Azərbaycan-Vyetnam əlaqələrinin inkişafı üçün geniş potensial vardır

Azərbaycanın Vyetnamdakı səfiri Anar İmanov bu ölkənin sənaye və ticarət naziri Vu Huy Hoanq ilə görüşmüşdür.

Xarici İşlər Nazirliyinin mətbuat xidmətindən AzərTAc-a bildirilmişdir ki, görüşdə iki ölkə arasında əlaqələrin, xüsusilə iqtisadiyyat, ticarət, sənaye və investisiya sahələrində əməkdaşlığın inkişaf etdirilməsinin vacibliyi vurğulanmış, hökumətlərarası komissiyanın yaradılması, yüksək səviyyəli səfərlərin həyata keçirilməsi, biznes forumların təşkili, müqavilə-hüquq bazasının genişləndirilməsi barədə müzakirələr aparılmışdır. Ölkələrimiz arasında tarixən mövcud olan dostluq münasibətlərinin müasir dövrdə əməkdaşlığın inkişaf etdirilməsi üçün böyük əhəmiyyət daşıdığı bildirilmişdir. Həmçinin əlaqələrimizin inkişafı üçün geniş potensialın olduğu vurğulanmışdır. Son illər Azərbaycanın və Vyetnamın sürətlə inkişaf etdiyi, hər iki ölkənin yerləşdiyi regionda mühüm rol oynadığı bildirilmişdir.

Tərəflər Azərbaycanın Vyetnamdakı səfirliyi ilə Sənaye və Ticarət Nazirliyi arasında əməkdaşlığın bundan sonra da davam etdirilməsi barədə razılığa gəlmişlər.

AzərTAc