Azərbaycan Prezidenti İlham Əliyevə “Həştərxan şəhərinin fəxri vətəndaşı” adı verilib

Azərbaycan Respublikasının Prezidenti İlham Əliyevə "Həştərxan şəhərinin fəxri vətəndaşı" adı verilib. Bu barədə qərar Ümumrusiya Azərbaycanlılar Konqresinin Həştərxan vilayəti üzrə regional bölməsinin təşəbbüsü ilə 2011-ci il sentyabrın 8-də "Həştərxan şəhəri" bələdiyyə qurumunun Şəhər Duması tərəfindən qəbul edilib. Sənədi Şəhər Dumasının sədri Y.Simeonova imzalayıb.

Azərbaycan dövlətinin başçısı bu fəxri ada əsası ümummilli lider Heydər Əliyev tərəfindən qoyulmuş Rusiya-Azərbaycan dostluğunun və strateji tərəfdaşlığın inkişafı və möhkəmlənməsində xidmətlərinə, Həştərxanda iri sosial-mədəni və iqtisadi layihələrlə bağlı təşəbbüslərinə, bu layihələri və Rusiya Federasiyasındakı Azərbaycan diasporunun fəaliyyətini dəstəkləməsinə görə layiq görülüb.