PDF Oxu

Siyasət

  • 302

Heydər Əliyev siyasi irsi: Azərbaycanın dəyişməz inkişaf strategiyasının təməli - ŞƏRH

Heydər Əliyev siyasi irsi: Azərbaycanın dəyişməz inkişaf strategiyasının təməli - ŞƏRH

Azərbaycanın müasir dövlətçilik tarixində Ümummilli Lider Heydər Əliyevin müəyyən etdiyi siyasi kurs xüsusi əhəmiyyətə malikdir. Bu kurs ölkəmizin müstəqilliyinin möhkəmləndirilməsi, dövlət idarəçiliyinin formalaşdırılması, iqtisadi potensialının gücləndirilməsi və milli maraqlarının qorunması baxımından mühüm tarixi rol oynayıb. Prezident İlham Əliyevin Yeni Azərbaycan Partiyasının VIII Qurultayında səsləndirdiyi “Ulu Öndərin siyasi xətti dəyişməz olaraq qalır” fikri Azərbaycanın inkişaf strategiyasının əsas prinsiplərinin bu gün də qorunduğunu və ardıcıl şəkildə həyata keçirildiyini bir daha təsdiqləyir.

Heydər Əliyevin siyasi fəaliyyətinin əsasını güclü dövlət quruculuğu, milli birlik və müstəqil siyasət prinsipləri təşkil edirdi. 1990-cı illərin əvvəllərində Azərbaycanda hökm sürən siyasi qeyri-sabitlik, iqtisadi tənəzzül, torpaqlarımızın işğalı və dövlət müstəqilliyinin təhlükə altında olması ölkənin gələcəyi üçün ciddi təhdidlər yaratmışdı. Belə mürəkkəb şəraitdə Ulu Öndərin xalqın tələbi ilə hakimiyyətə qayıdışı Azərbaycanın siyasi həyatında dönüş nöqtəsinə çevrildi. Onun qətiyyətli rəhbərliyi nəticəsində ölkədə sabitlik təmin edildi, dövlət institutlarının möhkəmləndirilməsi və müstəqil inkişaf strategiyasının həyata keçirilməsi üçün əsas yaradıldı.

Ulu Öndərin həyata keçirdiyi siyasətin mühüm istiqamətlərindən biri Azərbaycanın beynəlxalq mövqelərinin möhkəmləndirilməsi və iqtisadi imkanlarının genişləndirilməsi idi. 1994-cü ildə atəşkəsə nail olunması, həmin ilin sentyabrında isə “Əsrin müqaviləsi”nin imzalanması ölkəmizin gələcək inkişafında yeni mərhələnin başlanğıcını qoydu. Bu müqavilə Azərbaycanın zəngin enerji ehtiyatlarının dünya bazarlarına çıxarılmasına, xarici investisiyaların cəlb edilməsinə və iqtisadi müstəqilliyin möhkəmləndirilməsinə geniş imkanlar yaratdı. Eyni zamanda, ölkənin beynəlxalq münasibətlər sistemində etibarlı tərəfdaş kimi tanınmasına mühüm töhfə verdi.

Prezident İlham Əliyevin qurultaydakı çıxışında xüsusi vurğuladığı məqamlardan biri siyasi kursun əsas istiqamətlərinin qorunması ilə yanaşı, zamanın tələblərinə uyğun yeni hədəflərin müəyyən edilməsidir. Dövlət başçısının qeyd etdiyi kimi, illər keçdikcə taktiki və hətta strateji məqsədlərdə müəyyən dəyişikliklər baş verə bilər, lakin əsas siyasi xətt öz mahiyyətini saxlayır. Müstəqillik, dövlətçilik, iqtisadi müstəqillik, güclü hərbi potensial və ölkənin daxili imkanlarından maksimum istifadə bu strategiyanın başlıca dayaqlarıdır. Bu prinsiplər Azərbaycanın bugünkü inkişaf modelinin də əsasını təşkil edir.

2003-cü ildən etibarən Prezident İlham Əliyevin rəhbərliyi ilə həyata keçirilən siyasət Heydər Əliyev ideyalarının yeni dövrün çağırışlarına uyğun davam etdirilməsini təmin edib. Ölkədə genişmiqyaslı infrastruktur layihələri reallaşdırılıb, regionların sosial-iqtisadi inkişafına xüsusi diqqət yetirilib, nəqliyyat və enerji imkanları genişləndirilib. Azərbaycanın beynəlxalq iqtisadi əlaqələri şaxələndirilib, qeyri-neft sektorunun inkişafı istiqamətində mühüm addımlar atılıb. Bütün bunlar dövlətin iqtisadi dayanıqlılığının artırılmasına və müstəqil qərarvermə imkanlarının genişlənməsinə xidmət edib.

Ulu Öndərin siyasi irsində milli təhlükəsizlik və müdafiə qüdrətinin artırılması da mühüm yer tutur. Prezident İlham Əliyevin rəhbərliyi ilə Azərbaycan Ordusunun döyüş qabiliyyəti yüksəldildi, hərbi-texniki imkanları genişləndirildi və müdafiə sənayesinin inkişafına xüsusi diqqət göstərildi. Nəticədə 2020-ci ildə 44 günlük Vətən müharibəsində qazanılan tarixi Zəfər Azərbaycanın ərazi bütövlüyünün bərpası istiqamətində həlledici mərhələ oldu. 2023-cü ilin sentyabrında həyata keçirilən antiterror tədbirləri nəticəsində isə ölkəmizin suverenliyi tam bərpa edildi. Bu tarixi hadisələr milli maraqlara əsaslanan ardıcıl siyasətin və güclü dövlət quruculuğunun əhəmiyyətini bir daha nümayiş etdirdi.

Bu gün Azərbaycanın qarşısında duran əsas vəzifələrdən biri əldə edilmiş nailiyyətləri qorumaq, müdafiə potensialını daha da gücləndirmək və iqtisadi inkişafın davamlılığını təmin etməkdir. Prezident İlham Əliyevin VIII Qurultaydakı çıxışında hərbi gücün artırılmasına xüsusi diqqət yetirməsi də mövcud beynəlxalq və regional şəraitin düzgün qiymətləndirilməsindən irəli gəlir. Eyni zamanda, sosial rifahın yüksəldilməsi, əməkhaqlarının və pensiyaların artırılması, yeni investisiyaların cəlb edilməsi dövlət siyasətinin mühüm istiqamətləri kimi müəyyənləşdirilir.

Heydər Əliyev siyasi irsinin yaşadılmasında Yeni Azərbaycan Partiyasının da mühüm rolu vardır. Ulu Öndərin təşəbbüsü ilə yaradılmış YAP Azərbaycanın ictimai-siyasi həyatında mühüm mövqeyə malik siyasi təşkilat kimi fəaliyyətini davam etdirir. Partiyanın ideoloji fəaliyyətinin əsasını dövlət müstəqilliyinin qorunması, milli maraqların müdafiəsi, siyasi sabitliyin möhkəmləndirilməsi və vətənpərvərlik dəyərlərinin təbliği təşkil edir. Bu baxımdan gənc nəslin dövlətçilik ənənələrinə hörmət ruhunda yetişdirilməsi və onların ictimai-siyasi proseslərdə fəallığının artırılması xüsusi əhəmiyyət daşıyır.

Nəticə etibarilə, Prezident İlham Əliyevin VIII Qurultayda səsləndirdiyi fikirlər Heydər Əliyev siyasi irsinin müasir Azərbaycanın inkişaf strategiyasında tutduğu mövqeyi aydın şəkildə ifadə edir. Ulu Öndərin müəyyən etdiyi dövlətçilik prinsipləri bu gün də ölkəmizin siyasi, iqtisadi və sosial inkişafına istiqamət verir. Əsas siyasi xəttin dəyişməz qalması isə Azərbaycanın milli maraqlarını qorumaqla yanaşı, yeni dövrün çağırışlarına uyğun inkişaf etməsinə imkan yaradır. Bu gün əldə olunan nailiyyətlər və qarşıya qoyulan strateji hədəflər göstərir ki, möhkəm dövlətçilik ənənələrinə söykənən siyasi varislik ölkəmizin gələcək uğurlarının mühüm təminatlarından biridir.

Asim Quliyev
YAP Şahbuz rayon təşkilatının mühasibi

Digər xəbərlər