Avropa Azərbaycan Cəmiyyəti Avropa Parlamenti nümayəndə heyətinin işğal altında olan Dağlıq Qarabağ regionuna səfərini pisləyir

Avropa Azərbaycan Cəmiyyəti (AAC) Avropa Parlamentinin (AP) deputatları Eleni Teokarus, Frank Engel, Evald Stadler və Kriakos Triandafilidesin daxil olduğu nümayəndə heyətinin aprelin 26-da Azərbaycanın işğal altında olan Dağlıq Qarabağ regionuna səfərini qəti şəkildə pisləyən bəyanat yaymışdır.

AAC-dan AzərTAc-a bildirmişlər ki, Cəmiyyət bu səfərin münaqişənin həlli istiqamətindəki sülh prosesinə, o cümlədən Ermənistanı öz hərbi qüvvələrini işğal etdiyi Dağlıq Qarabağ və ona bitişik yeddi rayondan çıxarmağa çağıran ATƏT-in Minsk qrupunun fəaliyyətinə ciddi zərbə vurduğunu diqqətə çatdırmışdır.

AAC-ın Belçika nümayəndəliyinin rəhbəri Roman Huna son beş il ərzində Avropa İttifaqı və Azərbaycan arasında konstruktiv tərəfdaşlığın mövcud olduğunu vurğulamışdır. O, Aİ-nin Azərbaycan ilə əməkdaşlığının enerji təhlükəsizliyi, mədəni mübadilə və siyasi tərəfdaşlığa əsaslandığını bildirmişdir.

R.Huna demişdir: "Biz hesab edirik ki, Avropa Parlamentinin nümayəndə heyətinin Dağlıq Qarabağa səfəri beynəlxalq hüquqa ziddir. Bu addım Aİ-nin strateji tərəfdaşı və BMT Təhlükəsizlik Şurasının üzvü olan Azərbaycan Respublikasının ərazi bütövlüyünə və suverenliyinə qarşı hörmətsizlikdir".

AAC-nin Dağlıq Qarabağ münaqişəsinin sülh yolu ilə həllinə tərəfdar olduğunu söyləyən R.Huna bildirmişdir ki, təmsil etdiyi qurum Azərbaycanda və Avropada olan nümayəndəlikləri arasında informasiya mübadiləsinə öz töhfəsini verməyə çalışacaqdır.

AzərTAc