Ulu Öndərin təhsil illərindəki uğurlarını əks etdirən sənədlər müəllim və şagirdlərdə böyük maraq doğurmuşdur

Füzuli rayonundakı 47 nömrəli orta məktəbin müəllim və şagird heyəti mayın 7-də Heydər Əliyev Fondunda olmuşdur.

AzərTAc xəbər verir ki, ümummilli lider Heydər Əliyevin anadan olmasının 90 illiyi ilə əlaqədar ziyarətə gələn qonaqlara Fondun fəaliyyəti haqqında məlumat verilmişdir. Bildirilmişdir ki, Ümummilli Liderin zəngin irsini öyrənərək təbliğ edən Fond müxtəlif sosial-iqtisadi, mədəni layihələr həyata keçirməklə Azərbaycanın tərəqqisinə, mədəniyyətinin və tarixinin təbliğinə kömək göstərir.

Qeyd olunmuşdur ki, Azərbaycanda ikinci dəfə rəhbərliyə gələn ulu öndər Heydər Əliyevin yorulmaz fəaliyyəti nəticəsində təhsil sistemində önəmli islahatlar aparılmışdır. Ulu Öndərin milli dövlət quruculuğu ideyasının əsasında müstəqilliyin əbədiliyinin, demokratiyanın inkişaf yolunun məhz təhsildən keçməsi dururdu. Bu səbəbdən də ümummilli lider Heydər Əliyevin işləyib hazırladığı strategiyanın əsas xətti milli dövlətçilik və hakimiyyət strukturlarının yaradılması və möhkəmləndirilməsi ilə yanaşı, milli təhsil sisteminin yenidən qurulması ilə bağlı idi.

Məhz Ulu Öndərin diqqət və qayğısı sayəsində müasir müstəqil Azərbaycanda təhsil dövlət siyasətinin prioritet istiqamətinə çevrilmişdir. Aparılan əsaslı islahatlar nəticəsində tarixi təcrübə və nailiyyətlər zəminində ölkə təhsildə bir çox diqqətəlayiq uğurlar qazanılmışdır. Ölkəmizin təhsil sisteminin əsaslı şəkildə təkmilləşdirilməsi, idarəetmənin müasir prinsiplər üzrə təşkili, təhsilin beynəlxalq standartlara uyğunlaşdırılması və dünya təhsil sisteminə inteqrasiyası məhz ulu öndər Heydər Əliyevin adı ilə bağlıdır.

Heydər Əliyevin şəxsi arxivindən götürülmüş və onun fəaliyyətinin ayrı-ayrı dövrlərini əhatə edən, Ulu Öndərin həyatının ən müxtəlif məqamlarını əks etdirən, tariximizin bütöv bir dövrü barədə geniş təsəvvür yaradan şəkillərə və eksponatlara baxan müəllim və şagirdlər görkəmli siyasi xadimin uşaqlıq və gənclik illərinə, Moskvada keçmiş SSRİ-nin rəhbərlərindən biri kimi genişmiqyaslı fəaliyyətinə aid materiallara, Bakı-Tbilisi-Ceyhan əsas neft ixrac boru kəmərinin keçdiyi ərazilərin maketinə də maraqla tamaşa etmişlər. Ulu Öndərin təhsil aldığı dövrlərdə əldə etdiyi nailiyyətləri əks etdirən sənədlər müəllim və şagirdlərdə böyük maraq doğurmuşdur.

Sonda Fondun qonaqları Heydər Əliyevin şərəfli ömür yolundan bəhs edən "Böyük ömrün anları" sənədli filmini izləmişlər.

AzərTAc