar qazanacağına əminlik ifadə olunub, müəyyən edilmiş hədəflərin həyata keçirilməsində partiya üzvlərinin üzərinə düşən vəzifələr diqqətə çatdırılıb.