Zəfərə aparan yol: milli iradənin, dövlət qüdrətinin və tarixi ədalətin təntənəsi - ŞƏRH

8 Noyabr – Zəfər Günü xalqımızın yaddaşında yalnız bir Qələbə tarixi deyil, Azərbaycanın öz taleyinin sahibi olduğunu bütün dünyaya nümayiş etdirdiyi möhtəşəm dövlətçilik salnaməsidir. Bəzi tarixlər təqvimdə qeyd olunur, bəziləri isə xalqın taleyinə yazılır. 8 Noyabr Azərbaycan xalqının taleyinə qürurla, qəhrəmanlıqla və əbədi Zəfərlə yazılmış tarixdir. Bu tarix bir xalqın illərlə ürəyində yaşatdığı azadlıq arzusunun gerçəyə çevrildiyi, tarixi ədalətin bərpa olunduğu, milli ləyaqətin və dövlət iradəsinin təntənə çaldığı gündür. Zəfər Günü Azərbaycan tarixində yeni bir səhifə açmaqla yanaşı, xalqımızın gələcəyə baxışını, özünə inamını və dövlətçilik düşüncəsini də yeni mərhələyə yüksəltdi. Bu böyük Qələbənin mahiyyətini anlamaq üçün yalnız 44 günün hadisələrinə nəzər salmaq kifayət deyil. Çünki Zəfərin təməli döyüş meydanında atılmamışdan çox əvvəl – Azərbaycanın müstəqil dövlət kimi güclənməsi, iqtisadi potensialının artırılması, beynəlxalq mövqelərinin möhkəmləndirilməsi, güclü ordunun formalaşdırılması və cəmiyyətdə milli birliyin qorunması istiqamətində həyata keçirilən ardıcıl siyasətlə qoyulmuşdu. Azərbaycan Respublikasının Prezidenti, Müzəffər Ali Baş Komandan cənab İlham Əliyevin işğal dövründə səsləndirdiyi bir fikir bu tarixi yolun fəlsəfəsini olduqca dəqiq ifadə edir: “Mən işğal dövründə deyirdim, hər birimiz azadlıq gününü, bu müqəddəs günü öz işimizlə yaxınlaşdırmalıyıq, yaxınlaşdırırdıq və yaxınlaşdırdıq.” Bu fikirdə bütöv bir dövlətçilik strategiyası, siyasi iradə və gələcəyə hesablanmış fəaliyyət proqramı əks olunur. Azadlıq günü təsadüfən gəlmədi. O günə aparan yol hər bir sahədə görülən işlərin, qəbul edilən qərarların, milli maraqlara söykənən siyasi kursun və xalqın sarsılmaz inamının nəticəsi idi. Hər bir dövlətin beynəlxalq nüfuzu onun yalnız siyasi bəyanatları ilə deyil, real iqtisadi və hərbi imkanları ilə müəyyən olunur. Azərbaycan işğal illərində məhz bu həqiqəti əsas götürərək inkişaf strategiyasını müəyyənləşdirdi. Ölkənin iqtisadi gücünün artırılması, infrastrukturun yenilənməsi, enerji təhlükəsizliyinin təmin edilməsi, beynəlxalq iqtisadi əlaqələrin genişləndirilməsi və sosial rifahın yüksəldilməsi milli təhlükəsizliyin mühüm dayaqlarına çevrildi. İqtisadi inkişaf yalnız rəqəmlərdə ifadə olunan göstərici deyildi. O, Azərbaycanın müstəqil qərarlar qəbul etmək imkanını genişləndirən, müdafiə qüdrətini artıran, beynəlxalq münasibətlər sistemində mövqeyini möhkəmləndirən strateji vasitə idi. Regional və qlobal miqyasda artan iqtisadi nüfuz dövlətimizin siyasi müstəqilliyini daha da gücləndirdi. Prezident İlham Əliyevin “Prezident kimi 2003-cü ildən bu günə qədər bütün addımlarım Azərbaycanın gücləndirilməsinə yönəldilmişdir” fikri də məhz bu ardıcıl inkişaf xəttinin mahiyyətini açır. Dövlətin gücləndirilməsi, əslində, gələcək Zəfərin təminatlarının yaradılması demək idi. Bu prosesin ən mühüm istiqamətlərindən biri müasir və qüdrətli Silahlı Qüvvələrin formalaşdırılması oldu. Ordunun maddi-texniki bazası yeniləndi, müasir silah və texnologiyalar əldə edildi, hərbi kadrların peşəkarlığı artırıldı, beynəlxalq hərbi əməkdaşlıq genişləndirildi. Azərbaycan Ordusu zaman keçdikcə regionun ən güclü və hazırlıqlı ordularından birinə çevrildi. Beləliklə, iqtisadi qüdrət, siyasi iradə və hərbi hazırlıq vahid strateji məqsədə – ərazi bütövlüyünün bərpasına xidmət etdi. 2020-ci il sentyabrın 27-də başlayan Vətən müharibəsi Azərbaycan tarixinin dönüş nöqtəsinə çevrildi. Ali Baş Komandanın “İrəli!” əmri ilə Azərbaycan Ordusu tarixi torpaqlarımızın azadlığı uğrunda əks-hücum əməliyyatlarına başladı. Bu əmr yalnız hərbi komandanlıq göstərişi deyildi. Bu, 30 ilə yaxın davam edən həsrətin, xalqın gözləntisinin və milli iradənin döyüş meydanında ifadəsi idi. 44 gün ərzində Azərbaycan Ordusu hər gün irəli getdi. Şəhərlərimiz, kəndlərimiz, strateji yüksəkliklərimiz bir-bir işğaldan azad edildi. Hər azad edilən yaşayış məntəqəsi xalqımızın qəlbində yeni bir ümid, yeni bir sevinc yaratdı. Döyüş meydanında nümayiş etdirilən qəhrəmanlıq, yüksək hərbi peşəkarlıq və fədakarlıq Azərbaycan əsgər və zabitlərinin Vətənə sədaqətinin ən parlaq təcəssümü oldu. Azərbaycan dövləti, xalqı və ordusu vahid amal ətrafında birləşərək öz gücünü bütün dünyaya göstərdi. Ön cəbhədə əsgər torpaq uğrunda döyüşürdüsə, arxa cəbhədə hər bir vətəndaş öz dəstəyi, duası və həmrəyliyi ilə bu mübarizənin iştirakçısına çevrilmişdi. Bu, xalq-ordu-dövlət birliyinin misilsiz nümunəsi idi. 44 günlük müharibənin ən möhtəşəm hadisələrindən biri Şuşanın azad edilməsi oldu. Şuşanın azadlığı hərbi baxımdan mühüm strateji Qələbə olmaqla yanaşı, mənəvi baxımdan da Azərbaycanın tarixi yaddaşına qayıdışı idi. Qarabağın tacı sayılan bu şəhərin azad edilməsi Zəfərin kulminasiya nöqtəsinə çevrildi. 2020-ci il noyabrın 8-də Şuşanın azad olunması xəbərinin xalqa çatdırılması ilə Azərbaycan xalqı öz tarixinin ən möhtəşəm anlarından birini yaşadı. İki gün sonra, noyabrın 10-da imzalanan üçtərəfli Bəyanatla hərbi əməliyyatlar dayandırıldı və Azərbaycanın böyük hərbi-siyasi Qələbəsi rəsmiləşdi. Zəfər bir daha sübut etdi ki, güclü dövlət, güclü ordu və sarsılmaz xalq birliyi qarşısında heç bir maneə əbədi ola bilməz. Azərbaycanın tarixi Qələbəsi 44 günlük Vətən müharibəsi ilə başa çatmadı. Qarşıda dövlət suverenliyinin bütün ölkə ərazisində tam təmin edilməsi kimi mühüm vəzifə dayanırdı. 2023-cü il sentyabrın 19-da həyata keçirilən lokal xarakterli antiterror tədbirləri nəticəsində ölkəmizin suverenliyi tam bərpa olundu. Bir gündən az davam edən antiterror tədbirləri Azərbaycan dövlətinin öz ərazisində konstitusiya quruluşunu təmin etmək əzmini və gücünü nümayiş etdirdi. Bununla da separatizmə son qoyuldu, ölkəmizin ərazi bütövlüyü və suverenliyi tam təmin edildi. Bu hadisə Azərbaycanın müasir tarixində yeni mərhələnin başlanğıcı oldu. Artıq ölkəmiz öz ərazisində dövlət hakimiyyətini tam həyata keçirən, milli təhlükəsizliyini təmin edən və gələcəyini müstəqil müəyyənləşdirən qalib dövlət kimi çıxış edirdi. Prezident İlham Əliyevin rəhbərliyi ilə əldə edilən bu tarixi nəticələr bir daha göstərdi ki, Azərbaycan üçün ərazi bütövlüyü və suverenlik müzakirə predmeti deyil, dövlətçiliyimizin fundamental əsaslarıdır. Azərbaycanın Qələbəsində milli birliyin və siyasi həmrəyliyin xüsusi yeri vardır. Müharibə günlərində xalqımızın nümayiş etdirdiyi birlik yalnız emosional həmrəylik deyildi. Bu, dövlətçilik maraqlarının hər şeydən üstün tutulmasının, milli məsələlərdə ortaq mövqenin formalaşmasının təzahürü idi. Həmin günlərdə siyasi baxışından, sosial mövqeyindən və fəaliyyət sahəsindən asılı olmayaraq milyonlarla insan Vətənin müdafiəsi naminə bir amal ətrafında birləşdi. Azərbaycan xalqı dünyaya göstərdi ki, söhbət Vətənin taleyindən gedəndə fərqli düşüncələr milli maraqların arxasında birləşə bilir. Prezident İlham Əliyevin “Milli birlik daimi olmalıdır, çünki Azərbaycanın önəmi artır, dünyada oynadığı rolu artır” fikri bu gün də öz aktuallığını qoruyur. Çünki Zəfər yalnız qazanılmalı deyil, həm də qorunmalı və gələcək nəsillərə ötürülməlidir. Bu baxımdan siyasi rəqabət və fikir müxtəlifliyi ilə milli maraqlara münasibət arasında aydın sərhədin qorunması vacibdir. Dövlətin müstəqilliyi, suverenliyi, ərazi bütövlüyü və təhlükəsizliyi ümummilli dəyərlərdir. Onların müdafiəsi hər bir vətəndaşın mənəvi və vətəndaşlıq məsuliyyətidir. Zəfər sevincimizin arxasında böyük bir ağrı, misilsiz fədakarlıq və əvəzsiz itkilər dayanır. Bu Qələbə şəhidlərimizin qanı, qazilərimizin sağlamlığı, əsgər və zabitlərimizin qəhrəmanlığı hesabına qazanılıb. Ona görə də 8 Noyabr yalnız qürur günü deyil, həm də ehtiram və minnətdarlıq günüdür. Şəhidlərimizin əziz xatirəsi xalqımızın yaddaşında daim yaşayacaq. Onların ailələrinin sosial müdafiəsi, qazilərimizin reabilitasiyası, məşğulluğunun təmin edilməsi və gündəlik qayğılarla əhatə olunması dövlət siyasətinin mühüm istiqamətlərindəndir. Prezident İlham Əliyevin şəhid ailələri və qazilərlə bağlı səsləndirdiyi fikirlər bu məsuliyyətin dövlət səviyyəsində necə yüksək qiymətləndirildiyini göstərir. Şəhid ailələrinə və qazilərə göstərilən diqqət sadəcə sosial siyasət deyil, həm də Vətən qarşısında borcun, milli vicdanın və tarixi ədalətin ifadəsidir. Zəfər Günündə qəhrəmanlarımızı anmaq, onların ailələrinə ehtiram göstərmək, qazilərimizin yanında olmaq hər birimizin mənəvi borcudur. Çünki bu gün dalğalanan üçrəngli bayrağımızın hər bir qarışı qəhrəmanlarımızın fədakarlığı ilə müqəddəsləşib. Azərbaycanın Zəfərdən sonrakı mərhələdə qarşıya qoyduğu ən mühüm vəzifələrdən biri işğaldan azad edilmiş ərazilərin yenidən qurulması və doğma yurdlarından didərgin düşmüş insanların öz torpaqlarına qayıdışının təmin edilməsidir. Prezident İlham Əliyevin “Azərbaycanın quruculuq missiyası başlanır. Bundan sonra Azərbaycan yalnız inkişaf edəcək. Azad edilmiş torpaqlara bundan sonra həyat qayıdacaq” fikri qalib dövlətimizin yeni inkişaf fəlsəfəsini ifadə edir. Bu gün Qarabağ və Şərqi Zəngəzur genişmiqyaslı quruculuq işlərinin həyata keçirildiyi böyük tikinti meydanına çevrilib. Yeni avtomobil yolları, tunellər, körpülər, hava limanları, elektrik stansiyaları, yaşayış kompleksləri, məktəblər və xəstəxanalar inşa edilir. İşğal dövründə dağıdılmış şəhər və kəndlər yenidən qurulur, müasir infrastruktur yaradılır. Böyük Qayıdış proqramı çərçivəsində keçmiş məcburi köçkünlərin doğma yurdlarına mərhələli şəkildə qayıdışı təmin olunur. İllərlə həsrətində olduqları evlərə, torpaqlara, ata-baba yurdlarına qayıdan insanların sevincində Zəfərin əsl mənası bir daha üzə çıxır. Bu gün Qarabağda və Şərqi Zəngəzurda yalnız binalar tikilmir, həyat yenidən qurulur. Bir vaxtlar işğalın ağır izlərini daşıyan ərazilərdə yeni iqtisadi imkanlar, sosial layihələr və müasir yaşayış mühiti formalaşdırılır. Dövlət xidmətlərinin də bu ərazilərdə təşkili xüsusi əhəmiyyət daşıyır. DOST və ASAN xidmətləri kimi vətəndaş məmnunluğuna əsaslanan xidmət modellərinin Qarabağda fəaliyyət göstərməsi Azərbaycanın quruculuq siyasətinin sosial mahiyyətini nümayiş etdirir. Bu, dövlətin öz vətəndaşına yaxınlığının, müasir idarəetmə prinsiplərinin və azad edilmiş ərazilərdə həyatın hərtərəfli bərpasının göstəricisidir. Azərbaycan bu gün əldə etdiyi Qələbəni yeni münaqişələr üçün deyil, dayanıqlı sülhün və regional əməkdaşlığın təmin edilməsi üçün tarixi imkan hesab edir. Ölkəmizin mövqeyi aydındır: sülh ədalətə, beynəlxalq hüquqa, qarşılıqlı hörmətə və dövlətlərin suverenliyinin tanınmasına əsaslanmalıdır. Prezident İlham Əliyevin “Biz sülh istəyirik, biz müharibə istəmirik. Sülh, amma ədalətli sülh” bəyanatı Azərbaycanın prinsipial mövqeyini ifadə edir. Azərbaycanın məqsədi regionda təhlükəsizliyin möhkəmləndirilməsi, nəqliyyat-kommunikasiya əlaqələrinin genişləndirilməsi, iqtisadi əməkdaşlığın inkişafı və gələcək nəsillər üçün sabit mühitin yaradılmasıdır. Çünki müharibədə Qələbə qazanmaq böyük hünərdirsə, həmin Qələbənin yaratdığı imkanlardan istifadə edərək sülh və inkişaf qurmaq da böyük dövlətçilik məsuliyyətidir. Bu gün 8 Noyabr – Zəfər Günü Azərbaycan xalqının milli qürurunun, dövlətçilik əzminin və tarixi yaddaşının ən parlaq ifadəsidir. Bu tarix bizə bir həqiqəti xatırladır: heç bir xalq öz milli iradəsinə, dövlətinə və tarixi ədalətə inamını itirmədiyi müddətdə məğlub sayıla bilməz. Azərbaycanın keçdiyi yol göstərdi ki, məqsədyönlü siyasət, güclü iqtisadiyyat, qüdrətli ordu, milli birlik və qətiyyətli liderlik bir araya gəldikdə ən mürəkkəb tarixi vəzifələri belə həll etmək mümkündür. Zəfər Günü həm də gələcək nəsillər qarşısında məsuliyyətimizi artırır. Biz bu tarixi yalnız xatırlamamalı, onun mahiyyətini, qazanılan Qələbənin dəyərini və bu uğurun hansı fədakarlıqlar hesabına əldə olunduğunu gənclərə çatdırmalıyıq. Vətənə sevgi yalnız sözlə deyil, biliklə, zəhmətlə, məsuliyyətli vətəndaş mövqeyi ilə və dövlətimizin inkişafına töhfə verməklə sübut olunur. 8 Noyabr Azərbaycan xalqının alnına yazılmış şərəf tarixidir. Bu tarix sübut etdi ki, xalqın iradəsi sarsılmaz, dövlətin gücü möhkəm, ordunun qüdrəti yüksək, Vətən sevgisi isə hər cür maneədən üstündür. Zəfər bir günün adı deyil – illərlə qurulan dövlət gücünün, xalqın birliyinin, əsgərin qəhrəmanlığının və tarixi ədalətin təntənəsidir. Bu gün üçrəngli bayrağımızın Qarabağda və Şərqi Zəngəzurda əzəmətlə dalğalanması xalqımızın ən böyük qürur mənbəyidir. O bayraq bir daha göstərir ki, Azərbaycan öz tarixini özü yazır, öz gələcəyini özü müəyyən edir. Zəfərimiz əbədi, dövlətimiz qüdrətli, birliyimiz sarsılmaz olsun! 8 Noyabr – Zəfər Günümüz mübarək!

Böyükağa Axundov

YAP Lənkəran rayon təşkilatının ideoloji işlər üzrə məsləhətçisi