Azərbaycan beynəlxalq dialoq və etimad məkanına çevrilib - ŞƏRH

2026-cı il oktyabrın 15-də Bakıda Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) VII Zirvə Görüşünün keçirilməsi Azərbaycanın beynəlxalq münasibətlər sistemində artan rolunun mühüm göstəricilərindən biri oldu. Müxtəlif ölkələrin dövlət və hökumət başçılarının, nümayəndə heyətlərinin iştirak etdiyi bu mötəbər tədbir qlobal və regional məsələlərin müzakirəsi, qarşılıqlı anlaşmanın möhkəmləndirilməsi və dövlətlərarası əməkdaşlığın genişləndirilməsi baxımından xüsusi əhəmiyyət daşıyırdı.

Prezident İlham Əliyev Zirvə Görüşündəki çıxışında ölkəmizin müstəqil xarici siyasət kursunu, beynəlxalq hüquqa münasibətini, regional təhlükəsizliyə verdiyi önəmi və AQEM-ə sədrliyi dövründə həyata keçirilən təşəbbüsləri diqqətə çatdırdı. Dövlət başçısının nitqi Azərbaycanın yalnız beynəlxalq tədbirlərə ev sahibliyi edən ölkə deyil, həm də mühüm məsələlərin müzakirəsinə və əməkdaşlığın inkişafına töhfə verən etibarlı tərəfdaş olduğunu bir daha nümayiş etdirdi.
Prezident İlham Əliyev çıxışında Azərbaycanın xarici siyasətinin təməl prinsiplərini xüsusi vurğuladı. Dövlətlər arasında suveren bərabərliyin qorunması, daxili işlərə qarışmamaq, ərazi bütövlüyünə və suverenliyə hörmət göstərilməsi ölkəmizin beynəlxalq münasibətlərdə əsas götürdüyü prinsiplərdir. Dövlət başçısının bu mövqeyi müasir dünyada sülhün və təhlükəsizliyin təmin olunmasının hüquqa əsaslanan münasibətlərdən, qarşılıqlı hörmətdən və ədalətli yanaşmadan asılı olduğunu göstərir. Prezident İlham Əliyev beynəlxalq münasibətlərdə ikili standartların tətbiqini də tənqid edərək, münaqişələrin həllində seçici yanaşmaların yolverilməzliyini önə çəkdi. Onun çıxışında əsas mesajlardan biri bu idi ki, beynəlxalq təşkilatların qəbul etdiyi qərarlar kağız üzərində qalmamalı, onların icrasını təmin edən təsirli mexanizmlər mövcud olmalıdır.
Prezident İlham Əliyev Azərbaycanın AQEM-ə sədrliyi dövründə təşkilatın institusional imkanlarının gücləndirilməsinə xüsusi diqqət yetirildiyini qeyd etdi. Nəqliyyat və bağlantılar, rəqəmsallaşma, ətraf mühitin mühafizəsi, turizm, təhsil və elm sahələrində əməkdaşlığın inkişaf etdirilməsi bu fəaliyyətin əsas istiqamətlərini təşkil edib. Bu təşəbbüslər Asiya ölkələri arasında qarşılıqlı əlaqələrin genişləndirilməsinə, iqtisadi inkişafın təşviqinə və ümumi təhlükəsizlik mühitinin möhkəmləndirilməsinə xidmət edir. Müasir dövrdə dövlətlərin inkişafı təkcə milli resurslardan deyil, həm də beynəlxalq əməkdaşlıq imkanlarından səmərəli istifadə etməkdən asılıdır. Azərbaycanın Avropa ilə Asiyanın qovşağında yerləşməsi ölkəmizə nəqliyyat, enerji və iqtisadi əlaqələrin inkişafında xüsusi imkanlar yaradır. Prezident İlham Əliyevin çıxışında bu coğrafi üstünlüyün siyasi və iqtisadi əməkdaşlıqla birləşdirilməsi Azərbaycanın Avrasiya məkanında mühüm bağlantı mərkəzi kimi rolunu ön plana çıxardı.
Bakı Zirvə Görüşü Azərbaycanın beynəlxalq əməkdaşlıqda fəal iştirakının, müxtəlif dövlətlər arasında dialoqun təşviqinə verdiyi töhfənin növbəti nümunəsi oldu. Ölkəmizin belə mötəbər tədbirlərə ev sahibliyi etməsi diplomatik əlaqələrin genişlənməsinə, qarşılıqlı anlaşmanın güclənməsinə və Azərbaycanın beynəlxalq təşəbbüslərinin tanıdılmasına şərait yaradır.
Prezident İlham Əliyevin çıxışı Azərbaycanın milli maraqlara əsaslanan müstəqil siyasətinin, dövlət suverenliyinə sadiqliyinin və beynəlxalq münasibətlərdə ədalət prinsipinə verdiyi önəmin ifadəsi kimi yadda qaldı. Dövlət başçısının səsləndirdiyi fikirlər regional təhlükəsizlik, sülhün qorunması və çoxtərəfli əməkdaşlığın inkişafı kimi məsələlərin bir-biri ilə sıx bağlı olduğunu bir daha göstərdi.
Nəticə etibarilə, AQEM-in VII Zirvə Görüşü Azərbaycanın beynəlxalq nüfuzunun, diplomatik fəallığının və əməkdaşlıq imkanlarının nümayişi baxımından əlamətdar hadisə oldu. Prezident İlham Əliyevin çıxışı isə ölkəmizin sülhə, qarşılıqlı hörmətə, suverenliyə və beynəlxalq hüquqa əsaslanan münasibətlərin tərəfdarı olduğunu bir daha təsdiqlədi. Azərbaycanın bu istiqamətdə həyata keçirdiyi siyasət regionda sabitliyin möhkəmləndirilməsi və beynəlxalq əməkdaşlığın yeni imkanlarının yaradılması baxımından mühüm əhəmiyyət daşıyır.

Gündüz Alıkişiyev

YAP Tərtər rayon təşkilatının məsləhətçisi