YAP Samux rayon təşkilatının Burunqovaq kəndi üzrə ərazi partiya təşkilatında görüş keçirilib

28 oktyabr 2026-cı il tarixində Azərbaycan Respublikasının Prezidenti, Yeni Azərbaycan Partiyasının Sədri cənab İlham Əliyevin YAP-ın VIII Qurultayındakı nitqindən irəli gələn məsələlərlə bağlı YAP Samux rayon təşkilatının Burunqovaq kəndi üzrə ərazi partiya təşkilatında partiya üzvləri ilə növbəti görüş keçirilib.
Görüş zamanı əvvəlcə Ulu Öndər Heydər Əliyevin, Azərbaycan Respublikasının ərazi bütövlüyü və suverenliyi uğrunda canlarından keçmiş şəhidlərin əziz xatirəsi bir dəqiqəlik sükutla yad edilib.
Görüşdə çıxış edən YAP Samux rayon təşkilatının sədri Gündüz Bayramov bildirib ki, Yeni Azərbaycan Partiyasının VIII Qurultayı ölkəmizin qarşısında duran strateji hədəflərin müəyyənləşdirilməsi, partiyanın fəaliyyət istiqamətlərinin daha da təkmilləşdirilməsi və yeni dövrün çağırışlarına uyğun vəzifələrin həyata keçirilməsi baxımından mühüm əhəmiyyət daşıyır. Natiq, Prezident İlham Əliyevin qurultaydakı nitqinin dövlətimizin gələcək inkişaf prioritetlərini, milli maraqların qorunmasını və Azərbaycanın beynəlxalq mövqeyinin daha da möhkəmləndirilməsini ehtiva etdiyini vurğulayıb.
Gündüz Bayramov qeyd edib ki, partiyanın qarşısında duran vəzifələrin uğurla icrası hər bir ərazi partiya təşkilatının fəaliyyətinin səmərəli qurulmasını, üzvlərlə işin gücləndirilməsini, partiya fəallarının təşəbbüskarlığının artırılmasını və ideoloji işin müasir tələblərə uyğun təşkilini zəruri edir. Sədr, partiya üzvlərinin ölkədə həyata keçirilən dövlət siyasətinin mahiyyətinin ictimaiyyətə çatdırılmasında, milli-mənəvi dəyərlərin qorunmasında və cəmiyyətin ictimai-siyasi həyatında fəal iştirakının vacibliyini diqqətə çatdırıb.
Görüşdə çıxış edən partiya fəalları Yeni Azərbaycan Partiyasının ölkənin ictimai-siyasi həyatındakı rolundan, Prezident İlham Əliyevin rəhbərliyi ilə Azərbaycanın qazandığı nailiyyətlərdən və qarşıda duran vəzifələrin həyata keçirilməsində partiya üzvlərinin məsuliyyətindən bəhs ediblər. Onlar ərazi partiya təşkilatının fəaliyyətinin daha da gücləndirilməsi, partiya üzvləri arasında əlaqələrin möhkəmləndirilməsi və dövlət siyasətinin əsas istiqamətlərinin təşviqi ilə bağlı fikirlərini bölüşüblər.