AQEM-in VII Zirvə Görüşü: Bakıdan dünyaya sülh, etimad və əməkdaşlıq mesajı - ŞƏRH

2026-cı il oktyabrın 15-də Bakıda Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) VII Zirvə Görüşü keçirildi. Dövlət və hökumət başçılarını, nümayəndə heyətlərinin rəhbərlərini bir araya gətirən bu mötəbər tədbir beynəlxalq dialoqun genişləndirilməsi, dövlətlər arasında qarşılıqlı etimadın möhkəmləndirilməsi və təhlükəsizlik məsələlərinin müzakirəsi baxımından mühüm əhəmiyyət daşıyırdı.
Prezident çıxışında AQEM üzv dövlətlərinə Azərbaycanın sədrliyinə göstərdikləri dəstəyə görə təşəkkürünü bildirdi. Dövlət başçısı vurğuladı ki, bu dəstək ölkəmizə göstərilən hörmətin və etimadın ifadəsidir. Azərbaycanın beynəlxalq platformalarda fəal iştirakı və çoxtərəfli əməkdaşlığa verdiyi töhfələr ölkənin diplomatik əlaqələrinin genişlənməsinə xidmət edir.
Prezident İlham Əliyev çıxışında Azərbaycanın əlverişli coğrafi mövqeyinə xüsusi diqqət yetirdi. Asiya ilə Avropanın kəsişməsində yerləşən ölkəmiz siyasi, iqtisadi, nəqliyyat, enerji və humanitar sahələrdə əməkdaşlığın inkişafında mühüm rol oynayır. Bu imkanlar Azərbaycanın yalnız regional deyil, daha geniş Avrasiya məkanında əlaqələndirici mərkəz kimi əhəmiyyətini artırır.
Bu prinsiplər dövlətlərin bərabərhüquqluluğuna, daxili işlərinə qarışmamağa, suverenliyə və ərazi bütövlüyünə hörmətə əsaslanır. Prezident beynəlxalq münasibətlərdə ikili standartların tətbiqinin yolverilməz olduğunu vurğulayaraq dövlətlərarası münaqişələrə münasibətdə vahid hüquqi meyarların vacibliyini önə çəkdi.
İlham Əliyev qeyd etdi ki, BMT Təhlükəsizlik Şurası 1993-cü ildə işğal olunmuş ərazilərdən erməni qüvvələrinin çıxarılmasını tələb edən dörd qətnamə qəbul etmişdi. Lakin bu qərarların uzun müddət icra olunmaması beynəlxalq hüququn tətbiqində ciddi problemlərin mövcudluğunu göstərirdi. Prezidentin fikrincə, beynəlxalq təşkilatların qəbul etdiyi qərarların həyata keçirilməsi üçün təsirli mexanizmlər olmalıdır. Əks halda, işğal və təcavüz hallarının qarşısının alınması çətinləşir.
Dövlət başçısı 2020-ci ildə baş vermiş Vətən müharibəsinin 44 gün davam etdiyini və Azərbaycanın döyüş meydanında tarixi qələbə qazandığını bildirdi. 10 noyabr 2020-ci il tarixli üçtərəfli bəyanatla hərbi əməliyyatlar dayandırıldı. Prezident, həmçinin 2023-cü ilin sentyabrında həyata keçirilmiş tədbirlər nəticəsində Azərbaycanın suverenliyinin və ərazi bütövlüyünün tam bərpa olunduğunu vurğuladı.
Dövlət başçısı bildirdi ki, Azərbaycan öz suverenliyini və ərazi bütövlüyünü bərpa etdikdən sonra Ermənistana sülh təklif edib. O, müharibənin xalqımızın seçimi olmadığını, lakin Azərbaycanın öz torpaqlarını müdafiə etmək məcburiyyətində qaldığını qeyd etdi.

Prezident İlham Əliyev çıxışında Azərbaycanın AQEM-ə sədrliyi dövründə təşkilatın gücləndirilməsinə xüsusi diqqət yetirildiyini bildirdi. Nəqliyyat və bağlantılar, rəqəmsallaşma, ətraf mühitin mühafizəsi, turizm, təhsil və elm sahələrində əməkdaşlığın təşviqi əsas istiqamətlər sırasında yer aldı.
Dövlət başçısı üzv dövlətlərin dəstəyi ilə həyata keçirilən təşəbbüslərin AQEM-in institusional və hüquqi imkanlarının möhkəmlənməsinə töhfə verdiyini qeyd etdi. Təşkilatın üzvlük dairəsinin genişlənməsi və dialoq imkanlarının artması onun regional əməkdaşlıq platforması kimi əhəmiyyətini gücləndirir.
Zirvə görüşündə Laos Xalq Demokratik Respublikasının AQEM-ə yeni üzv dövlət kimi qəbul edilməsi də mühüm hadisə oldu. Prezident İlham Əliyev bu qərarı təşkilatın Asiya regionunda daha əhatəli dialoq platformasına çevrilməsinin göstəricisi kimi qiymətləndirdi və Laos Prezidenti Thonqlun Sisuliti təbrik etdi.
Zirvə görüşündə Azərbaycanın AQEM-ə sədrliyinin daha iki il müddətinə uzadılması təklifinə üzv dövlətlərin dəstək verməsi də diqqətəlayiq məqam oldu. Bu qərar təşkilat çərçivəsində həyata keçirilən təşəbbüslərin davam etdirilməsi baxımından əhəmiyyət daşıyır.
AQEM-in VII Zirvə Görüşü Azərbaycanın beynəlxalq əməkdaşlığın inkişafına verdiyi töhfələrin təqdim olunması üçün mühüm platforma oldu. Prezident İlham Əliyevin çıxışı ölkəmizin xarici siyasətində suverenlik, ərazi bütövlüyü, dövlətlərin bərabərliyi və beynəlxalq hüquqa hörmət prinsiplərinin əhəmiyyətini bir daha önə çıxardı.
Zirvə görüşünün əsas mesajlarından biri ondan ibarət idi ki, regional təhlükəsizlik yalnız ayrı-ayrı dövlətlərin səyləri ilə deyil, qarşılıqlı etimada, məsuliyyətə və əməkdaşlığa əsaslanan birgə fəaliyyətlə möhkəmlənə bilər. Dövlətlər arasında dialoqun inkişafı, iqtisadi və humanitar əlaqələrin genişləndirilməsi, beynəlxalq hüququn prinsiplərinin ardıcıl tətbiqi davamlı sülhün əsas şərtləridir.
Bakıda keçirilən bu mötəbər toplantı Azərbaycanın Asiya ilə Avropa arasında əlaqələrin inkişafında oynadığı rolu bir daha gündəmə gətirdi. Ölkəmizin nəqliyyat, enerji və diplomatiya sahələrindəki imkanları beynəlxalq əməkdaşlığın genişlənməsi üçün əlverişli zəmin yaradır.
AQEM-in VII Zirvə Görüşü yalnız dövlət başçılarının iştirakı ilə keçirilən beynəlxalq tədbir deyil, həm də sülh, etimad, suverenlik və birgə inkişaf prinsiplərinin müzakirə olunduğu mühüm platforma kimi yadda qaldı. Prezident İlham Əliyevin çıxışında səsləndirilən fikirlər Azərbaycanın regional sabitliyin möhkəmləndirilməsinə və çoxtərəfli əməkdaşlığın inkişafına verdiyi əhəmiyyəti əks etdirdi.

Gülnaz Rüstəmova
YAP Babək rayon təşkilatının əməkdaşı