Cıdır düzündə Novruz tonqalı – milli birlik və dirçəlişimizin rəmzi - ŞƏRH

Novruz bayramı Azərbaycan xalqının milli-mənəvi dəyərlərini, qədim adət-ənənələrini, zəngin mədəni irsini özündə yaşadan ən əziz bayramlardan biridir. Əsrlər boyu xalqımız tərəfindən böyük sevgi və təntənə ilə qeyd edilən Novruz təbiətin oyanışını, baharın gəlişini, yenilənməni, bərəkəti və gələcəyə olan inamı təcəssüm etdirir. Bu bayram xalqımızın milli kimliyinin, birlik və həmrəyliyinin mühüm göstəricisidir. Novruz ənənələrinin ən möhtəşəm rəmzlərindən biri isə tonqalın alovlandırılmasıdır. Xüsusilə Şuşanın Cıdır düzündə Novruz tonqalının yandırılması özünəməxsus tarixi və mənəvi əhəmiyyət daşıyır.
Cıdır düzü Azərbaycan xalqının yaddaşında xüsusi yeri olan, Qarabağın gözəlliyini, Şuşanın əzəmətini və milli ruhumuzu özündə birləşdirən müqəddəs məkanlardan biridir. Bu məkan uzun illər ərzində xalqımızın mədəni həyatında mühüm rol oynamış, müxtəlif tədbirlərə, musiqi festivallarına və milli mərasimlərə ev sahibliyi etmişdir. Şuşanın təbii gözəlliyi, füsunkar mənzərəsi və tarixi ab-havası Cıdır düzünü Azərbaycanın ən tanınmış simvollarından birinə çevirib.
Uzun illər işğal altında qalan Şuşada Novruz tonqalının yenidən alovlandırılması xalqımız üçün xüsusi məna daşıyır. Çünki bu mərasim yalnız baharın gəlişini qeyd etmək deyil, həm də doğma torpaqlara qayıdışın, tarixi ədalətin bərpasının və milli iradənin təntənəsinin ifadəsidir. Vaxtilə həsrət və nisgil hissləri ilə xatırlanan Cıdır düzü bu gün azadlığın, qələbənin və yenidən dirçəlişin rəmzi kimi Azərbaycan xalqının qəlbində yaşayır.
Şuşanın azad olunması Azərbaycanın müasir tarixində ən mühüm hadisələrdən biridir. 2020-ci il noyabrın 8-də Şuşanın işğaldan azad edilməsi xalqımızın tarixi Zəfərinin əsas səhifələrindən birini təşkil etdi. Bu qələbə yalnız hərbi uğur deyil, eyni zamanda milli iradənin, vətən sevgisinin və dövlətimizin gücünün nümayişi idi. Şuşanın azadlığı ilə xalqımızın uzun illər davam edən həsrətinə son qoyuldu, şəhərin tarixi və mədəni həyatının bərpası üçün yeni mərhələ başlandı.
Cıdır düzündə Novruz tonqalının alovlandırılması bu Zəfərin yaratdığı mənəvi ruhu daha da gücləndirən hadisələrdəndir. Tonqalın alovları sanki xalqımızın qəlbində illərlə qorunan azadlıq arzusunun gerçəkləşməsini, doğma torpaqlarda həyatın yenidən canlanmasını ifadə edir. Bu mərasim Azərbaycan dövlətinin öz tarixi torpaqlarına sahib çıxmaq əzmini və milli-mənəvi dəyərlərinə bağlılığını nümayiş etdirir.
Novruz bayramının əsas xüsusiyyətlərindən biri insanları bir araya gətirməsi, dostluq, qardaşlıq, mərhəmət və paylaşma kimi dəyərləri gücləndirməsidir. Cıdır düzündə keçirilən bayram tədbirləri də bu baxımdan xüsusi əhəmiyyətə malikdir. Burada alovlanan Novruz tonqalı Azərbaycanın müxtəlif bölgələrində yaşayan insanların qəlbində eyni sevinc və qürur hissini oyadır. Bu sevincin əsasında milli birlik, həmrəylik və doğma Vətənə bağlılıq dayanır.
Şuşa Azərbaycan mədəniyyətinin beşiyi, musiqi və poeziya mərkəzi kimi tanınır. Bu şəhər dahi şəxsiyyətlərin, görkəmli sənətkarların yetişdiyi, muğam və Azərbaycan musiqi ənənələrinin inkişaf etdiyi mühüm mədəniyyət məkanıdır. Məhz buna görə də Novruz bayramının Şuşada qeyd edilməsi, Cıdır düzündə tonqalın alovlandırılması milli mədəniyyətimizin yaşadılması baxımından böyük əhəmiyyət kəsb edir. Belə tədbirlər xalqımızın zəngin irsini gələcək nəsillərə çatdırmaqla yanaşı, Şuşanın əvvəlki şöhrətinin bərpasına da töhfə verir.
Dövlət başçısı İlham Əliyevin işğaldan azad edilmiş ərazilərə səfərləri, həmin torpaqlarda həyata keçirilən bərpa və quruculuq işləri Azərbaycanın gələcəyə hesablanmış inkişaf strategiyasının mühüm istiqamətidir. Şuşanın yenidən qurulması, tarixi abidələrin bərpası, infrastrukturun yaradılması və şəhərin mədəni həyatının canlandırılması bu strategiyanın əsas tərkib hissələridir. Şuşada keçirilən beynəlxalq tədbirlər, festivallar və milli bayram mərasimləri şəhərin Azərbaycanın mədəniyyət paytaxtı kimi mövqeyini daha da möhkəmləndirir.
Cıdır düzündə Novruz tonqalının alovlandırılması həm də Böyük Qayıdış prosesinin mənəvi tərəfini ifadə edir. Bu gün işğaldan azad edilmiş ərazilərdə həyata keçirilən genişmiqyaslı quruculuq işləri nəticəsində insanların doğma yurdlarına qayıdışı təmin olunur. Yenidən salınan yaşayış məntəqələri, tikilən yollar, yaradılan sosial infrastruktur həmin torpaqlarda həyatın bərpa edildiyini göstərir. Bu prosesin ən mühüm mənəvi mesajlarından biri doğma torpaqların yalnız fiziki deyil, həm də mədəni və ictimai baxımdan dirçəldilməsidir.
Novruz tonqalının alovları keçmişlə gələcək arasında mənəvi körpü yaradır. Bu alovlarda xalqımızın əsrlər boyu qoruyub saxladığı adət-ənənələr, milli dəyərlər və Vətən sevgisi təcəssüm olunur. Şuşanın Cıdır düzündə tonqalın yandırılması isə həmin dəyərlərin azad Qarabağda yenidən yaşadılmasının parlaq nümunəsidir. Bu mənzərə Azərbaycan xalqının öz tarixinə, mədəniyyətinə və milli kimliyinə nə qədər bağlı olduğunu bir daha nümayiş etdirir.

Tofiq Babayev
YAP Ordubad rayon Dəstə kənd ƏPT -nın sədri