Lənkəranda “Qırmızı Kitab”a salınmış vaşaq aşkar edilib

Ekologiya və Təbii Sərvətlər Nazirliyinin məlumatına əsasən, artıq bu hadisə ilə bağlı araşdırmalara başlanılıb. Ev sahibinin verdiyi məlumata əsasən, bir neçə vaxtdır ki, həyətindən ev quşlarının vəhşi heyvanlar tərəfindən aparılması ilə əlaqədar müdafiə məqsədilə qurulmuş tora vaşaq düşüb.
Vəhşi heyvanın müayinəsi zamanı müəyyən edilib ki, vaşaq dişi fərd olmaqla tam sağlamdır və tələyə düşməsi nəticəsində heç bir xəsarət almayıb. Vaşaq Ekologiya və Təbii Sərvətlər Nazirliyinin əməkdaşları tərəfindən KİV nümayəndələrinin iştirakı ilə həmin gün Hirkan Milli Parkının meşəlik ərazisinə buraxılıb.
Azərbaycan Respublikasının "Qırmızı Kitab"ına daxil edilmiş vaşaqın respublikamızın müxtəlif ərazilərində müşahidə edilməsi, onların yaşama mühiti üçün münbit şəraitin olmasından və yaxşı mühafizəsindən xəbər verir.
Vaşaq Azərbaycanın düzənlik və dağ meşələrində yayılıb. Xüsusən, ona Böyük Qafqaz, Naxçıvan və Lənkəran rayonu ərazilərində rast gəlinir, daş və qaya aralarında məskən salır. XX əsrin ikinci yarısında vaşaqın sayı kəskin azalmış, son illər aparılmış mühafizə tədbirləri nəticəsində isə sayında artım müşahidə olunub.