Şahmar Mövsümov: Azərbaycan Dövlət Neft Fondunun 2014-cü il üçün büdcəsinin layihəsində gəlirlər 11,624 mlrd. Manat proqnozlaşdırılır

Azərbaycan Dövlət Neft Fondunun 2014-cü il üçün büdcəsinin layihəsində gəlirlər 11,624 mlrd. manat (14,819 mlrd. ABŞ dolları), xərclər isə 11,626 mlrd. manat (14,821 mlrd. dollar) həcmində proqnozlaşdırılır. Bunu Fondun icraçı direktoru Şahmar Mövsümov deyib.

Ş.Mövsümov bildirib ki, bu vəsaitin 300 mln. manatı qaçqın və məcburi köçkünlərin sosial problemlərinin həllinə xərclənməsi təklif olunur. Gələn il Bakı-Tbilisi- Qars dəmir yolu layihəsinin icrasına daha 132 mln. manatın ayralıması nəzərdə tutulur.

Fond rəhbəri bildirib ki, ARDNF-in 2014-cü il üçün büdcə layihəsində həmçinin 285 mln. manatın yeni neft-kimya kompleksinin inşası, 33,7 mln. manatın təhsil sahəsinə ayrılması planlaşdırılır. Ş.Mövsümov vurğulayıb ki, Trans-Anadolu boru kəmərinin (TANAP) inşası layihəsinin maliyyələşdirilməsinə isə gələn il 800 mln. manat həcmində vəsaitin ayrılması nəzərdə tutulub.

yap.org.az