Müzəffər Ali Baş Komandanın rəhbərliyi ilə yazılan yeni tarix - ŞƏRH

Azərbaycan Respublikasının Prezidenti, Müzəffər Ali Baş Komandan cənab İlham Əliyevin “44 gün ərzində Azərbaycan Ordusu hər gün irəliyə gedirdi” cümləsi 2020-ci ildə baş vermiş Vətən müharibəsinin mahiyyətini, Azərbaycan əsgərinin qəhrəmanlığını və xalqımızın tarixi Zəfərə gedən yolunu dolğun şəkildə ifadə edir. Bu fikir təkcə hərbi əməliyyatların gedişini deyil, həm də uzun illər ərzində aparılan məqsədyönlü dövlət siyasətinin, güclü ordu quruculuğunun, xalqımızın milli birliyinin və sarsılmaz iradəsinin nəticəsini əks etdirir. 44 gün davam edən Vətən müharibəsi Azərbaycan tarixinin ən şanlı səhifələrindən biri olmaqla, xalqımızın tarixi ədalətin bərpası uğrunda apardığı mübarizənin təntənəsinə çevrildi.

Azərbaycanın müstəqillik tarixində torpaqlarımızın işğaldan azad edilməsi, ölkəmizin ərazi bütövlüyünün bərpası hər zaman dövlət siyasətinin əsas prioritetlərindən biri olmuşdur. Ermənistanın uzun illər davam edən işğalçılıq siyasəti nəticəsində Azərbaycanın ərazisinin bir hissəsi işğal altında qalmış, yüz minlərlə soydaşımız doğma yurdlarından didərgin düşmüşdür. İşğal dövründə şəhər və kəndlərimiz dağıdılmış, tarixi-mədəni abidələrimizə, dini və milli irsimizə ciddi ziyan vurulmuşdur. Azərbaycan dövləti bütün bu illər ərzində münaqişənin beynəlxalq hüququn norma və prinsipləri əsasında həllinə çalışmış, ölkəmizin ərazi bütövlüyünün bərpası istiqamətində ardıcıl siyasi və diplomatik fəaliyyət həyata keçirmişdir. Cənab Prezident İlham Əliyevin rəhbərliyi ilə həyata keçirilən dövlət siyasətinin mühüm istiqamətlərindən biri güclü və müasir ordunun formalaşdırılması olmuşdur. Ölkəmizin iqtisadi imkanlarının genişlənməsi, müdafiə sənayesinin inkişafı, hərbi texnologiyaların əldə edilməsi, hərbi qulluqçuların peşəkarlığının artırılması və döyüş hazırlığının gücləndirilməsi Azərbaycan Ordusunun qüdrətini əhəmiyyətli dərəcədə artırmışdır. Ordumuzun müasir silah və texnika ilə təchiz edilməsi, beynəlxalq hərbi əməkdaşlığın genişləndirilməsi və şəxsi heyətin hazırlığına xüsusi diqqət yetirilməsi gələcək hərbi uğurların mühüm təməlini yaratmışdır. Bütün bunlar göstərirdi ki, Azərbaycan öz ərazi bütövlüyünü bərpa etmək üçün həm siyasi iradəyə, həm də hərbi gücə malikdir.

2020-ci il sentyabrın 27-də Ermənistan silahlı qüvvələrinin genişmiqyaslı hərbi təxribatlarına cavab olaraq Azərbaycan Ordusu əks-hücum əməliyyatlarına başladı. Vətən müharibəsi adını alan bu mübarizənin əsas məqsədi ölkəmizin ərazi bütövlüyünü bərpa etmək, uzun illər işğal altında qalan torpaqlarımızı azad etmək və məcburi köçkünlərin doğma yurdlarına qayıtmasına şərait yaratmaq idi. Müharibənin ilk günlərindən etibarən Azərbaycan Ordusu yüksək döyüş hazırlığı, çevik idarəetmə, müasir hərbi texnologiyalardan istifadə bacarığı və peşəkarlığı ilə seçildi. Döyüş meydanında nümayiş etdirilən taktiki üstünlük ordumuzun hər gün yeni uğurlar qazanmasına, düşmənin müdafiə mövqelərinin yarılmasına və işğal altında olan ərazilərin azad edilməsinə imkan yaratdı. Vətən müharibəsinin ilk günlərində əldə edilən uğurlar Azərbaycan xalqında böyük ruh yüksəkliyi yaratdı. Cəbrayıl, Füzuli, Zəngilan və Qubadlı istiqamətlərində aparılan hərbi əməliyyatlar nəticəsində mühüm strateji yüksəkliklər, yaşayış məntəqələri və ərazilər düşmən işğalından azad edildi. Hər bir azad edilən kənd və şəhər illərlə doğma yurdlarının həsrəti ilə yaşayan insanların qəlbində yeni ümidlər oyadırdı. Cəbhədən gələn xoş xəbərlər xalqın qələbəyə inamını daha da möhkəmləndirir, ordumuzun irəliləyişini bütün Azərbaycan böyük sevinc və qürur hissi ilə izləyirdi.

44 günlük müharibə ərzində Azərbaycan Ordusu böyük qəhrəmanlıq, iradə və fədakarlıq nümayiş etdirdi. Əsgər və zabitlərimiz mürəkkəb relyef şəraitində, çətin hava və döyüş şəraitində qarşıya qoyulan tapşırıqları uğurla yerinə yetirdilər. Müharibə zamanı tətbiq edilən müasir döyüş taktikası, pilotsuz uçuş aparatlarından və digər müasir hərbi vasitələrdən səmərəli istifadə Azərbaycan Ordusunun üstünlüyünü təmin edən amillərdən oldu. Bununla yanaşı, qələbənin əsasını təşkil edən ən mühüm qüvvə Vətən sevgisi, torpağa bağlılıq, hərbi intizam və Azərbaycan əsgərinin yüksək döyüş ruhu idi. Hər bir hərbçi öz üzərinə düşən vəzifəni Vətən qarşısında müqəddəs borc hesab edərək döyüşürdü. Bu müharibə Azərbaycan xalqının həmrəyliyini və milli birliyini də bütün dünyaya nümayiş etdirdi. Cəbhədə əsgərlərimiz torpaqlarımızın azadlığı uğrunda mübarizə apararkən arxa cəbhədə vətəndaşlarımız vahid amal ətrafında birləşmişdi. İnsanlar könüllü olaraq orduya dəstək göstərir, hərbçilərin ehtiyaclarının qarşılanması üçün müxtəlif təşəbbüslərdə iştirak edir, şəhid ailələrinə və qazilərə mənəvi dayaq olurdular. Müxtəlif yaş qruplarından olan insanların nümayiş etdirdiyi vətənpərvərlik, həmrəylik və fədakarlıq xalqımızın dövlətinə və ordusuna olan inamının göstəricisi idi. Bu birlik Vətən müharibəsinin mənəvi gücünü təşkil edən əsas amillərdən birinə çevrildi. Müharibənin gedişində informasiya mübarizəsi də xüsusi əhəmiyyət daşıyırdı. Cənab Prezident İlham Əliyevin xarici media nümayəndələrinə verdiyi müsahibələr Azərbaycanın haqlı mövqeyinin beynəlxalq ictimaiyyətə çatdırılmasında mühüm rol oynadı. Dövlət başçısı müsahibələrində Ermənistanın işğalçılıq siyasətini, münaqişənin tarixi səbəblərini və beynəlxalq hüquq normalarının tələblərini əsaslandırılmış şəkildə diqqətə çatdırırdı. Bu çıxışlar Azərbaycanın haqq səsinin dünyaya çatdırılması, ölkəmizə qarşı yayılan yanlış məlumatların qarşısının alınması və beynəlxalq ictimaiyyətin obyektiv məlumatlandırılması baxımından mühüm əhəmiyyət kəsb edirdi. Beləliklə, Azərbaycan həm döyüş meydanında, həm də informasiya məkanında öz prinsipial mövqeyini ortaya qoyurdu. Vətən müharibəsinin ən mühüm və həlledici hadisələrindən biri noyabrın 8-də Şuşa şəhərinin işğaldan azad edilməsi oldu. Qarabağın mədəniyyət paytaxtı hesab edilən Şuşanın azad olunması Azərbaycan xalqı üçün xüsusi mənəvi və tarixi əhəmiyyət daşıyırdı. Uzun illər işğal altında qalan bu qədim şəhərin azadlığı təkcə hərbi uğur deyil, həm də milli-mənəvi irsimizin, mədəniyyətimizin və tarixi yaddaşımızın qələbəsi idi. Şuşa əməliyyatı Azərbaycan hərbçilərinin yüksək peşəkarlığını, döyüş əzmini və qeyri-adi qəhrəmanlığını nümayiş etdirdi. Şəhərin mürəkkəb coğrafi mövqeyinə baxmayaraq, Azərbaycan əsgərləri böyük şücaət göstərərək Şuşanı azad etdilər. Bu hadisə müharibənin gedişində dönüş nöqtəsi oldu və Azərbaycanın qələbəsini daha da yaxınlaşdırdı.

Noyabrın 10-da Azərbaycan, Rusiya prezidentləri və Ermənistanın baş naziri tərəfindən imzalanan üçtərəfli bəyanatla hərbi əməliyyatlar dayandırıldı. Bu sənəd əsasında Ağdam, Kəlbəcər və Laçın rayonlarının Azərbaycana qaytarılması təmin edildi. Beləliklə, 44 gün ərzində Azərbaycan Ordusunun döyüş meydanında qazandığı uğurlar siyasi və diplomatik müstəvidə də öz nəticəsini verdi. Azərbaycan özünün ərazi bütövlüyünün bərpası istiqamətində mühüm tarixi nailiyyət əldə etdi. Vətən müharibəsinin nəticələri göstərdi ki, güclü dövlətçilik, ardıcıl siyasət və xalqın birliyi ilə ən mürəkkəb problemlərin həllinə nail olmaq mümkündür.

Vətən müharibəsində qazanılan tarixi Qələbə böyük itkilər və fədakarlıqlar hesabına əldə edildi. Torpaqlarımızın azadlığı uğrunda canlarından keçən şəhidlərimizin xatirəsi xalqımızın qəlbində əbədi yaşayacaqdır. Onların göstərdiyi qəhrəmanlıq Azərbaycan tarixinin ən şərəfli səhifələrinə həkk olunmuşdur. Sağlamlığını itirərək qazi adını qazanan hərbçilərimiz də bu Zəfərin canlı qəhrəmanlarıdır. Şəhidlərimizin əziz xatirəsinin yaşadılması, qazilərimizin və şəhid ailələrinin sosial müdafiəsinin təmin edilməsi dövlətimizin və cəmiyyətimizin əsas mənəvi vəzifələrindəndir. Bu gün azad torpaqlarda dalğalanan Azərbaycan bayrağı onların fədakarlığının, Vətənə sədaqətinin və qəhrəmanlığının ən böyük rəmzidir. 44 günlük Vətən müharibəsində qazanılan Qələbə Azərbaycanın beynəlxalq mövqelərinin möhkəmlənməsinə, regionda yeni siyasi reallıqların formalaşmasına da təsir göstərdi. Azərbaycan dövləti müharibədən sonra regionda sülhün və əməkdaşlığın təmin olunması istiqamətində öz mövqeyini ortaya qoydu. Ölkəmizin ərazi bütövlüyünün bərpası ilə yanaşı, regionda davamlı sülhün, təhlükəsizliyin və iqtisadi əməkdaşlığın inkişafı üçün yeni imkanlar yarandı. Azərbaycanın təşəbbüsləri ilə həyata keçirilən regional layihələr ölkəmizin strateji əhəmiyyətini daha da artırdı. Tarixi Zəfərdən sonra işğaldan azad edilmiş ərazilərdə genişmiqyaslı bərpa və quruculuq işlərinə başlanıldı. Uzun illər ərzində dağıdılmış şəhər və kəndlərimiz yenidən qurulur, müasir infrastruktur yaradılır, yollar, körpülər, tunellər, hava limanları, məktəblər, xəstəxanalar və digər sosial obyektlər inşa edilir. Qarabağ və Şərqi Zəngəzurun iqtisadi potensialının bərpası, əhalinin məşğulluğunun təmin olunması və bölgənin sosial həyatının canlandırılması istiqamətində ardıcıl tədbirlər həyata keçirilir. Bu quruculuq prosesi yalnız fiziki infrastrukturun yenilənməsi deyil, həm də həyatın yenidən doğma torpaqlara qayıtması deməkdir.

Böyük Qayıdış proqramı çərçivəsində keçmiş məcburi köçkünlərin doğma yurdlarına mərhələli şəkildə qayıdışı təmin olunur. İllərlə ata-baba torpaqlarından uzaqda yaşayan insanlar yenidən öz evlərinə, kəndlərinə və şəhərlərinə dönürlər. Bu qayıdış Azərbaycan xalqının uzun illər davam edən həsrətinin sona çatmasının, tarixi ədalətin bərpasının və dövlətimizin gücünün mühüm göstəricisidir. İşğaldan azad edilmiş ərazilərdə yeni yaşayış məntəqələrinin salınması, sosial və iqtisadi şəraitin yaradılması həmin bölgələrin gələcək inkişafına xidmət edir. 2023-cü ilin sentyabrında Azərbaycan Respublikasının suverenliyinin bərpası istiqamətində həyata keçirilən lokal xarakterli antiterror tədbirləri nəticəsində ölkəmizin bütün ərazilərində dövlət suverenliyi tam təmin edildi. Bu hadisə 2020-ci ildə Vətən müharibəsində əldə edilən tarixi Qələbənin məntiqi davamı oldu. Beləliklə, Azərbaycanın ərazi bütövlüyü və suverenliyi tam bərpa edildi, ölkəmizin müasir tarixində yeni mərhələnin əsası qoyuldu. Bu gün 44 günlük Vətən müharibəsi Azərbaycan xalqının yaddaşında milli birlik, qəhrəmanlıq, vətənpərvərlik və dövlətçilik iradəsinin təntənəsi kimi yaşayır. 8 Noyabr – Zəfər Günü xalqımızın milli qürurunu, müstəqilliyə və dövlətçiliyə bağlılığını ifadə edən əlamətdar tarixdir. Bu gün Azərbaycan Ordusunun qüdrəti, əsgər və zabitlərimizin qəhrəmanlığı, şəhidlərimizin müqəddəs xatirəsi və qazilərimizin fədakarlığı böyük ehtiramla yad edilir. Qazanılan Zəfər gələcək nəsillərə Vətən sevgisinin, milli həmrəyliyin və dövlətə sədaqətin ən parlaq nümunəsi kimi təqdim olunur. Müzəffər Ali Baş Komandan İlham Əliyevin rəhbərliyi ilə əldə edilən tarixi Qələbə Azərbaycanın hərbi-siyasi gücünü, xalqımızın sarsılmaz iradəsini və müstəqil dövlət kimi öz taleyini müəyyən etmək əzmini bütün dünyaya nümayiş etdirdi. “44 gün ərzində Azərbaycan Ordusu hər gün irəliyə gedirdi” cümləsi həmin günlərin qəhrəmanlıq salnaməsini, hər bir qarış torpaq uğrunda aparılan mübarizəni və Azərbaycan əsgərinin qələbəyə olan inamını özündə ehtiva edir. Bu ifadə eyni zamanda xalqımızın birliyini, dövlətimizin gücünü və ordumuzun tarixi missiyasını xarakterizə edir. 44 gün ərzində yazılan bu şanlı tarix heç vaxt unudulmayacaq, Azərbaycan xalqının milli yaddaşında əbədi yaşayacaqdır. Qarabağın azadlığı uğrunda canından keçən qəhrəmanlarımızın xatirəsi daim uca tutulacaq, onların bizə miras qoyduğu Zəfər gələcək nəsillər üçün qürur və ilham mənbəyi olacaqdır.

Ləman Cabbarlı

YAP Naxçıvan şəhər təşkilatı “Əziz Əliyev küçəsi 41A” ünvanında yerləşən ərazi partiya təşkilatının sədri,

YAP Naxçıvan şəhər təşkilatının fəal üzvü