Yeni Azərbaycan Partiyasının VIII Qurultayı: yeni siyasi mərhələnin prioritetləri və Azərbaycanın strateji hədəfləri - ŞƏRH

2026-cı il oktyabrın 2-də Bakıda, Heydər Əliyev Mərkəzində Yeni Azərbaycan Partiyasının VIII Qurultayı keçirildi. Ölkənin ictimai-siyasi həyatında mühüm hadisələrdən biri olan qurultayda Azərbaycan Respublikasının Prezidenti, Yeni Azərbaycan Partiyasının Sədri cənab İlham Əliyev çıxış edərək dövlətimizin keçdiyi tarixi yola, Azərbaycanın beynəlxalq mövqeyinə, əldə olunmuş nailiyyətlərə və qarşıda duran vəzifələrə dair fikirlərini bölüşdü. Qurultay Azərbaycanın ərazi bütövlüyünün və suverenliyinin tam bərpa edilməsindən sonra keçirilən ilk YAP qurultayı kimi xüsusi əhəmiyyət daşıyırdı.
Yeni Azərbaycan Partiyasının yaranması və inkişafı müstəqil Azərbaycanın müasir siyasi tarixinin mühüm mərhələləri ilə sıx bağlıdır. 1992-ci il noyabrın 21-də Naxçıvanda Ulu Öndər Heydər Əliyevin rəhbərliyi ilə təsis edilən partiya sonrakı illərdə ölkənin siyasi həyatında mühüm yer tutdu. Partiyanın formalaşması Azərbaycanın mürəkkəb ictimai-siyasi proseslərdən keçdiyi, dövlət müstəqilliyinin möhkəmləndirilməsinin və sabitliyin təmin edilməsinin xüsusi əhəmiyyət daşıdığı bir dövrə təsadüf edirdi.
Prezident İlham Əliyev VIII Qurultaydakı çıxışında Yeni Azərbaycan Partiyasının fəaliyyətinin və siyasi xəttinin təkcə ölkəmiz üçün deyil, bütövlükdə region üçün əhəmiyyət daşıdığını qeyd etdi. Dövlətimizin başçısı partiyanın keçdiyi yola nəzər salaraq onun fəaliyyətini Azərbaycanın son onilliklərdəki siyasi prosesləri ilə əlaqələndirdi. Bu baxımdan qurultay həm ötən dövrün nəticələrinin qiymətləndirilməsi, həm də yeni mərhələnin vəzifələrinin müəyyənləşdirilməsi baxımından diqqət çəkirdi.
Prezidentin çıxışında xüsusi yer tutan məsələlərdən biri Azərbaycanın ərazi bütövlüyünün və suverenliyinin tam bərpası oldu. Dövlət başçısı vurğuladı ki, VIII Qurultay ölkəmizin yeni ictimai-siyasi və geosiyasi reallıqlar şəraitində fəaliyyət göstərdiyi dövrdə keçirilir. 2020-ci ildə 44 günlük Vətən müharibəsində qazanılmış tarixi Zəfər və 2023-cü il sentyabrın 20-də Azərbaycanın suverenliyinin tam bərpası ölkənin müasir tarixində mühüm mərhələlərdir. Bu hadisələr regionda yeni siyasi reallıqların formalaşmasına səbəb olmuş, Azərbaycanın gələcək inkişafı üçün yeni imkanlar yaratmışdır.
Dövlət başçısının çıxışında təhlükəsizlik və müdafiə məsələlərinə xüsusi yer ayrılması təsadüfi deyil. Müasir beynəlxalq münasibətlər sistemində baş verən dəyişikliklər, müxtəlif regionlarda davam edən münaqişələr və beynəlxalq hüququn tətbiqi ilə bağlı çətinliklər dövlətlərin müdafiə imkanlarını daim inkişaf etdirməsini zəruri edir. Prezident İlham Əliyev Azərbaycanın əldə etdiyi tarixi nəticələrin qorunması üçün hərbi gücün artırılmasını əsas vəzifələrdən biri kimi müəyyənləşdirdi. Çıxışda 2027-ci ilin dövlət büdcəsində müdafiə və təhlükəsizlik məqsədləri üçün təxminən 9 milyard manat vəsait nəzərdə tutulduğu bildirildi. Bu göstərici təhlükəsizliyin dövlət siyasətindəki yerini və müdafiə qabiliyyətinin davamlı şəkildə gücləndirilməsinə verilən əhəmiyyəti əks etdirir.
Cənab İlham Əliyev çıxışında Azərbaycanın bu nəticələrə çatmaq üçün qarşılaşdığı çətinliklərə və xarici təzyiqlərə də toxundu. Dövlət başçısının fikrincə, ölkənin qarşıya qoyduğu məqsədlərə çatmasında siyasi iradə, ardıcıl fəaliyyət və xalqın vahid mövqeyi mühüm rol oynayıb. Prezident 8 Noyabr və 20 Sentyabr tarixlərinin milli tariximizdə xüsusi yer tutduğunu vurğulayaraq şəhidlərin xatirəsini ehtiramla yad etdi. Bu məqamlar Azərbaycanın müstəqilliyinin, ərazi bütövlüyünün və dövlət suverenliyinin qorunmasının əhəmiyyətini bir daha gündəmə gətirdi.
Yeni Azərbaycan Partiyasının VIII Qurultayı Azərbaycanın ərazi bütövlüyünün və suverenliyinin tam bərpasından sonra yaranmış yeni reallıqlar fonunda partiyanın fəaliyyətinin və ölkənin strateji hədəflərinin müzakirəsi baxımından mühüm hadisə oldu. Prezident İlham Əliyevin çıxışı keçmiş nailiyyətlərin qiymətləndirilməsi ilə yanaşı, gələcək vəzifələrin konkret istiqamətlərini də önə çıxardı. Qarşıdakı mərhələdə əsas məsələ müəyyənləşdirilən prioritetlərin ardıcıl icrası, mövcud imkanlardan səmərəli istifadə olunması və Azərbaycanın uzunmüddətli inkişafının təmin edilməsidir.

Hüseyn Süleymanov
YAP Kəngərli rayon təşkilatının sədr müavini