Azərbaycan nümayəndə heyəti Çində keçiriləcək “Davos Yay Forumu”nda iştirak edəcəkdir

Azərbaycan nümayəndə heyəti sentyabrın 11-dən 13-dək Çinin Dalyan şəhərində keçiriləcək "Davos Yay Forumu"nda iştirak edəcəkdir.

Forum çərçivəsində rabitə və informasiya texnologiyaları naziri Əli Abbasovun bır sıra dövlətlərin nazirləri və aparıcı beynəlxalq təsisatların rəhbərləri ilə görüşləri nəzərdə tutulmuşdur.

Nazirliyin mətbuat xidmətindən bildirmişlər ki, sentyabrın 12-də Ə. Abbasov "Dünya iqtisadi liderlərinin qeyri-rəsmi görüşü: növbəti sərhədlərin yaradılmasına dair inkişaf" mövzusunda keçiriləcək görüşdə də iştirak edəcəkdir.

Forum çərçivəsində nazir Ə.Abbasov "Rəqəmsal iqtisadiyyatın qorunması" mövzusundakı sessiyada əsas məruzəçi olmaqla yanaşı, "XXII əsrdə İpək Yolunun kəşfi" mövzusunda müzakirələrdə xüsusi qonaq qismində çıxış edəcək və iştirakçılara "Trans-Avrasiya Super İnformasiya Magistralı" layihəsi barədə məlumat verəcəkdir.

Tədbirdə hökumət, media, akademiya və vətəndaş cəmiyyətinin nümayəndələrinin iştirakı gözlənilir. Müzakirələrdə əldə olunan nəticələri, strategiyaları və həlləri bölüşmək, o cümlədən qlobal məsələləri və riskləri müzakirə etmək üçün 90 ölkədən 1500-dən çox iştirakçı bir araya gələcəkdir.

yap.org.az