Dövlət Sərhəd Xidmətinin Göytəpə Sərhəd Dəstəsində ümummilli lider Heydər Əliyevin 90 illik yubileyinə həsr olunmuş konfrans keçirilmişdir

Aprelin 17-də Dövlət Sərhəd Xidmətinin (DSX) Göytəpə Sərhəd Dəstəsində ümummilli lider Heydər Əliyevin 90 illik yubileyinə həsr olunmuş konfrans keçirilmişdir.

AzərTAc xəbər verir ki, tədbirdə çıxış edən DSX rəisinin müavini, general-mayor Məhəmməd Abbasquliyev dünya şöhrətli siyasətçi, xalqımızın ümummilli lideri Heydər Əliyevin Azərbaycanın dövlətçilik tarixindəki rolunu yüksək qiymətləndirmişdir.

Konfransda "N" saylı hərbi hissənin komandiri, polkovnik Zəki Cəlilov, Milli Məclisin deputatları Musa Qasımlı, Musa Quliyev, Azərbaycan Milli Elmlər Akademiyası Tarix İnstitutunun Əliyevşünaslıq şöbəsinin rəhbəri, tarix elmləri doktoru Ədalət Qasımov ümummilli lider Heydər Əliyevin Vətən və xalq qarşısında əvəzolunmaz xidmətlərindən söhbət açmışlar.

Qeyd olunmuşdur ki, Azərbaycanda müasir, demokratik, hüquqi və dünyəvi dövlət quruculuğu, vətəndaş cəmiyyətinin təşəkkülü, milli-mənəvi dəyərlərə qayıdış, elmin, təhsilin və mədəniyyətin inkişafı ulu öndər Heydər Əliyevin adı ilə bağlıdır.

Çıxış edənlər Sərhəd Qoşunlarının, DSX-nin, sərhəd məntəqələrin yaradılmasında, onların maddi-texniki bazasının möhkəmləndirilməsində, sərhədçilərin sosial vəziyyətinin yaxşılaşdırılmasında böyük öndər Heydər Əliyevin xidmətlərini yüksək qiymətləndirmişlər. Bildirilmişdir ki, Ulu Öndər Azərbaycanda milli sərhəd siyasətini formalaşdırmış, ölkəmizin sərhədlərinin mühafizəsi strategiyasını müəyyən etmişdir.

Bildirilmişdir ki, bu gün ulu öndər Heydər Əliyev siyasi xəttinin layiqli davamçısı Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə Azərbaycan dünya birliyində öz layiqli yerini tutmuş, Cənubi Qafqazda lider dövlətə çevrilmişdir.

Tədbirin sonunda rejissor Vaqif Mustafayevin ulu öndər Heydər Əliyevə həsr etdiyi "General" sənədli filmi nümayiş etdirilmişdir.

AzərTAc