Milli-mənəvi dəyərlərimizi qorumaq hər birimizin vətəndaşlıq borcudur - ŞƏRH

2026-cı il oktyabrın 27-də Bakıda “Ortaq gələcək naminə dialoq” mövzusunda keçirilən VII Ümumdünya Mədəniyyətlərarası Dialoq Forumu Azərbaycanın beynəlxalq mədəni əməkdaşlıq sahəsindəki mövqeyinin, tolerantlıq ənənələrinin və multikultural dəyərlərə sadiqliyinin nümayişi baxımından mühüm əhəmiyyət daşıyır.
Müasir dünyada qloballaşma proseslərinin sürətləndiyi, müxtəlif mədəniyyətlərin qarşılıqlı təsirinin artdığı bir dövrdə hər bir xalqın qarşısında mühüm vəzifə dayanır: ümumbəşəri dəyərlərə açıq olmaqla yanaşı, öz milli kimliyini, dilini, adət-ənənələrini və özünəməxsus həyat tərzini qorumaq. Azərbaycan bu baxımdan özünəməxsus inkişaf yolu keçərək sübut etmişdir ki, milli-mənəvi dəyərlərə sadiqlik və müasir dünyaya inteqrasiya bir-birini tamamlayan amillərdir.
Prezident İlham Əliyevin çıxışında diqqət çəkən əsas məqamlardan biri də milli ənənələrin yalnız qorunub saxlanılması deyil, eyni zamanda daha da möhkəmləndirilməsi məsələsidir. Çünki ənənələri qorumaq keçmişin mirasına sahib çıxmaqdırsa, onları gücləndirmək həmin mirası gələcək nəsillərə daha zəngin şəkildə çatdırmaq deməkdir. Bu, xalqın tarixi yaddaşının, mənəvi bütövlüyünün və milli özünüdərkinin davamlılığını təmin edən mühüm amildir.
Azərbaycan xalqı əsrlər boyu zəngin mədəniyyət, yüksək mənəvi dəyərlər, qonaqpərvərlik, böyüyə hörmət, ailəyə bağlılıq və müxtəlif xalqlara ehtiram kimi keyfiyyətləri yaşadaraq bu günə çatdırmışdır. Bu xüsusiyyətlər xalqımızın həyat tərzinin ayrılmaz hissəsinə çevrilmiş, cəmiyyətimizdə qarşılıqlı hörmət və həmrəyliyin möhkəmlənməsinə xidmət etmişdir. Müstəqilliyimizin bərpasından sonra milli irsimizin qorunması, Azərbaycan dilinin, milli musiqimizin, incəsənətimizin, folklorumuzun və tarixi abidələrimizin yaşadılması dövlət siyasətinin mühüm istiqamətlərindən biri olmuşdur.
Ulu Öndər Heydər Əliyevin müəyyənləşdirdiyi milli dövlətçilik strategiyasında Azərbaycan xalqının mənəvi sərvətlərinin qorunması xüsusi yer tuturdu. Onun siyasi irsində milli-mənəvi dəyərlərə bağlılıq, azərbaycançılıq ideologiyası və xalqın tarixi köklərinə hörmət dövlətçiliyin əsas dayaqlarından biri kimi qiymətləndirilirdi. Bu siyasət milli kimliyimizin möhkəmləndirilməsi, gənc nəslin vətənpərvərlik ruhunda tərbiyəsi və mədəni irsimizin gələcək nəsillərə ötürülməsi üçün möhkəm zəmin yaratdı.
Bu gün Prezident İlham Əliyevin rəhbərliyi ilə həmin strateji xətt müasir dövrün çağırışlarına uyğun şəkildə davam etdirilir. Azərbaycanın milli maraqlarının qorunması, tarixi irsinin təbliği, mədəniyyətimizin beynəlxalq aləmdə tanıdılması və ölkəmizin nüfuzunun yüksəldilməsi istiqamətində həyata keçirilən tədbirlər xalqımızın özünəməxsusluğunu daha aydın şəkildə nümayiş etdirir. Milli ənənələrə sahib çıxmaqla yanaşı, elmə, təhsilə, innovasiyalara və müasir inkişaf meyillərinə açıq olmaq Azərbaycanın inkişaf modelinin mühüm xüsusiyyətlərindəndir.
Azərbaycanın milli-mənəvi dəyərlərinin qorunması ilə bağlı siyasətinin mühüm istiqamətlərindən biri də ölkəmizdə multikulturalizm və tolerantlıq mühitinin inkişaf etdirilməsidir. Tarixən müxtəlif xalqların və dinlərin nümayəndələrinin birgə yaşadığı Azərbaycan bu gün də qarşılıqlı hörmətin, dini dözümlülüyün və mədəni müxtəlifliyin nümunəsi kimi tanınır. Ölkəmizdə müxtəlif dini icmaların sərbəst fəaliyyəti, milli azlıqların hüquqlarının qorunması və mədəni irslərinin yaşadılması cəmiyyətdə sağlam mənəvi mühitin formalaşmasına töhfə verir.
Prezident İlham Əliyevin rəhbərliyi ilə həyata keçirilən siyasət nəticəsində Bakı beynəlxalq mədəniyyətlərarası dialoqun mühüm mərkəzlərindən birinə çevrilmişdir. 2011-ci ildən etibarən təşkil olunan Ümumdünya Mədəniyyətlərarası Dialoq Forumları müxtəlif ölkələrin nümayəndələrini bir araya gətirərək sülh, qarşılıqlı anlaşma və əməkdaşlıq ideyalarının təşviqinə xidmət edir. 2026-cı il oktyabrın 27-də keçirilən VII Forumun da geniş beynəlxalq iştirakı bu təşəbbüsün əhəmiyyətini bir daha təsdiqləmişdir. Tədbirə 100-dən çox ölkədən 2 mindən artıq iştirakçının qeydiyyatdan keçməsi Azərbaycanın dialoq və əməkdaşlıq platforması kimi artan nüfuzunun göstəricisidir.
Bu forumların əhəmiyyəti yalnız mədəniyyət məsələlərinin müzakirəsi ilə məhdudlaşmır. Müasir dünyada münaqişələrin, dini və etnik ziddiyyətlərin, qarşılıqlı etimadsızlığın artdığı bir şəraitdə dialoq sülhün qorunması və xalqlar arasında münasibətlərin möhkəmləndirilməsi üçün mühüm vasitədir. Azərbaycan öz tarixi təcrübəsi ilə nümayiş etdirir ki, fərqli mədəniyyətlərə hörmət, qarşılıqlı anlaşma və milli dəyərlərə sədaqət cəmiyyətin sabitliyinin əsas şərtlərindəndir.
Prezident İlham Əliyevin çıxışında milli kimliyin, dövlətçiliyin, müstəqilliyin və həyat tərzinin qorunmasının vacibliyinə xüsusi diqqət yetirilməsi də təsadüfi deyildir. Dövlət başçısı vurğulamışdır ki, ideoloji risklər fiziki təhlükələr qədər ciddi ola bilər. Bu yanaşma milli dəyərlərin mühafizəsinin yalnız mədəniyyət məsələsi deyil, həm də milli təhlükəsizliyin və müstəqil dövlətçiliyin qorunmasının mühüm tərkib hissəsi olduğunu göstərir. Milli kimliyin qorunması xalqın öz tarixinə, dilinə, mədəniyyətinə və dövlətinə bağlılığının möhkəmləndirilməsi deməkdir.
Milli ənənələrin yaşadılması, ilk növbədə, ailədən və təhsildən başlayır. Uşaqlara ana dilinə sevgi, böyüklərə hörmət, vətənpərvərlik, dürüstlük və insanlara ehtiram kimi keyfiyyətlərin aşılanması cəmiyyətin mənəvi sağlamlığını təmin edir. Gənc nəsil öz xalqının tarixini, ədəbiyyatını, musiqisini, adət-ənənələrini dərindən öyrəndikdə milli kimliyini daha yaxşı dərk edir və onu qorumağın məsuliyyətini anlayır.
Bu baxımdan, milli bayramlarımızın, Novruz ənənələrinin, xalq sənətkarlığının, muğamın, aşıq sənətinin və digər mədəni sərvətlərimizin yaşadılması xüsusi əhəmiyyət daşıyır. Azərbaycan muğamının və xalçaçılıq sənətimizin beynəlxalq səviyyədə tanınması, İçərişəhər, Qobustan və digər tarixi-mədəni irs nümunələrimizin qorunması xalqımızın zəngin mədəniyyətinin dünya ictimaiyyətinə çatdırılmasına xidmət edir. Bu sərvətlər yalnız keçmişimizin yadigarı deyil, həm də gələcək inkişafımızın mənəvi dayaqlarıdır.
Milli dəyərlərin qorunması müasir yeniliklərdən uzaqlaşmaq anlamına gəlmir. Əksinə, öz köklərinə bağlı olan xalq müasir dünyanın imkanlarından daha səmərəli istifadə edə bilər. Rəqəmsal texnologiyaların, müasir təhsil sisteminin və beynəlxalq əməkdaşlığın inkişaf etdiyi bir dövrdə milli mədəniyyətimizi yeni vasitələrlə təbliğ etmək, gənclərin yaradıcılıq imkanlarını genişləndirmək və Azərbaycanın mədəni irsini dünya ictimaiyyətinə daha geniş təqdim etmək mümkündür.
Azərbaycanın müstəqillik illərində qazandığı uğurlar göstərir ki, milli kimliklə müasir inkişaf arasında ziddiyyət yoxdur. Dövlətçiliyin möhkəmləndirilməsi, ərazi bütövlüyünün və suverenliyin bərpası, iqtisadi inkişaf və beynəlxalq əlaqələrin genişlənməsi xalqımızın öz gücünə və gələcəyinə inamını artırmışdır. Bu nailiyyətlərin təməlində milli birlik, tarixi yaddaş və müstəqil siyasət yürütmək iradəsi dayanır.
Prezident İlham Əliyevin VII Ümumdünya Mədəniyyətlərarası Dialoq Forumunda səsləndirdiyi “Biz nəinki öz ənənələrimizi, öz həyat tərzimizi qoruyub saxladıq, o cümlədən onları gücləndirdik” fikri Azərbaycanın inkişaf yolunun mahiyyətini ifadə edir. Bu fikir xalqımızın əsrlərdən süzülüb gələn mənəvi sərvətlərinə sədaqətini, müstəqillik dövründə öz potensialını reallaşdırmaq əzmini və gələcək nəsillərə olan məsuliyyətini özündə birləşdirir.
Ənənələrini qoruyan, milli kimliyini yaşadan və başqa xalqların mədəniyyətinə hörmətlə yanaşan cəmiyyət həm daxili birliyini möhkəmləndirir, həm də beynəlxalq əməkdaşlığa mühüm töhfə verir. Azərbaycan bu gün məhz belə bir inkişaf yolunu davam etdirir. Milli-mənəvi dəyərlərimizə sahib çıxmaq, onları daha da zənginləşdirmək və gələcək nəsillərə ötürmək hər birimizin vətəndaşlıq borcudur. Çünki xalqın gücü yalnız iqtisadi və siyasi nailiyyətləri ilə deyil, həm də qoruyub yaşatdığı mənəvi sərvətləri, milli birliyi və özünəməxsusluğu ilə ölçülür.
Ehtibar İsmayılov
YAP Ordubad rayon təşkilatının sədri