Azərbaycan Bayrağı – dövlətçiliyimizin, müstəqilliyimizin və milli qürurumuzun rəmzi - ŞƏRH

Azərbaycan Bayrağı sadəcə üç rəngdən ibarət bir parça deyil. O, xalqımızın milli kimliyinin, dövlətçiliyimizin, müstəqilliyimizin, azadlığımızın və milli qürurumuzun rəmzidir. Bu bayraq Azərbaycan xalqının tarixini, keçmişini, bu gününü və gələcəyə olan ümidlərini özündə birləşdirir. Hər dəfə üçrəngli bayrağımız dalğalananda onun arxasında dayanan böyük bir xalqın iradəsi, dövlətçilik ənənələri və müstəqillik arzusu xatırlanır. Azərbaycan Bayrağı hər bir vətəndaş üçün müqəddəs mənəvi dəyər və milli qürur mənbəyidir.
Dövlət bayrağı hər bir müstəqil ölkənin əsas rəmzlərindən biridir. Bayraq dövlətin suverenliyini, xalqın birliyini və milli varlığını ifadə edir. Azərbaycan Respublikasının Dövlət Bayrağı da xalqımızın azadlıq və müstəqillik ideallarının təcəssümüdür. Onun üzərindəki mavi, qırmızı və yaşıl rənglər milli düşüncəmizin, inkişaf və tərəqqi istəyimizin, mənəvi dəyərlərimizin ifadəsi kimi xüsusi məna daşıyır. Aypara və səkkizguşəli ulduz isə bayrağımızın tarixi və milli-mədəni simvolikasını tamamlayır.
Azərbaycan Bayrağının tarixi xalqımızın dövlətçilik mübarizəsi ilə sıx bağlıdır. 1918-ci ildə Azərbaycan Xalq Cümhuriyyətinin qəbul etdiyi üçrəngli bayraq müstəqil dövlətimizin əsas rəmzlərindən birinə çevrildi. 1991-ci ildə dövlət müstəqilliyimizin bərpasından sonra üçrəngli bayrağımız yenidən ölkəmizin Dövlət Bayrağı kimi təsdiq edildi. Beləliklə, xalqımızın azadlıq və müstəqillik arzularını ifadə edən bu rəmz müasir Azərbaycan dövlətçiliyinin ayrılmaz hissəsinə çevrildi.
Bayrağa hörmət, əslində, dövlətə, Vətənə və xalqın tarixinə hörmət deməkdir. Hər bir Azərbaycan vətəndaşı bilməlidir ki, bayrağımızın dəyəri yalnız rəsmi mərasimlərdə və dövlət tədbirlərində dalğalanması ilə məhdudlaşmır. Bu dəyər gündəlik həyatımızda, davranışlarımızda, dövlətimizə münasibətimizdə və milli kimliyimizə bağlılığımızda öz əksini tapmalıdır. Bayrağa ehtiram göstərmək hər bir vətəndaşın mənəvi məsuliyyətidir.
Xüsusilə gənc nəslin Dövlət Bayrağının mənasını dərindən dərk etməsi mühüm əhəmiyyət daşıyır. Çünki gələcək nəsillər dövlətimizin müstəqilliyini, milli dəyərlərimizi və dövlətçilik ənənələrimizi yaşadacaq əsas qüvvədir. Gənclərimiz bilməlidirlər ki, müstəqillik asanlıqla əldə edilməyib. Bu gün sahib olduğumuz azadlıq, suverenlik və dövlətçilik imkanları xalqımızın uzun illər ərzində apardığı mübarizənin nəticəsidir. Buna görə də hər bir gənc Azərbaycan Bayrağının tarixini öyrənməli, onun mənasını anlamalı və bu milli rəmzə hörmətlə yanaşmalıdır.
Bu istiqamətdə ailənin, məktəbin və cəmiyyətin üzərinə böyük məsuliyyət düşür. Uşaqlara kiçik yaşlarından Dövlət Bayrağının əhəmiyyəti aşılanmalı, onlara Vətənə sevgi, dövlət rəmzlərinə hörmət və milli-mənəvi dəyərlərə bağlılıq öyrədilməlidir. Məktəblərdə keçirilən maarifləndirici tədbirlər, bayram mərasimləri və tarix dərsləri gənc nəslin vətənpərvərlik ruhunda formalaşmasına töhfə verir. Əsas məsələ yalnız bayrağın rənglərini tanıtmaq deyil, onun ifadə etdiyi dövlətçilik və müstəqillik ideyasını gənclərə çatdırmaqdır.
Azərbaycan Bayrağı həm də xalqımızın birliyinin və həmrəyliyinin rəmzidir. Ölkəmizin müxtəlif bölgələrində yaşayan, fərqli peşə və sahələrdə çalışan milyonlarla insanı birləşdirən ortaq dəyərlərdən biri məhz dövlət bayrağımıza olan hörmət və sevgidir. Bayrağımız altında birləşən Azərbaycan xalqı öz milli kimliyini, tarixi irsini və dövlət müstəqilliyini qorumaq əzmini nümayiş etdirir. Bu birlik dövlətimizin gələcək inkişafı üçün də mühüm mənəvi əsasdır.
44 günlük Vətən müharibəsində üçrəngli bayrağımızın xalqımız üçün daşıdığı mənəvi məna bir daha özünü göstərdi. Azərbaycan Ordusunun əldə etdiyi tarixi Zəfərdən sonra dövlət bayrağımızın işğaldan azad edilmiş ərazilərimizdə dalğalanması xalqımızın yaddaşında xüsusi yer tutdu. Xankəndidə, Şuşada, Laçında, Kəlbəcərdə, Cəbrayılda, Füzulidə və digər ərazilərimizdə bayrağımızın ucaldılması dövlət suverenliyinin və ərazi bütövlüyünün bərpasının rəmzi oldu. Bu mənzərə hər bir azərbaycanlı üçün bayrağın yalnız dövlət atributu deyil, həm də Vətənə bağlılığın və milli kimliyin ifadəsi olduğunu bir daha göstərdi.
Dövlət bayrağımızın qorunması və ona ehtiram göstərilməsi yalnız müəyyən bir günün və ya tədbirin vəzifəsi deyil. Bu, hər zaman davam etməli olan mənəvi borcdur. Bayrağa hörmət onun təmiz və səliqəli saxlanılması, rəsmi istifadəsi zamanı müvafiq qaydalara əməl edilməsi, eləcə də onun təmsil etdiyi dəyərlərin qorunması ilə ifadə olunur. Hər bir vətəndaş anlamalıdır ki, dövlət rəmzlərinə münasibət həm də onun dövlətinə və cəmiyyətinə münasibətinin göstəricisidir.
Rəhimə Əliyeva
YAP Ordubad rayon təşkilatı 1 saylı tam orta məktəb ƏPT-nin sədri