Yeni dövrün strateji hədəfləri və Azərbaycanın gələcəyi - ŞƏRH

Yeni Azərbaycan Partiyasının VIII Qurultayında ölkə Prezidenti, YAP-ın sədri cənab İlham Əliyev qeyd etmişdir ki, YAP-ın qurultayı ölkəmizin ictimai-siyasi həyatında mühüm hadisədir.

Azərbaycanın müasir tarixində dövlət müstəqilliyimizin qorunması, ərazi bütövlüyümüzün və suverenliyimizin bərpası mühüm yer tutur. Bu tarixi proseslərdən bəhs edərkən Azərbaycan Respublikasının Prezidenti, Müzəffər Ali Baş Komandan cənab İlham Əliyevin ölkəmizin qarşısında duran strateji məqsədlərin həyata keçirilməsindəki rolunu xüsusi qeyd etmək lazımdır.
Ulu Öndər Heydər Əliyevin əsasını qoyduğu dövlətçilik ənənələri müasir Azərbaycanın inkişaf tarixində mühüm əhəmiyyət daşıyır. Yeni Azərbaycan Partiyasının fəaliyyəti də ölkəmizin siyasi həyatının mühüm istiqamətlərindən biridir. Partiyanın VIII Qurultayı yeni dövrün çağırışlarının, dövlətçilik məsələlərinin və gələcək inkişaf hədəflərinin müzakirəsi baxımından əlamətdar hadisədir.
Azərbaycan xalqının tarixində elə günlər var ki, onlar milli yaddaşımıza əbədi həkk olunur. Vətən müharibəsində qazanılan tarixi Zəfər, Qarabağın işğaldan azad edilməsi və dövlət suverenliyimizin tam bərpası belə əlamətdar hadisələrdəndir.
2020-ci ilin 44 günlük Vətən müharibəsində Azərbaycan Ordusu Prezident, Müzəffər Ali Baş Komandan cənab İlham Əliyevin rəhbərliyi ilə torpaqlarımızın azadlığı uğrunda mübarizə apararaq tarixi Qələbə qazandı. Bu Zəfər xalqımızın birliyini, ordumuzun gücünü və Azərbaycan dövlətinin öz milli maraqlarını qorumaq əzmini nümayiş etdirdi.
2023-cü ilin sentyabrında həyata keçirilmiş lokal xarakterli antiterror tədbirlərindən sonra Azərbaycanın bütün ərazisində dövlət suverenliyi tam bərpa olundu. Bu hadisə müstəqil dövlətçilik tariximizin mühüm mərhələsi kimi yadda qaldı. Azərbaycan bayrağının ölkəmizin bütün ərazilərində dalğalanması suverenliyimizin, milli birliyimizin və Konstitusiya quruluşumuzun bərpasının rəmzidir.
Cənab Prezident İlham Əliyevin rəhbərliyi ilə həyata keçirilən siyasətin əsas istiqamətlərindən biri Azərbaycanın ərazi bütövlüyünün və suverenliyinin qorunması, dövlətimizin müdafiə qüdrətinin möhkəmləndirilməsi və beynəlxalq mövqelərinin gücləndirilməsidir. Bu gün qarşıda duran əsas vəzifələrdən biri əldə olunmuş tarixi nailiyyətləri qorumaq, azad edilmiş ərazilərdə bərpa və quruculuq işlərini davam etdirmək, keçmiş məcburi köçkünlərin doğma yurdlarına qayıdışını təmin etməkdir.
Suverenlik yalnız dövlət sərhədlərinin qorunması demək deyil. Suverenlik xalqın öz taleyini müstəqil müəyyən etməsi, milli maraqlarını müdafiə etməsi, dövlətin öz ərazisində qanunlarını və Konstitusiyasını həyata keçirməsi deməkdir. Müstəqilliyimizin qorunması hər bir vətəndaşın məsuliyyətidir.
Bu gün Azərbaycan öz milli maraqlarına əsaslanan xarici siyasət həyata keçirir, beynəlxalq əməkdaşlıq əlaqələrini genişləndirir və regionda sülhün, təhlükəsizliyin təmin olunmasına töhfə verməyə çalışır. Dövlətimizin beynəlxalq nüfuzunun möhkəmləndirilməsi, iqtisadi imkanlarının genişləndirilməsi və milli təhlükəsizliyinin təmin olunması ölkəmizin gələcək inkişafı üçün mühüm əhəmiyyət daşıyır. Yeni Azərbaycan Partiyasının VIII Qurultayında müasir Azərbaycanın siyasi həyatında bu məsələlərin əhəmiyyəti vurğulanmışdır. Dövlətçilik ənənələrimizin qorunması, milli həmrəyliyin möhkəmləndirilməsi və gənc nəslin vətənpərvərlik ruhunda tərbiyəsi hər birimizin diqqət mərkəzində olmalıdır. Xüsusilə gənclərimiz Azərbaycanın tarixini, müstəqillik uğrunda mübarizəsini, şəhidlərimizin qəhrəmanlığını və suverenliyimizin bərpasının əhəmiyyətini dərindən bilməlidirlər. Çünki dövlətimizin gələcəyi milli dəyərlərinə bağlı, savadlı, məsuliyyətli və vətənpərvər gənclərdən asılıdır.
Biz şəhidlərimizin əziz xatirəsini daim uca tutmalı, qazilərimizin fədakarlığını unutmamalı, Vətən uğrunda canından keçən qəhrəmanlarımızın irsini gələcək nəsillərə çatdırmalıyıq. Onların göstərdiyi qəhrəmanlıq Azərbaycan xalqının milli iradəsinin və azadlıq əzminin təcəssümüdür.
Cənab Prezident İlham Əliyevin rəhbərliyi ilə Azərbaycanın qarşısında duran əsas vəzifələrdən biri suverenliyimizi möhkəmləndirmək, azad edilmiş ərazilərimizi dirçəltmək, ölkəmizin iqtisadi və sosial inkişafını davam etdirməkdir. Qarabağda və Şərqi Zəngəzurda aparılan genişmiqyaslı quruculuq işləri, yeni yaşayış məntəqələrinin salınması, infrastrukturun yaradılması və insanların doğma torpaqlarına qayıdışı bu yeni mərhələnin mühüm istiqamətlərindəndir.
Müstəqil Azərbaycanın gələcəyi üçün hər birimiz öz sahəmizdə məsuliyyətlə çalışmalı, təhsilə, elmə, mədəniyyətə və milli-mənəvi dəyərlərimizin qorunmasına töhfə verməliyik. Dövlətimizin güclənməsi yalnız böyük tarixi hadisələrlə deyil, həm də hər bir vətəndaşın gündəlik əməli, zəhməti və məsuliyyəti ilə bağlıdır.
Bir daha vurğulamaq istəyirəm ki, Azərbaycanın dövlət suverenliyi xalqımızın ən böyük tarixi nailiyyətlərindən biridir. Bu nailiyyətin qorunması, möhkəmləndirilməsi və gələcək nəsillərə ötürülməsi hamımızın müqəddəs borcudur.
Cənab Prezident, Müzəffər Ali Baş Komandan İlham Əliyevin rəhbərliyi ilə Azərbaycanın keçdiyi tarixi yol, xalqımızın birliyi və ordumuzun qəhrəmanlığı müasir dövlətçilik tariximizin mühüm səhifələrini təşkil edir.
Gəlin, müstəqilliyimizi, dövlətçiliyimizi, milli birliyimizi və suverenliyimizi daim uca tutaq. Azərbaycanımızın sülh, əmin-amanlıq və davamlı inkişaf şəraitində gələcəyə doğru irəliləməsi üçün hər birimiz öz töhfəmizi verək.
Ölkəmizin ictimai-siyasi həyatında mühüm hadisə olan YAP-ın VIII qurultayı ölkəmizin keçdiyi yolun, əldə etdiyi nailiyyətlərin və qarşıda duran vəzifələrin qiymətləndirilməsi baxımından xüsusi əhəmiyyət daşıyır.

Şükufə Bağırova

YAP Culfa şəhər İncəsənət məktəbi ərazi partiya təşkilatının sədri